Eng Fernbezéiung ass schwéier. Zemools elo an der Corona-Kris ass d'Distanz ëmsou méi grouss, wann een a verschiddene Länner wunnt an d'Grenzen zou sinn.

An der EU ginn d'Grenzen esou lues op, wann och mat Restriktiounen. Ma wann ee méi wäit reese wëll, da bleiwe se dacks zou. Fir onbestuete Koppelen, déi op zwee ënnerschiddleche Kontinenter oder a verschiddene Länner wunnen, ass dëst ganz schwéier. Wéinst der Corona-Pandemie gesi si sech zënter Méint net méi.

Leit aus engem Net-EU-Staat kënne bis ewell nach net areesen, fir hir Partnerin oder hire Partner ze gesinn, wann d'Koppel net bestuet ass. Dogéint protestéieren elo vill Leit, dorënner och Politiker, mam Hashtag #LoveIsNotTourism (Léift ass keen Tourismus) op de soziale Medien. Et solle besser Richtlinnen ausgeschafft ginn, fir datt och onbestuete Koppele sech trotz sanitär Kris kënne gesinn.

Bis ewell funktionéiert dat just an Dänemark, Éisträich an Tschechien. Do kënne Partner areesen, wann eng Bezéiung nogewise ka ginn a wann ee Corona-Test negativ ass oder si musse fir 14 Deeg a Quarantän. An anere Länner gëllt nach ëmmer d'Reegel, datt Leit aus Net-EU-Staaten net areesen dierfen.