Dat war de Sujet e Mëttwoch den Owend beim Caroline Mart op RTL Télé Lëtzebuerg.

VIDEO: Kloertext
Elo Mëttwochs um 20 Auer. D‘Emissioun vum Caroline Mart ronderëm déi Themen, déi jiddereen am Alldag betreffen.

Police- a Justiz Datebanken

"Op der Gare ass eng nigerianesch Drogemafia aktiv, esou de grénge Policeminister François Bausch. An zwou Wochen ass eng ëffentlech Versammlung mat der Gemeng am Stater Garer Quartier. D’Deklaratioun vum Minister war am Zesummenhang mat der Debatt ëm de sougenannte „Casier Bis“ ze verstoen.

D’Gronddebatt iwwert déi ëmstridden Datebanken bei Police a Justiz ass nämlech: "Wéi vill Dateschutz ass ee bereet opzeginn, fir fir d‘Sécherheet ze garantéieren". Dem François Bausch no dierf net vu Skandal geschwat ginn, well d’Police beispillsweis am Kampf géint Drogenhandel e Fichier bräicht.

"Kee Mënsch wëll déi Enquête-Moyenen net ginn", sou den CSV-Parteipresident Fränk Engel. Allerdéngs misste se op eng "rechtstaatlech novollzéibar Manéier" kënne genotzt ginn an "that’s it!". Den LSAP-Fraktiounschef Alex Bodry huet allerdéngs ze bedenke ginn, datt zanter legiferéiert gouf, fir d’éischte Kéier 1979 op europäesch Initiativ hin, "hate mir Gesetzer, déi gréisstendeels lettre morte bliwwe sinn. Mir haten d’Situatioun ni am Grëff".

De François Bausch huet ugekënnegt, d’Rapporte vun der Dateschutzkommissioun a vun der Generalinspektioun vun der Police wäerten am Oktober virleien.

Klimaschutz

Bei wäitem net ofgeschloss ass och den Debat iwwert de Klimaschutz. Eens ware sech d’Vertrieder vun de 4 gréisste Parteien, datt weider méi an den ëffentlechen Transport misst investéiert ginn. Pollutioun misst awer och méi besteiert ginn, mee - an hei war sech och jiddwereen eens - op eng sozial gerecht Aart a Weis. "Et si Leit, déi si finanziell net esou gutt drun", sou den DP-Minister Marc Hansen. Mesuren dierfte net dozou féieren, datt déi, di d’Moyenen net hunn, ausgeschloss ginn.

De Frank Engel huet duerch eng Fro erkläert, datt Leit, déi méi wäit aus de Stied wunnen, kee gudden Accès op den ëffentlechen Transport hunn, mee dacks net an de Stied wunnen, well se sech ebe grad do keng Wunneng kënne leeschten. "A grad déi sinn déi éischt, déi betraff sinn, wa mir da soen, mir maachen den Dreifstoff méi deier", sou de Frank Engel. "Mir kënnen eis kéieren an dréien, wéi mer wëllen“, sou den CSV-President, et kéim een net laanscht d’Debatt ëm de Wuesstem. Hien huet och verséchert, seng Partei wier an där Debatt net méi sou "widderspréchlech" wéi se war.

Weider Sujeten

Diskutéiert gouf och iwwert d’Finanze vum groussherzoglechen Haff, déi sollen ënnert d’Lupp geholl ginn. Den Alex Bodry huet hei fir e Gesetz plädéiert. Dat no den hollänneschen oder belsche Modeller. Méi Transparenz a méi Kontroll vun den Dotatioune fir den Haff wieren am Interêt vum Haff, fir ebe grad Rumeuren aus dem Wee ze raumen, sou d’Participanten un der Table Ronde.

D’Vertrieder vun de 4 Parteie sinn am Ufank vun der Emissioun och op déi politesch a mënschlech Konsequenzen vum Häerzinfarkt vum Vizepremier, Felix Braz agaangen. De François Bausch huet hei Commentairen um Internet bedauert, an deene gesot gëtt, Politiker wéissten, op wat se sech aloossen.

'Invitéen

- François Bausch, Minister fir Police an Arméi,  Mobilitéit an Infrastrukturen, Déi Gréng
- Alex Bodry, LSAP-Fraktiounschef
- Frank Engel, CSV-President
- Marc Hansen, Minister fir d’ Fonction publique an Digitalisatioun, DP-Vizepresident.

De Kloertext leeft am Prinzip all zweete Mëttwoch um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)