Dem Staatsminister seng Deklaratioun zur Lag vun der Natioun war de Sujet e Mëttwoch den Owend am Kloertext op RTL Télé Lëtzebuerg.

Virun allem de Logement stoung am Mëttelpunkt vun der Emissioun Kloertext. Invitéë waren de designéierte Logementsminister Henri Kox, den ADR-Deputéierte Gast Gibéryen an 3 jonk Leit. D'Milena Steinmetzer vu Youth for Climate, de Max Leners vun de Jonke Sozialisten an d'Carole Reckinger vun der Caritas, déi och bei Votum Klima engagéiert ass.

Ënner anerem gouf d'Ried zur Lag vun der Natioun vum Premier Xavier Bettel analyséiert an deen "état de la nation" krut virun allem vun de Jonken net déi beschten Zensur.

De Max Leners, d'Carole Reckinger an d'Milena Steinmetzer waren der Meenung, dass d'Thema Logement komplett gefeelt huet an iwwer d'Klima wier vill geschwat ginn, mä näischt Konkretes. Och den ADR-Depurtéierte Gast Gibéryen huet Konkretes vermësst.

Fir Jonker gëtt den Accès op de Wunnengsmaart vun Dag zu Dag méi schwiereg, respektiv onméiglech, zemools wann net vun doheem gehollef gëtt, sou d'Milena Steinmetzer, dat virun allem a finanzieller Siicht.

De Max Leners seet, datt de Logement och eng grouss sozial Problematik wier an evoquéiert donieft déi geografesch Dimensioun. Sou kéint zum Beispill kee Mënsch sech méi eppes an der Stad leeschten an et wier awer do, wou den ëffentlechen Transport am beschte gräife géing.

D'Expropriatioun wier allzäit de leschte Moyen, esou den designéierte Logementsminister Henri Kox, fir deen et aner Mëttele gëtt. Et wier e Paradigmewiessel agelaut. D'Stad Wien gëtt als Musterbeispill genannt. De Staat géing sech méi staark engagéieren, grad ewéi d'Gemengen. Ma beim kommunalen Engagement bléif awer nach Loft no uewen.

Éischt Prioritéit hätt elo den neie Pacte Logement. Et soll iwwerdeems verstäerkt op d'Locatioun gesat ginn.

Zum Schluss vun der Emissioun Kloertext gouf de Klimaschutz ugeschwat. Déi Jonk si frou, datt d'Politik si héieren huet, si waarden awer op Konkretes.

E wier och evident, datt d'Politik hei méi an der Responsabilitéit wier wéi den Eenzelen. D'Carole Reckinger gëtt do de Plastik als Beispill. Wann een an de Cactus géing akafe goen, wier alles am Plastik agepaakt an deemno misst een et och esou kafen, och wann een dat net wéilt.

E Status Quo wier keng Optioun, seet d'Milena Steinmetzer. Et misst een de System wiesselen.

D'Invitéen

Milena Steinmetzer
schafft fir déi Lenk
huet Youth for Climate ënnerstëtzt

Carole Reckinger
Caritas Responsabel fir politesch Aarbecht & Sensibilisatioun
engagéiert bei Votum Klima

Max Leners
JSL
Jurist & Assistent vum Franz Fayot

Henri Kox
désignéierte Logementsminister
déi gréng

Gast Gibéryen
Députéierten ADR