0:0 no 90 Minutten an 0:0 no 120... D'Finall vun der wichtegster Coupe an England tëscht Chelsea a Liverpool huet misste vum Punkt entscheet ginn.

FA Cup

FC Chelsea - FC Liverpool 0:0 (5:6 no Eelefmeter)

Et war e Match an deem et wuel Chance gouf, ma wou d'Prezisioun gefeelt huet oder d'Keeper excellent gehalen hunn, grad tëscht der 17. an 30. Minutt huet Chelsea e puer gutt Chance gehat. Fir Liverpool gouf et an der 29. Minutt e Schockmoment, wéi de Golkipp Alisson um Buede leie bliwwen ass. Anescht wéi de Mo Salah 3 Minutte méi spéit, konnt den Alisson awer weidermaachen. De Stiermer vu Liverpool huet missten duerch den Diogo Jota no ronn enger hallwer Stonn ersat ginn. Nach virun der Paus huet de Lukaku fir Chelsea eng grouss Chance leie gelooss, esou ass et mat 0:0 an d'Paus gaangen.

Nom Säitewiessel hu béid Ekippe kuerz hannerteneen zwou Chancen net genotzt an no enger Stonn huet de Jota laanscht de Gol geschoss. An de Schlussminutten hat Liverpool nach zwou gutt Chancen, déi si awer och leie gelooss hunn. No 91 Minutten huet den Arbitter ofgepaff an d'Coupefinall ass an d'Verlängerung gaangen. An deenen 30 Minutte war d'Bild änlech, wéi an den 90 virdrun. Béid Ekippe hu probéiert, och wa manner Drock a manner Chancen do waren, ze markéieren, wat awer kengem gelénge sollt. Esou koumen d'Fans op hir Käschten, well dëse Match iwwert déi komplett Längt sollt goen a vum Punkt entscheet gouf.

Chelsea huet hei ugefaangen an den Alonso konnt markéieren, de Milner huet nogezunn. Dono huet den Azpilicueta fir Chelsea verfeelt an den Thiago fir Liverpool markéiert. Den drëtten Eelefmeter op Säite vun Chelsea huet den James erageschoss ma och de Firmino huet d'Nerve behalen. Weider war Liverpool am Avantage. Véierte Mann vum Punkt fir Chelsea war den Barkley, dee getraff huet, ma och den Alexander-Arnold markéiert fir Liverpool. Den Jorginho huet de fënnefte Penalty fir Chelsea geschoss an fir déi véierte Kéier markéiert. Liverpool konnt also mam leschten Eelefmeter d'Victoire kloer maachen, ma beim Duell mam Mané hat de Mendy de richtegen Eck erwëscht an huet esou eng Ekipp am Match gehalen. Esou goung och d'Eelefmeterschéissen an d'Verlängerung, bei där den Ziyech fir déi Londoner an de Jota fir déi Liverpooler treffe konnt. De siwenten Eelefmeter huet de Mount du verschoss a Liverpool hat nees d'Chance, de Sack hei zou ze maachen. Dat ass hinnen och gelongen, well den Tsimikas de Ball sécher am Netz ënnerbrénge konnt. Esou wënnt Liverpool dës golaarm Finall nom 7. Eelefmeter.

Serie A

Udinese Calcio - Spezia Calcio  2:3
1:0 Molina (26'), 1:1 Verde (35'), 1:2 Gyasi (45'+3), 1:3 Maggiore (47'), 2:3 Mari (90'+4)

Fir Udinese ass et ëm net méi vill gaangen, ma Spazia konnt mat enger Victoire sech Loft am Ofstigskampf verschafen. A grad ronderëm d'Paus waren d'Gäscht um Drécker an haten innerhalb vu 15 Minutten aus engem 0:1 en 3:1 gemaach. De Schlussgol vum Mari sollt un der Punkteverdeelung net méi vill änneren. Mat 36 Punkten an nach engem Match ze spillen huet Spezia elo 7 Punkte Virsprong op Cagliari a kann esou, och wann den 18. nach ee Match manner huet, net méi Ofsteigen.

