A mat der Elmira Najafi huet de Bicherbuttek zanter Kuerzem eng nei Gerante, déi net just fir ee Relook gesuergt huet, mä sech weider engagéiert.

Wéi steet et ëm d'Librairien hei am Land? Wou ginn et der nach a wéi hu se iwwert déi lescht Joren evaluéiert? Ënnert anerem deene Froen gi mer dëse Summer an enger Serie no, an där sech alles ëm eng Partie vun de klenge Librairien hei zu Lëtzebuerg dréint. Mir huelen Iech mat a verschidde Bicherbutteker uechtert d'Land, weisen Iech, wat se ze bidden hunn a wat se vun aneren ënnerscheet.

Serie Librairien: Alinea

VIDEO: Serie Librairien (1): Den Alinea an der Beaumontsgaass
Wéi steet et ëm d'Librairien hei am Land? Eng, déi schonn zanter 1995 besteet, ass den Alinea an der Beaumontsgaass.

Den Alinea an der Beaumontsgaass gëtt et zanter 1995. Mam Elmira Najafi huet de Bicherbuttek an der Stad allerdéngs eng nei Gerante. Nieft engem neie Look versicht déi 35 Joer al gebierteg Iranerin och mat Concerten oder anere kulturellen Eventer, en neie Public unzezéien an och der Stammclientèle vun der Stater Libraire Neies ze bidden.

Déi nei Responsabel ass houfreg op de gudde Kontakt mat de Clienten an den Austausch, an mécht sech dofir och net weider Suergen iwwert d'Ouverture vun der FNAC Enn dës Joers.

Serie Librairien: Thema Online-Verkaf

D'Claudia Kollwelter war de Bols bei eng Partie vun de klenge Bicherbutteker uechtert d'Land fillen a wollt virop wëssen a wéi wäit den Online-Verkaf vu Bicher fir d'Librairen en Thema ass.

AUDIO: Serie Librairien (1): Online Verkaf / Claudia Kollwelter

Fir déi eng ass en net méi ewech ze denken, fir déi aner kann e mam reelle Buttek net mathalen - den Online-Verkaf gesi souwuel d'Clienten, wéi och d'Verkeefer gespléckt. An sou ass et och am Beräich vun de Bicher. Dem Anne Diderich vun der Librarie Diderich zu Esch no ass den Internet sécherlech eng Konkurrenz:

© Screenshot / Pierre-Marie Koch

"Mee ech denke mer, datt dat Gefill an dat Liewen, dat een huet, wann een an e Bicherbuttek erageet, eben eemoleg ass. Fir de Kontakt mam Client ze hunn, wëlle mir weisen, datt de Bicherbuttek e kulturellt Gutt ass a méi derhannert stécht. An datt een do Saache gesäit, wéi e Buch, en Titel oder och vläicht nach dat eent oder anert gesäit, un dat een net geduecht huet."

Déi nei Gerante vum Alinea an der Stad, d'Elmira Najafi gesäit dat ähnlech. Et hätt een zwar selwer en Internetsite awer keen Online-Shop - heescht: et kann ee per Email e Buch bestellen an an de Buttek siche kommen. D'Atmosphär vun der Libraire wier immens wichteg:

© Screenshot / Pierre-Marie Koch

"'t ass wichteg, datt de Client erakënnt an ee gesäit, wéi e sech hei fillt an einfach de richtege Feeling kritt. An dat kann Amazon, grad esou aner grouss Chaînen einfach net ubidden. Dofir hoffen ech einfach, datt dat Gefill bei de Cliente weider wäert geschätzt gëtt an datt se eis trei bleiwen. Amazon ass do, ech kann dat net änneren a wëll et och guer net änneren, mee et gi Saachen, an deene mir nach ëmmer besser si wéi Amazon. Wat Geschwindegkeet ugeet fir verschidde Bicher ze kréien, datt hu mir bannent Stonnen, an dat kann Amazon net ubidden."

Och am Bicherhaischen zu Nidderaanwen gëtt et bewosst keen Online-Shop, well ee wëll, datt d'Leit d'Bicherwelt sur place entdecken an net virtuell. Vue datt d'Laurence Hilger sech op Kanner- a Jugendbicher spezialiséiert huet, wier dat an hiren Aen och vläicht méi einfach:

© Screenshot / Pierre-Marie Koch

"D'Leit wëllen hir Kanner vum iPad ewech kréien, kommen gären an e Buttek a wëllen, datt hir Kanner hei e bëssen "stöberen". Zemools bei de Kannerbicher ass et wichteg, eng Kéier an d'Buch eranzekucken, et an der Hand ze hunn, ze kucke wéi grouss et ass - dat gesäit een dacks um Internet net - ob d'Zeechnungen engem gefalen, wéi d'Textur ass, wat fir eng Déckt Säiten et sinn."

Internetsite jo, Online-Verkaf nee - dat schéngt bei de klenge Librairien allgemeng d'Astellung ze sinn. Et wëll een dem Client entgéintkommen, andeems dëse via Internet oder Email bestelle kann, mee en trotzdeem am Buttek empfänken, fir de Kontakt an den Echange weider oprecht ze erhalen an domat och d'Zukunft vun de Bicherbutteker.

Summer ArtBox - Serie Librairien

Weidere Verlaf

10/08: ChrisTina’s Bicherbuttik

17/08: Librairie Diderich

24/08: De Bicherkueb

31/08: D’Bicherhaischen

07/09: Libraire Zimmer