Duerch seng Virlag zum 1:1 huet de Laurent Jans Sparta Rotterdam nach ee Punkt am Match géint den SC Cambuur geséchert.

Sonndeg

An der Eredivisie huet sech d'Awiesslung vum Laurent Jans bezuelt gemaach. De Lëtzebuerger Kapitän ass an der Paus bei engem 0:1-Réckstand op den Terrain komm a konnt dann an der 77. Minutt de Gol zum 1:1 virbereeden. Um Enn séchert sech Sparta Rotterdam domat ee Punkt. De Mica Pinto stoung net am Kader.

Fir den Gerson Rodrigues gouf et an der franséischer Ligue 1 eng Néierlag. Duerch en Eelefmeter an der 33. Minutt verléiert Troyes um Enn mat 0:1 géint Lyon. Den Gerson Rodrigues war dobäi de ganze Match am Asaz.

Samschdeg

An der englescher Championship huet Huddersfield Town 1:1 géint Swansea gespillt. Dobäi huet Huddersfield richteg gutt ugefaangen a louch no 15. Minutten nom Gol vum Danel Sinani mat 1:0 a Féierung. Nom Säitewiessel huet de FLF-Nationalspiller du missten an de Kabinne bleiwen a mat ukucken, wéi Sawansea nach den Ausgläich markéiere konnt.

Royale Union St. Gilloise huet sech mam Anthony Moris am Gol déi nächsten 3 Punkte konnten afänken. No der 3:0-Victoire zu Seraing steet Gilloise weider op der 1. Plaz an der Jupiler League an der Belsch.

Mainz huet sech um Samschdeg de Mëtteg an der Bundesliga um Enn verdéngt mat 1:0 duerch e Gol vum St. Juste an der 48. Minutt géint de VFL Bochum duerchsetzen. De Leandro Barreiro huet déi 90 Minutten duerchgespillt.

Bei der 0:4-Néierlag vu Köln géint Bayern war de jonke Mathias Olesen net am Kader vun de Kölner.

Den Eric Veiga ass an der 2. Liga a Portugal bei der 3:4-Néierlag vu senger Ekipp Vilafranquense géint Penafiel an der 81. Minutt agewiesselt ginn. Zu dësem Zäitpunkt stoung et nach 3:3. Den entscheedende Gol ass an der 90 Minutt gefall.

An Zypern ass den Tim Hall bei der 0:3-Néierlag vun Achnas géint Apoel Nikosia bei der Lokalekipp an der 51. Minutt ausgewiesselt ginn. Achnas bleift domat op der leschter Plaz an Zypern.

An der 2. däitscher Bundesliga huet Erzgebirge Aue een iwwerraschende Punktegewënn zu Hamburg konnten afänken. Beim Tabelleleader St. Pauli huet den Dirk Carlson mat senger Ekipp un der Victoire geschnuppert, krut an der Nospillzäit awer den 2:2 geschoss. De Lëtzebuerger Nationalspiller stoung 90 Minutten um Terrain. Aue bleift trotz dem Punktgewënn op der 17. Plaz an der Tabell.

Dogéint ass an der 3. Liga an Däitschland de Maurice Deville bei der 1:2-Néierlag vu Saarbrécke géint Osnabrück net zum Asaz komm. An och den Eldin Dzogovic ass bei der 3:2-Victoire vu Magdeburg zu Freiburg beim FCM net zum Asaz komm. Souwuel den Deville wéi och den Dzogovic souzen e Samschdeg de Mëtteg 90 Minutten iwwer op der Bänk vun hire jeeweilegen Ekippen.

An Griicheland stoung de Vahid Selimovic bei der 0:3-Néierlag vu Kreta géint de PAOK net am Kader vu Kreta.