Et goung ganz prinzipiell ëm d’Diskussioun, ob an a wéi engem Mooss eise System ongerecht ass?

Et misst een zu Lëtzebuerg iwwert d'Ofschafe vum Bankgeheimnis och fir Residenten schwätzen, sot en Donneschdeg den Owend an der Emissioun Kloertext op der Tele den LSAP-Parteipresident Yves Cruchten.
"Dat géif och bedeiten, datt mer mussen dem Staat d'Méiglechkeete ginn, fir kënne gewuer ze ginn, wat d'Verméige vun de Leit ass. An da musse mer och hei zu Lëtzebuerg eng Kéier iwwer d'Bankgeheimnis schwätzen, [...] wat mer jo par Rapport zu eisem Ausland opginn hunn, mä bei eis am Land hu mer dat nach ëmmer.

Op d'Fro vum Caroline Mart, ob  d'LSAP eventuell bereet ass, fir mat op dee Wee ze goen, seet den Yves Cruchten weider: Also mir si selbstverständlech d'Accord, fir mat op de Wee vun enger Verméigenssteier ze goen, respektiv och enger anerer Steier, mir kënnen se nennen, wéi mer wëllen, op mer dat eng Super-Räiche-Steier oder en Impot pour les grandes fortunes nennen oder wéi och ëmmer. Mä ech menge schonn, dat mer eppes musse maachen."

Déi gréng Parteipresidentin Djuna Bernard huet dem Yves Cruchten Recht ginn, datt Donnéeë géife feelen an d'Ophiewe vum Bankgeheimnis do ee Moyen wier.

"Ech verschléisse mech absolut net der Iddi dovunner an ech mengen och, dass mer an déi Richtung sollte fueren, mä ech wëll net de Feeler maachen, wéi verschidden aner Parteipresidenten, fir hei elo Äusserungen ze maachen, déi ech nach net mat menge Parteiorganer opgekläert hunn."

Fir déi 3. Koalitiounspartei DP op där anerer Säit kéim eng Ierfschafts- oder Verméigenssteier net a Fro, sot d'Deputéiert Carole Hartmann.

"Duerch d'Corona-Kris hu mer mat Sécherheet eng méi schwiereg Situatioun, mä an där schwiereger Situatioun ass et fir eis wichteg, dass mer net mat Steiererhéijunge kommen, well bei Steiererhéijunge besteet de Risiko, datt et op d'Leit duerno zréckkënnt, dat heescht, datt d'Leit Kafkraaft verléieren."

De Marc Baum, Deputéierte vun déi Lénk, huet deem widdersprach.

"Notamment dat, wat virdrun an d'Ronn geworf gouf, eng Verméigenssteier an eng Ierfschaftssteier féiert zu méi Recette beim Staat, bedeit awer net doduercher, datt d'Leit Kafkraaftverloscht hunn, am Géigendeel. Doduerch, datt de Staat d'Méiglechkeet huet, erëm z'investéieren, ginn Aarbechtsplaze geschaft, ass och méiglech anstänneg Kollektivverträg ze verhandelen a gëtt d'Kafkraaft erëm éischter gestäerkt."

Rieds goung awer och vu Schlupflächer, iwwert déi Persoune mat grousse Verméige Steieren evitéiere kënnen, notamment déi sougenannte FISen, speziell Fongen, déi vu groussen Immobiliëbesëtzer benotzt ginn, fir quasi keng Steieren ze bezuelen. De CSV-Parteipresident Frank Engel.

"Et ass ganz einfach, wa mer eis simplerweis géife soen, an engem FIS kann d'Steierverwaltung transparent den Aktionär besteieren op deem Benefice, deen e mécht, an zwar mat 21% vun der Plus-value, natierlech hei am Land."

Och den ADR-Deputéierte Roy Reding wollt vum Yves Cruchten wëssen, firwat do nach näischt geschitt wier.

"Wann der dat do Schlupflach, dat kënnt der muer zoumaachen. Dir hätt et scho virun 2 Joer kënnen zoumaachen, wéi Dir et mam Här Fayot gefrot hutt. Firwat dauert dat sou laang."

Den Yves Cruchten an d'Carole Hartmann hunn op de Koalitiounsaccord verwisen, datt Abuse bei dëse Fonge bannent der Legislaturperiod géifen onméiglech gemaach ginn, ouni awer méi e präzisen zäitleche Kader ze nennen. Fir déi gréng Deputéiert a Parteipresidentin Djuna Bernard mussen awer eenzel steierlech Mesurë séier ëmgesat ginn.

"Fir mech ass et ganz kloer, datt d'FISen, datt d'Stock options, an och eng CO2-Steier, datt déi elo relativ zäitno musse kommen, an ech schwätze vun de kommende Méint."

Den Deputéierte vun de Piraten, Sven Clement, gesäit iwwerdeems eng Léisung, fir ze verhënneren, datt ëmmer nees nei Schlupflächer entstinn, déi mussen zougemaach ginn.

"Mir brauchen e Steiergesetz, dat seet "Mir hunn e Barème, dee gëtt op all Akommes, dat ech verdéngen, egal ob et aus menger Lounaarbecht kënnt, aus Kapitalanlage kënnt, oder aus soss Investissementer kënnt, dat gëtt d'nämmlecht besteiert." Et gëtt alles an een Dëppe gepucht an um Enn vum Joer gëtt dorop e Steiersaz berechent an dee bezuelen ech."
Dee Moment hätt een dem Piratendeputéierten no och Steiergerechtegkeet.

Kloertext :Steier-(On)-Gerechtegkeeten / Resumé Fanny Kinsch

Et hu matdiskutéiert:

Frank Engel

CSV-President

Marc Baum

Deputéierten déi Lenk

Roy Reding

ADR-Deputéierten

Carole Hartmann 

DP-Deputéiert

Djuna Bernard

Presidentin déi gréng

Yves Cruchten

LSAP-President

Sven Clement

Deputéierten-Piraten

De Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)