Mat där Fro huet sech och d'Ekipp hannert der Schnëssen-App beschäftegt an d'Äntwert an engem Adventskalenner op infolux.uni.lu verstoppt.

Hutt Dir Iech schonn eng Kéier gefrot, ob Dir beim Bäcker e gefëllten oder e gefëlltene Croissant bestellt?

Bei deene Leit, déi op dës Fro an der Schëssen-App geäntwert hunn, hu sech 57% fir d'Variant mam zousätzlechen "en" entscheet.

Dobäi misst een allerdéngs umierken, datt deen zousätzlechen "en" an de meeschte Fäll net voll ausgeschwat gëtt, ma den "e" verschléckt gëtt. Ausgeschwat géif d'Variant also gefëlltnen, och wann ee gefëlltenen schreift.

Nozeliesen ass dat an engem Online-Adventskalenner. Op der Internetsäit Infolux (infolux.uni.lu) huet nämlech d'Institut fir lëtzebuergesch Sprooch- a Literaturwëssenschaft vun der Uni.lu e sëlleche Resultater aus der App opbereet.

Nach kann ee sech bequem derduerch klicken an entdecken, wat fir Finessen a Varianten et an eiser Sprooch gëtt.

Iwwer d'App

"Schnëssen" ass déi éischt App, fir d'Lëtzebuerger Sprooch vun haut an all hire Facettë mat Toun-Opnamen ze erhiewen an ze dokumentéieren. D'App ass Deel vun engem Projet vum "Institut fir lëtzebuergesch Sprooch- a Literaturwëssenschaft" op der Universitéit Lëtzebuerg. Et geet drëm, d'Lëtzebuerger Sprooch an hirer ganzer Bandbreet, also mat hiren Dialekter, ze erfaassen. D'App ass ganz spilleresch opgebaut, esou geet et zum Beispill drëm ze beschreiwen, wat een op engem Bild gesäit oder eppes ze iwwersetzen. Esou soll gesammelt ginn, wat alles am Lëtzebuergesche virkënnt, e Richteg oder Falsch gëtt et do net, et geet ëm d'Erhiewe vun Daten respektiv Donnéeën, net ëm d'Verbesseren oder d'Virschreiwen. D'Fuerscher wëlle just erausfannen, wéi vill Prozent d'Variant mat s a wéi vill déi ouni s benotzen ... Déi eenzel Äntwerte ginn opgeholl an un d'Uni geschéckt. Dat mécht d'App vum selwen. De Set vu Biller a Froe gouf iwwer de Summer och schonn erweidert.

D'App "Schnëssen – Är Sprooch fir d'Fuerschung" gëtt et fir iOS an Android. Se ass gratis.