2019 huet Citroën nach emol Ulaf geholl an elo, trotz Kris, e Pak nei Modeller lancéiert.

Méi Elektromobilitéit

Zwar huet Citroën mam C-Zéro schonn ee vollelektresche Modell an der Gamm gehat, mam Lancement vum neien C4 kënnt mam ë-C4 elo een neien Elektro-Vertrieder derbäi. Den ë-C4 iwwerhëlt den Undriff vun de PSA-Bridder Peugeot e-208 an Opel Corsa e: een 100 kW-Motor mat duerchaus brauchbaren 350 km Autonomie. Mam Design vum neien C4 traut sech Citroën un eng Mëschung aus kompaktem Hatchback an SUV mat e puer Reminiszenzen u fréier Modeller.

Och den Topmodell gëtt ënner Stroum gesat; den SUV C5 Aircross Hybrid koppelt een 180 PS PureTech-Bensinner mat engem 80kW-E-Motor a ka 55 km reng elektresch fueren. Bei de Minivans fiert den ë-SpaceTourer elo voll elektresch. Bis zu 7 oder 8 Leit passen eran, ënnert dem Blech stécht en Elektromotor mat 100 kW a maximal 330 km Autonomie.

E bësse méi skurril a leider net um Festival ze gesinn ass deen neien AMI. D’Äntwert vu Citroën op de Renault Twizy ass ee minimalistesch klengen Elektro-Stadtauto; en huet 2 Sëtzplazen, ass ultrakompakt, packt 75 km a ka scho mat 16 Joer gefuer ginn.

Opgefrëscht

Last but not least gëtt den C3 moderniséiert. No 4 Joer gëtt den Design der Gamm ugepasst, eng Hellewull u Faarf- an Equipements-Kombinatiounen souwéi eng Portioun méi Confort spendéiert.