Den Anthony Moris konnt an der Belsch och eng Victoire feieren. Um Samschdeg hat sech Mannheim mam Laurent Jans knapp mat 1:0 duerchgesat.

A Portugal gouf et e klengen Dämpfer fir den Eric Veiga a Vilafranquense. No 4 Victoiren um Stéck gouf et zu Farense eng 1:2-Defaite. De Lëtzebuerger huet duerchgespillt a krut an der 83. Minutt déi giel Kaart gewisen.

Fir Austria Wien leeft et dogéint ëmmer besser. 3:0 huet d'Austria doheem géint den SV Ried gewonnen. De Marvin Martins huet wéi gewinnt de ganze Match duerchgespillt.

Och fir d'Union Saint-Gilloise mam Anthony Moris gouf et eng knapp 2:1-Victoire zu Eupen. De Lëtzebuerger Golkipp huet duerchgespillt an huet gesinn, wéi seng Ekipp den entscheedende Gol réischt an der Nospillzäit markéiert huet.

De Vincent Thill huet beim 1:1-Remis vu senger Ekipp AIK Stockholm géint Degerfors den tëschenzäitlechen 1:0 (12. Minutt) markéiert. De Mëttelfeldspiller gouf an der 73. Minutt ausgewiesselt.

Den Enes Mahmutovic stoung beim Derby vun ZSKA Sofia géint Levski Sofia net am Kader. Den ZSKA huet de Match auswäerts mat 0:2 verluer.

Beim Match tëschent Bochum a Köln war de Mathias Olesen bei de Gäscht wéinst enger Blessur net am Kader. Um Enn gouf et en 1:1-Remis.

Samschdeg

De Laurent Jans stoung an der 3. Liga an Däitschland bei sengem neie Veräin Waldhof Mannheim bei der 1:0-Victoire géint Wehen Wiesbaden déi 90 Minutten iwwer um Terrain.

Beim 1:1 vun Norwich City géint West Bromwich an der 2. Liga an England ass den Danel Sinani bei der Lokalekipp net zum Asaz komm.

An Norwege gouf et eng Victoire fir Kongsvinger géint Asane Fotball. D'Ekipp vum Lars Gerson konnt sech mat 2:1 duerchsetzen. De Lëtzebuerger stoung déi 90 Minutten iwwer um Terrain.

Eng Victoire gouf et och fir de Mica Pinto mat Sparta Rotterdam an der hollännescher Eredivisie. De Lëtzebuerger Defenseur huet beim 2:1 vu Rotterdam géint Groningen duerchgespillt.

An der 2. däitscher Bundesliga hat Hansa Rostock Besuch vum FC Magdeburg. De Sébastien Thill souz bei Rostock 90 Minutten op der Bänk, iwwerdeems säin Team e wichtegen Dräier am Ostderby (3:1) konnt afänken.

Eng 3:0-Victoire gouf et an der Bundesliga fir Mönchengladbach géint Leipzig. Déi gutt Leeschtung vu senger Ekipp konnt den Yvandro Borges Sanches just vun der Bänk aus matverfollegen.

An den USA huet New York City mam Maxime Chanot d'New York Red Bulls am Derby empfaangen. Schonn direkt an der éischter Minutt konnten d'Haushären duerch e Gol vum Callens a Féierung goen an no 23 Minutten huet de Rodrigues op 2:0 erhéicht. De VAR huet dann no 36. Minutten den Uschlosstreffer vum Manoel oferkannt. Well virun de Goler vun dunn u wéineg geschitt ass, wënnt City dësen Derby. De Chanot stoung déi 90 Minutten um Terrain.

Freideg

Um Freidesmatch an der Bundesliga krut den Tabelle-Sechste Besuch vum Hertha BSC, déi no 6 Spilldeeg eréischt 5 Punkten hunn. De Leandro Barreiro stoung vun Ufank u fir Mainz mat um Terrain.

De Match hat eng Ufanksphas ouni gréisser Highlights. An der 30. Minutt ass d'Hertha dunn awer duerch den éischte geféierleche Ball op de Gol vu Mainz a Féierung gaangen. Den Tousart konnt via Kapp den 1:0 fir d'Hertha markéieren. Mainz huet kee wierklecht Rezept fonnt fir sech Chancen erauszespillen. Domat goung et mam 0:1 an d'Kabinnen.

An der 2. Hallschent sollt sech net vill um Match änneren. Et goufe wéineg Chancen op béide Säiten. Och d'Auswiesslunge sollten net vill dorun änneren. De Match war gepräägt vu Feelpassen a Fouls. An der 64. Minutt hat de Barreiro eng Chance via Kappball, ma dee war net präzis genuch, ma genee op de Christensen. Och seng Matspiller hunn et net besser gemaach... bis et an d'Nospillzäit gaangen ass. Den agewiesselte Caci (55. Minutt) konnt an der 94. Minutt den 1:1 zu Gonschte vu Mainz schéissen a verhënnert domat in extremis eng Néierlag doheem. Et ass dann och den 1. Gol an engem Heemmatch dës Saison fir déi Mainzer.

Mainz huet elo 11 Punkten a bleift virleefeg op Plaz 6 an der Tabell. D'Hertha hätt 3 Punkte gutt gebrauche kënnen, fir aus dem Tabelle-Keller ze kommen. Den 1 Punkt bréngt se zwar elo mol iwwer Nuecht op Plaz 12, ma dat dierft net fir laang sinn.

Lëtzebuerger Futtballer am Ausland

Holland
PEC Zwolle - ADO Den Haag 1:2 (Dirk Carlson bei Den Haag net am Kader)

Saudi-Arabien
Al-Hilal SFC - Al Wehda 3:0  (Gerson Rodrigues bei AI Wehda net am Kader)

Belsch
Royal Antwerpen - Seraing 2:1 (Timothy Martin bei Seraing net am Kader)

Bundesliga
FSV Mainz 05 - Hertha BSC 1:1 (Leandro Barreiro huet bei Mainz de komplette Match gespillt)