De Line-up steet fest mat 10 internationalen DJen
© Arthur Ranzy
Nom Succès uganks Mee zu Esch steet den zweeten Deel vum Festival um Kierchbierg scho quasi an de Startlächer.
Den 8. an 9. September ass de Saisonschluss vum LOA-Festival, wéi gewinnt op der Place de l'Europe. D'Organisateure freeë sech ganz besonnesch, elo schonn de Line-up kënnen ze presentéieren, nodeems den Opening zu Esch iwwer 12.000 Visiteure passéiert sinn. Am Verglach zum LOA Esch 2022 ass et e Plus vu 50 Prozent.
Fir de Schluss ginn dann nach emol 10 international DJen an eng Abberzuel lokal Kënschtler op der Bün erwaart a loosse keen elektronesche Musekswonsch aus. Headliner sinn Castion, Coone, Danny Avila, Glockenbach, JVRDY, Nervo, Pajane, Sam Feldt, SLVR an W&W.
Wéi et vun den Organisateuren heescht, wäerten am September fir eng éischte Kéier mat Coone och Hardstyle a mat Danny Avila Techno op der Mainstage integréiert ginn. Domat wier dann och e weidere Schratt an der Pionéierroll vun dësem Festival gemaach.
Um Festival-Terrain um Kierchbierg fënnt ee wéi dat Joer virdrun och nees eng grouss Auswiel u Baren, eng Chill Out Area, e Food Village, souwéi verschidden Animatiounen an aner Iwwerraschungen. Wéi gewinnt gëtt och nees Wäert op Nohaltegkeet geluecht an zesumme mat de Mobilitéitspartner CFL a LuxTram goufen erweidert Fuerpläng ausgeschafft fir e besseren Accès.
Tickete kritt ee wéi gewinnt op www.loa.lu, den Entrée fir Kanner ënner 12 Joer ass dann och nees gratis.
