Fir den Optakt vum 17. Spilldag an der BGL Ligue stoungen um Samschdeg de Mëtteg 2 Matcher um Programm.
478 Spectateuren zu Nidderkuer koumen e Samschdeg tëscht dem Progrès a Rouspert op hir Käschten. An der 1 Hallschent louch d’Lokalekipp duerch e Gol vum Bohnert mat 1:0 am Avantage. Nom Säitewiessel ass Rouspert besser aus dem Vestiaire komm a konnt an der 48. Minutt den Ausgläich markéieren. An enger intensiver an hëtzeger 2. Hallschent ass Rouspert dunn tëschenzäitlech a Féierung gaangen. D’Lokalekipp ass awer nees zeréckkomm, sou dass sech no enger immens spannender an opreegender Schlussphas Nidderkuer a Rouspert duerch een 3:3-Gläich d’Punkten deele mussen.
Am Match tëscht Rodange a Péiteng war et d’Lokalekipp, déi wuel besser an de Match komm ass, éier Péiteng zwee Gang eropgeschrauft huet. Duerno hu just nach d’Gäscht gespillt a louchen an der Paus duerch Goler vum Pina Gomes, Schaus an Abreu mat 3:0 a Féierung. Rodange ass net vill gegléckt, huet een Eelefmeter laanscht geschoss, a verléiert um Enn doheem mat 0:4 géint eng staark opspillend Péitenger Ekipp.
