An der Emissioun "Kloertext" goung et en Donneschdeg den Owend ëm d'EU-Sécherheetspolitik an d'Lag no 2 Joerzéngten Afghanistan-Asaz.

De Resumé vum Kloertext vum Dany Rasqué

335 Lëtzebuerger Zaldote waren am Afghanistan am Asaz. Zu Kabul, zu Kandahar, zu Kunduz an zu Masar-e Scharif. En Asaz, deen d'Arméi gepräägt huet, wéi de Generol Steve Thull, de Chef d'Etat Major en Donneschdeg den Owend am Kloertext op der Tëlee sot.

War hiren Asaz an dee vun Dausenden aneren Zaldoten ëmsoss? Dat ass eng Fro, ëm déi et an der Emissioun goung.

Eng schwéier Fro, seet déi Gréng Deputéiert Stéphanie Empain. Si ass Presidentin vun der parlamentarescher Verdeedegungskommissioun a fréier Chargée de Mission vum Etat Major.

"Dat ass eng schwéier Fro, well mer och net genee wëssen, wéi d'Zukunft sech elo entwéckelt. D'Fro, déi dodrun hänkt ass jo och déi, ob et falsch war an den Afghanistan eran ze goen. Ech mengen, datt een déi Fro awer ka mat Nee beäntweren."

Och den ADR-Deputéierten a fréieren Offizéier Fernand Kartheiser ass der Meenung, datt den Asaz am Afghanistan kee Feeler war. Där wiere par conter beim Réckzuch gemaach ginn.

Aus deene Feeler muss een elo léieren.

Notamment, seet de liberalen Europadeputéierten a fréieren Arméi- a Kooperatiounsminister Charel Goerens, datt een eng Transitiounsphas muss virbereeden, wann ee sech zeréckzitt, fir Desaster wéi deen am Afghanistan ze verhënneren.

"Dat wat ganz schlëmm ass, ob kuerz- mëttel- a besonnesch längerfristeg, dat ass, datt ee Vollek nom aneren, wa mer dat do am Widderhuelungsfall nach eng Kéier maachen, d'Gefill kritt, si géife vum Westen abandonéiert ginn. Dat ass ongeféier dee schlëmmste Message, dee mer kënnen hannerloossen."

Eng weider Léier ass fir d'Stéphanie Empain, datt den ziville Volet fir esou Missioune muss gestäerkt ginn. Mat Waffen eleng wier et net méiglech nohaltege Fridden ze schafen. Am Nationbuilding, also am Opbau vun engem Staat, wieren am Afghanistan awer net genuch Efforte gemaach ginn.

Wann een iwwert d'Wäerter schwätzt, déi beim Opbau vun engem Staat mussen am Mëttelpunkt stoen, sinn dat ënnert anerem fir d'Europadeputéiert Isabel Wiseler Lima déi universell Mënscherechter, déi awer net méi iwwerall op der Welt déi selwecht sinn.

"Den Ament si Muechten do, ech nenne ganz kloer China, déi eng ganz aner Attitüd hunn an déi versichen, déi Wäerter, d'Mënscherechter, esou wéi mir se verstinn, ëmzeänneren."

De Generol Steve Thull, de Chef d'Etat Major, ass dovunner iwwerzeegt, datt den Terrorismus eis och an deenen nächste Jore begleet, och onofhängeg vun deem, wat elo am Afghanistan geschitt ass.

Eis Invitéë waren

Steve Thull
Generol
Chef d'Etat-Major vun der Arméi

RTL

Charles Goerens
DP-Europadeputéierten
fréieren Arméi- a Kooperatiounsminister

RTL

Stéphanie Empain
Gréng-Deputéiert
Presidentin Defense-Kommissioun
Fréier Chargée de Mission vum État-Major

RTL

Isabel Wiseler-Lima
CSV-Europadeputéiert
Member Aussepolitik- a Mënscherechtskommissioun

RTL

Fernand Kartheiser
ADR-Deputéierten
Fréieren Offizéier vun der Arméi

RTL

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)