En Debakel gouf et fir Bayern München. Den Däitsche Meeschter kënnt mat 1:5 zu Frankfurt ënner d'Rieder.

An der 1. däitscher Bundesliga war et um Samschdeg d'Suite vum 14. Spilldag. Ënnert aneren huet och nach Freiburg zu Wolfsburg gewonnen an Heidenheim setzt sech am Duell vun den Opsteiger géint Darmstadt duerch.

Och an deenen aneren europäesche Lige gouf gespillt. Hei gewënnt ënnert anerem Atalanta Bergamo géint den AC an Arsenal verléiert géint Aston Villa.

Leipzig gewënnt mat 3:2 zu Dortmund a steet an der Tabell elo 4 Punkte virun de Schwaarz-Gielen op der 4. Plaz. Dobäi ass de BVB gutt an de Match komm, éier de Mats Hummels an der 15. Minutt no enger Noutbrems déi Rout Kaart gewise krut. Leipzig war besser a konnt a Féierung goen, éier de Süle nach virun der Paus den Ausgläich markéiere konnt. An der zweeter Hallschent huet Leipzig vun der Iwwerzuel profitéiert, hat eng sëllege Chancen an ass duerch de Baumgartner (54') a Féierung gaangen. An der Nospillzäit huet de Poulsen den 3:1 geschoss. Eriwwer war de Match awer nach net. An esou konnt am Géigenzuch de Füllkrug nach den 2:3 markéieren. Fir e Punktegewënn sollt et awer net méi duergoen.

Eintracht Frankfurt gewënnt e furiose Match géint Bayern München mat 5:1. Fir München ass et am Championnat déi 1. Néierlag an dëser Saison. Fir d'Bayern ass et déi héchsten Defaite zanter 4 Joer. 2019 hat de Champion och schonn 1:5 zu Frankfurt verluer.

Vun Ufank un hunn d'Hessen op d'Gaspedall gedréckt an dës och net méi lass gelooss. Nom 1:0 duerch de Marmoush an der 12. Minutt hunn den Ebimbe (31'), an de Larsson (36') nach an der 1. Hallschent fir eng Virentscheedung gesuergt. Bayern hat wuel déi eng oder aner Chance, bis op dem Kimmich säin Uschlossgol kuerz virun der Paus sollt awer net méi dobäi erauskommen. Bayern ass wuel mat vill Roserei aus der Kabinn komm, sollt an der 50. Minutt  duerch den Ebimbe säin zweete Gol awer äiskal erwëscht ginn. An der Suite vum Match huet een de Kapp net an de Sand gestach, mee et sollt alles an allem géint immens effektiv an aggressiv spillend Frankfurter kee Kraut gewuess sinn. An der 60. Minutt huet de Knauff den Deckel drop gemaach. Bayern verléiert deemno mat 1:5 zu Frankfurt.

Bei der Bundesliga-Premiere vum neien Trainer Nenad Bjelica huet Union Berlin eng iwwerzeegend Leeschtung gewisen a ka sech um Enn dann och verdéngt mat 3:1 géint Gladbach duerchsetzen. An der 1. Hallschent hat eleng de Behrens 2 gutt Chancen, war virum Gol awer net prezis genuch. An der 23. Minutt ass Union dunn duerch een Eelefmeter verdéngt a Féierung gaangen. Gladbach war bis dato nach guer net am Match. Och nom Säitewiessel sollt Union déi besser Ekipp bleiwen. An der 50. Minutt huet den Hollerbach aus ronn 17 Meter de Socre op 2:0 erhéicht éier de Kaufmann an der 70. Minutt den 3:0 markéiere konnt. Den Uschloss vum Plea kuerz dorop sollt näischt méi um Ausgang vum Match änneren, sou dass Union sech ganz wichteg dräi Punkte séchere kann. Bei Gladbach souz de Leandro Borges 90 Minutten op der Bänk.

Eng wichteg Victoire feiert och Werder Bremen. D'Werderaner kënne sech mat 2:0 géint Augsburg duerchsetzen. An enger ausgeglachener 1. Hallschent huet de Stark seng Ekipp no engem Eckball per Kapp a Féierung geschoss. No der Paus war vun de Gäscht net vill ze gesinn, an dëst konnt Bremen dann och äiskal ausnotzen. No enger Flank vum Weiser stoung den Duksch goldrichteg an erhéicht op 2:0. Bremen gewënnt deemno géint den FCA.

Eng monter Partie hunn d'Spectateuren zu Heidenheim gesinn. Nodeems d'Lokalekipp an der Paus a Féierung louch, konnt Darmstadt de Match bannent 8 Minutten dréinen. Dëst sollt awer net vu laanger Dauer sinn, well zwee Goler vum Mainka hunn dofir gesuergt, dass Heidenheim no 71 Minutte mat 3:2 a Féierung louch. Dat sollt dann och d'Schlussresultat sinn.

Freiburg ka sech no engem Gol vum Gregoritsch an der 74. Minutt mat 1:0 zu Wolfsburg duerchsetzen.

D'Statistike vun de Matcher

Klickt hei, fir op d'Säit mat all de Resultater ze kommen.

D'Klickt op de Match, fir d'Statistiken ze gesinn.

Spilldag

D'Tabell vun der Bundesliga

Tabell