Wéi mir liewen, schaffen a kommunizéieren ass an engem fundamentale Wandel duerch d'Digitaliséierung an d'kënschtlech Intelligenz.

D’Recht op de Schutz vun eise perséinlechen Donnéeën ass e Mënscherecht, ma dës Protektioun steet an enger ëmmer méi digitaliséierter Welt viru groussen Erausfuerderungen. Wéi ginn eis perséinlech Donnéeë geschützt a wéi eng Verantwortung dréit do d’Politik, grouss Internet-Betriber oder deen Eenzelen – dat war d’Thema en Donneschdeg den Owend am Kloertext op RTL Télé Lëtzebuerg. Invitéeë beim Caroline Mart waren de Christophe Buschmann vun der Dateschutzkommissioun, de Jeff Kaufmann vu BeeSecure, de Jurist-Ekonomist Jean-Philippe Boever, de Chef vu Microsoft Lëtzebuerg Candi Carrera an de Christoph Schommer, Professer op der Uni Lëtzebuerg. An do goung et ënnert anerem ëm d’Educatioun.

Kloertext resuméiert/Reportage Fanny Kinsch

D’Sensibiliséierung ass d’Haaptmissioun vu Bee Secure – et géif een hei gesinn, datt et queesch duerch d’Altersklasse Leit ginn, déi sech ganz gutt doriwwer informéieren, wat mat hiren Donnéeë geschitt, anerer awer och net, esou den Educateur Jeff Kaufmann.

"Dat erkenne mer och bei eis, an eise Formatiounen, déi mer op de Septièmesklasse maachen, dass do laang net jiddereen déi néideg Kompetenzen huet, fir sech an der Onlinewelt zu Recht ze fannen. Ech muss awer och do soen, mat der Educatioun, mir mierken awer och, datt d'Demande ëmmer méi do ass, fir scho méi jonk unzefänken, dat heescht mir gi scho Formatiounen am Alter vun 8-9, dat kënnt ëmmer méi op, wou mer iwwert d'Internetsécherheet och schwätzen."

D’Invitéeë waren der Meenung, datt punktuell Formatiounen a Campagnen net géifen duergoen, et misst hei eng méi systematesch Approche ginn, sot de Jurist-Ekonomist Jean-Philippe Boever.

"Mir sinn op eng total dematerialiséiert, op eng total digital Welt ënnerwee, mir si schonn dran, mä se geet ëmmer méi séier a wann ee wëll matkommen, och iwwerluecht matkommen, muss ee quasi nei goen an nei lafe léieren. Firwat dass mer dat tatsächlech net fäerdeg bréngen, do Fächer ze kreéieren."

Awer och d’Eltere missten eng Roll spillen, fir besonnesch Mannerjäreger ze schützen, där Meenung war de Candi Carrera, Chef vu Microsoft Lëtzebuerg.

"Et ass net nëmmen, mat allem Respekt, mir ënnerstëtze ganz staark BeeSecure, safer Internet Day och, mä ech mengen d'Elteren hunn do och eng Verantwortung, fir ze observéieren, ech hunn och zwee Kanner, mat menge Kanner versichen ech esou gutt wéi méiglech ze schwätzen, och ze observéieren - wéi gi se mat der Technologie ëm? An eng gewësse Sensibiliséierung ze maachen, dass si sech och d'Fro stellen: war déi do Interaktioun, déi ech mat der Technologie hat, war déi normal, effektiv?"

Weider Themen am Kloertext ware 5G a Gesiichtserkennung, Cyberkriminalitéit oder nach den elektronesche Patientendossier.

Invitéë waren:

Christoph Buschmann, Commissaire CNPD

Jeff Kaufmann, Educateur SNJ / BEE Secure

Jean-Philippe Boever, Jurist-Ekonomist

Candi Carrera, Chef vu Microsoft Lëtzebuerg

Christoph Schommer, Proff op der Uni.lu, KI a Sproochveraarbechtung