An der Emissioun Kloertext goung et en Donneschdeg den Owend ëm d'Corona-Kris.

D'Gestioun vun der Corona-Kris war Thema am Kloertext op der Tëlee en Donneschdeg den Owend. Invitéiert waren den Ekonomist Romain Bausch, d'Justizministesch Sam Tanson, de President vun der CSV, de Frank Engel, an de Generalsekretär vun der Horesca, de François Koepp.

Covid-Gestioun / De Reportage vum Fanny Kinsch

D'Restaurateure goufen dës Kéier vun der Regierung besser drop preparéiert, dass si missten zoumaache wéi beim éischte Lockdown, sot de Generalsekretär vun der Horesca, de François Koepp. Et wier awer trotzdeem schlëmm.

"Mir gi jo am Fong eisem Recht privéiert, et ass bal eng Expropriatioun vun Ären Avoiren an Dir däerft näischt domat maachen. An dobäi steet awer "la liberté du commerce et garantie sauf restrictions à établir par la loi" am Grondgesetz. Et steet och dran "l'état garantit le droit au travail", mee dee gëtt eis jo verbueden. An dat si sou Saachen, wann een dat sou liest, dann huet een natierlech e schlecht Nogefill. D'selwecht wéi och do steet, wann ee sengem Recht privéiert gëtt oder senger Proprietéit pour cause d'utilité publique, wat mir jo och da maachen, datt een dann och à juste titre indemniséiert gëtt."

Doriwwer eraus géif et elo och u Previsibilitéit feelen. Der Aschätzung vum Ekonomist Romain Bausch no wier déi 1. Well vun der Pandemie zu Lëtzebuerg gutt geréiert ginn. Déi 2. Well wier awer ganz anescht, se géif vill méi laang daueren.

"Wat feelt, dat ass ee Plang. Dat ass vläicht den Ekonomist, dee schwätzt. Ech fannen, am Fong geholl misst een hei ee Plang hunn, et huet een ee fir d'Schoulen, et huet een ee fir d'Spideeler, mee fir d'Gesamtheet misst een e Plang hunn, wou ee géif soen, hei sinn déi verschidde Stufe vu Moossnamen, hei sinn d'Krittären."

Och den CSV-President Frank Engel huet fir esou e Plang plädéiert. Hien hätt sech verschidde Modeller ugekuckt an do kéint d'Chamber och weider mat agebonne ginn.

"Do gëtt et der, déi eng Kéier aktivéiert ginn an ab dann ass d'Regierung habilitéiert duerch Reglementatioun virzegoen, do gëtt et der awer och déi aktivéiert ginn a bannent deenen et dann awer nees Kompartimenter ginn, déi dann eng parlamentaresch Zoustëmmung brauchen, do kann een also eng ganz Partie Saache maachen, mee elo mol ganz éierlech, ech fannen net, dass et eng terribel Plus-value ass fir d'Lëtzebuerger Parlament, dass et sënngeméiss muss beieneekommen, wa soll decidéiert ginn, datt elo nëmme méi 10, mee 4 Leit an der Gastronomie zesumme kënnen an e Restaurant goen."

De Frank Engel war iwwerdeems der Meenung, datt d'Regierung am Hierscht éischter hätt misse méi streng Mesuren ergräifen - déi gréng Justizministesch Sam Tanson huet dat allerdéngs aneschters gesinn: et dierft een d'Decisioun, Fräiheeten a Rechter anzeschränken, net op d'liicht Schëller huelen. Dofir wier et och wichteg, un de Leit hir Eegeresponsabilitéit z'appelléieren.

"Net fir de Leit ze soen, du bass als eenzele Schold, wann et ausaart oder net, mee well de Konterpart vun der Eegeverantwortung, dat ass, dass mer genee déi Mesuren huelen, dat ass, dass mer déi aschränkend Mesurë mussen huelen, déi iwwerhaapt net an eis Demokratie passen, déi net an eis Rechtsverständnis passen an dofir ass et jo sou wichteg, dass mer probéieren, d'Leit ze responsabiliséieren, dass deen Eenzele matmécht, fir dass mer evitéieren, dass mer mussen déif agräifen an eis Rechter, an eis elementar Rechter."

Souwäit d'Justizministesch Sam Tanson am Kloertext en Donneschdeg den Owend.

D'Invitéen am Iwwerbléck

De Romain Bausch, den Ekonomist, war ënnert anerem Administrateur general am Finanzministère a President vum Verwaltungsrot vun der SES, huet souwuel d'Expertise vum héije Staatsbeamte wéi déi vum Topmanager. Als President vum Conseil National des Finances Publiques befaasst hie sech nach ëmmer intensiv mat de Staatsfinanzen.

D'Sam Tanson, d'Juristin ass net just Justiz-, mee och Kulturministesch a gehéiert zu de wichtegste Politiker vun hirer Partei déi Gréng.

Och de Frank Engel ass vu Formatioun Jurist an zanter Februar 2019 President vun der CSV.

An dem studéierten Hotelier François Koepp, deen als Generalsekretär vun der Horesca sech schonn 11 Joer laang fir d'Intresse vum Secteur asetz.

De Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)