AS Roum - FC Venedeg 1:1
0:1 Okereke (1'), 1:1 Shomurodov (76')

Den AS Roum kënnt net iwwer en 1:1 doheem géint Venedeg eraus. Dëst Resultat bréngt kenger Ekipp eppes, well Venedeg elo keng Chance méi huet, fir nach an der Serie A ze bleiwen an den AS Roum am Duell mat Lazio, Florenz an Atalanta Bergamo ëm déi 2 Plazen an der Europa League an déi eng an der Conference League 2 Punkte verluer huet. De Match hat gutt fir Venedeg ugefaangen, déi an der 1.  Minutt duerch den Okereke a Féierung gaange sinn. Ma hir Missioun, fir 3 Punkte matzehuelen, gouf no 32 Minutte méi schwéier, nodeem de Kiyine seng zweet giel Kaart gesinn huet an huet missten dusche goen. Roum konnt awer laang net vun der Iwwerzuel profitéieren an eréischt an der 76. Minutt konnt de Shomurodov markéieren. Et bleift also bei engem 1:1, dee kengem eppes bréngt.

La Liga

Espanyol Barcelona - FC Valencia 1:1
0:1 Gomez (37'), 1:1 De Tomas (45'+2)

An engem Match, wou et net méi ëm esouvill gaangen ass, well béid Ekippen aus eegener Kraaft net méi uewe matspille kënnen, kënnt en 1:1 eraus, dobäi hat Valencia däitlech méi vum Match, fir hei méi matzehuelen.

Ligue 1

AS Monaco - Stade Brest 4:2
0:1 Duverne (10'), 0:2 Belaili (23'), 1:2 Ben Yedder (44'), 2:2 Ben Yedder (51'), 3:2 Ben Yedder (54'), 4:2 Volland (70')

Monaco war richteg schlecht an de Match géint Brest komm, déi hei näischt méi ze verléieren haten. D'Monegasse ware fréi 0:2 hannen, éier de Ben Yedder seng Klass weise konnt. An eppes iwwer 10 Minutte Spillzäit huet hien 3 Mol, eng Kéier virun en zwee Mol no der Paus, markéiert an huet esou eng Ekipp zeréck op d'Erfollegsspur bruecht. De Volland huet dann zum Schluss nach fir de Schlussgol gesuergt. Mat dësen 3 Punkte spréngt Monaco 1 Spilldag viru Schluss op déi zweete Plaz, déi déi direkt Qualifikatioun fir d'Champions League géif bedeiten, well Marseille seng Partie net gewanne konnt.

Stade Rennes - Olympique Marseille 2:0
1:0 Bourgieaud (12'), 2:0 Majer (35')

Well et enk am Kampf ëm déi international Plazen ass, war fir béid Ekippen haut eng Victoire e Muss. Ma et war d'Heemekipp, déi méi aus hire Chance gemaach huet a fréi schonn 2:0 a Féierung war. Marseille als liichte Favorit koum net méi zeréck an de Match. Dowéinst muss Marseille och elo déi zweet Plaz u Monaco ofginn a Rennes ass nach just 3 Punkten hanner Marseille de Véierten. Hannert hinne sinn nach Stroossbuerg an Nice, déi Béid just 2 Punkte Réckstand hunn.

Racing Stroossbuerg - Clermont Foot 1:0
1:0 Thomasson (28')

Géint Clermont, déi esou just näischt méi mam Ofstig ze dinn hunn, ass de Stroossbuerger ee Gol duergaangen, fir de Match ze wannen. Den Tomasson war bei enger Flank méi héich, wéi all déi aner gesprongen, a konnt mam Kapp markéieren. Dës Victoire katapultéiert Stroossbuerg op déi 5. Plaz, wat d'Qualifikatioun fir d'Conference League géif bedeiten a si bléiwen nach drun, fir esouguer nach an d'Europa League ze kommen, sollt Rennes um leschte Spilldag verléieren a si gewannen. Fënnefte si si awer och just, well Nice géint Lille, déi am Mëttelfeld hänken, doheem mat 3:1 verluer huet.

FC Metz - SCO Angers 1:0
1:0 Lamkel Ze (50')

Wichteg dräi Punkten am Kampf géint den Ofstig fir den FC Metz. Si kënnen et zwar net méi packen, fir direkt an der Ligue 1 ze bleiwen, hunn et awer elo selwer an der Hand, fir d'Relegatiounsplaz ze sécheren. Si sinn aktuell Punktgläich mat Saint-Étienne, déi 1:2 géint Reims verluer hunn, hunn awer e liicht bessert Golverhältnis. Um leschte Spilldag wart awer en Hummergéigner op d'Ekipp aus der Groussregioun, well Metz muss bei de Champion PSG fueren. Saint-Étienne dogéint kritt et mat Nantes ze dinn, déi am Mëttelfeld vun der Tabell hänken.