De Maurice Deville gewënnt mat Saarbrécken zu Duisburg, den Danel Sinani markéiert weidere Gol an der englescher Championship.

Um Sonndeg war de Gerson Rodrigues mat Troyes an der Ligue 1 am Asaz. De Rodrigues stoung an der Startformatioun an huet déi 90 Minutten duerchgespillt, konnt d' 1:2-Néierlag zu Angers awer net verhënneren. Troyes bleift an der Tabell op der 16. Plaz a muss sech weiderhi Suergen ëm de Verbleif an der ieweschter Liga maachen.

An der Belsch stoung den Anthony Moris beim Match vu Royale Union SG géint Genk am Gol. Den tëschenzäitlechen 1:1 fir Genk konnt hien net verhënneren, seng Ekipp huet awer mat 2:1 gewonnen, duerch e Gol an der zéngter Minutt vun der Nospillzäit. Virdru war Royale Union SG e Gol wéinst Abseits no VAR oferkannt ginn.

De Laurent Jans an de Mica Pinto stounge béid am Kader vu Sparta Rotterdam fir de Match géint den FC Utrecht an der hollännescher Eredivisie. De Jans souz 90 Minutten op der Bänk, de Mica Pinto gouf an der 64. Minutt agewiesselt. Um Schluss gouf et eng 0:3-Néierlag fir de Veräin vun de Lëtzebuerger.

An der drëtter däitscher Liga gouf et an der Partie Duisburg géint Saarbrécken e richtege Golfestival. Net manner wéi siwe Goler si bannent 90 Minutte gefall, um Schluss konnt sech den FC Saarbrécken mam Maurice Deville 4:3 duerchsetzen. De Lëtzebuerger koum an der 67. Minutt op den Terrain. D'Saarlänner haten de Match gutt am Grëff a louche 4:1 vir, hunn an de leschten zéng Minutten awer nach zwee Goler kasséiert, wat de Schluss vum Match nach eng Kéier spannend gemaach huet.

Den Eldin Dzogovic stoung beim 1:1-Gläichspill vu Magdeburg géint Havelse net am Kader.

Matcher um Samschdeg

An der englescher Championship huet den Danel Sinani no 9 Minutten den 1:1 Ausgläich fir Huddersfield markéiert. Eleng an der 1. Hallschent sinn tëscht Reading an Huddersfield 6 Goler gefall, sou dass et mat engem 3:3-Gläich an d'Kabinne gaangen ass. Um Enn gewënnt Huddersfield no engem rasante Match mat 4:3. Den Danel Sinani, deen och schonn am leschte Match e Gol geschoss huet, ass an der 78. Minutt ausgewiesselt ginn.

An der 1. däitscher Bundesliga gouf et eng béis Iwwerraschung fir Mainz. Géint den Tabelleleschte Greuther Fürth ass et eng 0:2-Néierlag ginn. Den FLF-Nationalspiller Leandro Barreiro stoung déi 90 Minutten iwwer um Terrain. De Mathias Olesen war beim 2:2 tëscht Köln a Bochum net am Kader vun de Geißböcke.

An der 2. Bundesliga krut um spéide Samschdegowend Aue eng ferm op den Deckel. D'Ekipp vum Dirk Carlson an Tim Kips, déi alle Beit net am Kader stoungen, hunn 0:5 géint Schalke verluer.

A Griicheland huet an der 1. Liga Kreta géint Panetolikos mat 2:4 de Kierzere gezunn. De Vahid Selimovic ass bei Kreta net zum Asaz komm.

Op Zypern huet Achnas ouni den Tim Hall 0:1 géint Limassol verluer. De Lëtzebuerger stoung net am Kader vun Achnas.

An der 2. Liga a Portugal huet Vilafranquense an der Nospillzäit den entscheedende Gol markéiert an esou de Match mat 4:3 géint Nacional Funchal fir sech entscheet. Den Eric Veiga souz bei der Victoire vu senger Ekipp 90 Minutten op der Bänk.