Den Titelverdeedeger Jannik Sinner krut et um hellege Wues zu London mam Alexander Zverev ze dinn, fir deen et déi éischt Finall zu Wimbledon war. Viru fënnef Wochen huet den Däitsche säin éischte Grand-Slam konnte gewannen, dat mam Erfolleg zu Paräis bei de French Open.
Grousse Favorit war awer de Südtiroler an Nummer 1 am ATP Tour, deen déi lescht néng Matcher géint den Alexander Zverev alleguerte fir sech entscheede konnt. Um Sonndeg den Owend sollt déi 10. Victoire noeneen dobäi kommen.
Et ass dem Sinner säi fënnefte Grand-Slam-Titel.
Am 1. Saz hu sech béid Spiller absolut näischt geschenkt. An esou ass et bei Stand vu 6:6 an den Tiebreak gaangen.
Hei hat den Alexander Zverev dat bessert Enn a gewënnt den Tiebreak mat 9:7. Och deen 2. Saz huet missen an den Tiebreak, hei hat de Jannik Sinner awer dat bessert Enn fir sech.
Am drëtte Saz huet de Jannik Sinner e Gang erop geschrauft a kroopt sech den 3. Saz mat 6:3.
Am weidere Verlaf vum Match sollt sech um Spillverlaf net méi all ze vill änneren. Den Däitsche koum ëfters e Schrëtt ze spéit, de Sinner huet déi entscheedend Punkten zu de richtege Momenter fir sech entscheet.
A sou gewënnt de Jannik Sinner net nëmmen de 4. Saz mat 6:4 mee och säin zweeten Titel zu Wimbledon.
