An Italien goufen 10 Doudeger duerch de Coronavirus gemellt, op d'mannst 322 Persounen hu sech bis ewell mam neie Virus infizéiert.

D'Regierung an Éisträich huet en Dënschdeg déi éischte Coronavirus-Fäll gemellt. Zwou Persounen am Bundesland Tirol hunn sech mam Virus ugestach, dat mellt d'Landessanitätsbehörde. Donieft gouf en Hotel zu Innsbruck vun den Autoritéiten zougemaach. Eng Infizéiert soll nämlech do schaffen.

Och a Kroatien gouf elo deen éischte Fall confirméiert, esou de Ministerpresident Plenkovic. En Dënschdeg am Nomëtteg koum dunn d'Matdeelung, dass et en éischte Fall an der Schwäiz gëtt.

Positiv getest op de Coronavirus gouf och den iranesche Gesondheetsminister Iraj Harirchi. Am Ganze goufe scho 95 Fäll am Iran gemellt.

A Frankräich sinn en Dënschdeg am fréien Owend elo zwee nei Coronavirus-Fäll gemellt ginn. Dem zweete Mann am franséische Gesondheetsministère no stellt den Zoustand vun deenen zwou Persounen awer kee Grond zur Suerg duer. Dat eent ass eng jonk Chinesin, déi de 7. Februar aus China erëmkoum an där et ganz gutt geet, dat anert e franséische Mann, deen an der norditalienescher Regioun Lombardei war an de Moment an engem Spidol ass.

Am Bundesland Baden-Württemberg gouf en Dënschdeg am Owend den 1. confirméierte Coronavirus-Fall an Däitschland enregistréiert. De jonke Mann aus der Géigend vu Göppingen huet sech wuel bei enger Rees an Italien zu Mailand ugestach. Kuerz drop koum d'Nouvelle, dass och am Bundesland Nordrhein-Westfalen eng Persoun infizéiert ass: Si kéim elo an d'Uniklinik op Düsseldorf, huet et geheescht.

Situatioun an Italien

Déi 11 Stied an Norditalien bleiwe weider ënner Quarantän. Zu Roum ass dowéinst en Dënschdeg och eng Krisereunioun vun der Regierung. D'Gesondheetsministeren aus den Nopeschlänner sinn invitéiert. Et geet drëms, gemeinsam Mesuren ze decidéieren. Wéi d'Regierung vum italienesche Gesondheetsminister Roberto Speranza matdeelt, bleiwen Grenzen zu Italien fir den Ament weiderhin op.

Fir d'Verbreedung vum Coronavirus an Italien mécht den italienesche Premier ee Spidol am Norde vum Land responsabel. Den Giuseppe Conti sot op der Tëlee, datt d'Direktioun vun deem Spidol dem Protokoll net gefollegt hätt. Hien huet awer kee Spidol mam Numm genannt.

Tëscht Freideg an en Dënschdeg ass d'Zuel vun infizéierte Patienten an Italien vu 6 op 322 geklommen. D'Situatioun huet sech en Dënschdeg awer stabiliséiert mat just 10 neie Fäll, déi gemellt goufen. 10 Mënschen sinn an Italien wéinst dem Virus gestuerwen.

D'Weltgesondheetsorganisatioun WHO huet an der Nuecht op en Dënschdeg virun enger Pandemie gewarnt. A China hätt de Virus zwar scho säin Héichpunkt erreecht, ma déi vill Infektiounsfäll an Italien, awer och am Iran oder Südkorea maache Suergen.

Keng Panik zu Lëtzebuerg

Hei am Land bleift de Mot d’ordre: "Keng Panik". De Gesondheetsministère hält d'Situatioun genee am A. D'Land wier gutt op de Coronavirus preparéiert. D'Santé hat jo e Méindeg op eng Pressekonferenz invitéiert.

Coronavirus: Pressekonferenz Santé/Detailer Monica Camposeo

Et ass awer net ausgeschloss, datt geschwënn nei Recommandatioune kommen fir Leit, déi an déi betraffe Géigende reese wëllen oder vun do zeréckkommen. Den Ausseministère huet en Dënschdeg de Moie just recommandéiert, datt wann een net muss an déi betraffe Géigende reesen, een driwwer kéint nodenken déi Rees ze verleeën.

Restriktiounen, och wat d'Arrivéeën aus Italien ugeet, ginn et nach keng. Och hei bleift een a Kontakt mat den italieneschen Autoritéiten, mat der Weltgesondheetsorganisatioun, mat der EU-Kommissioun a mam europäeschen Zenter fir d'Preventioun a Kontroll vu Krankheeten.

Schreiwes vum Gouvernement

Situation du COVID-19 en Italie (25.02.2020)
Communiqué par: ministère des Affaires étrangères et européennes

Les autorités luxembourgeoises suivent de près l'évolution de la situation en Italie du Nord et prendront les mesures qui s'imposent à la lumière des analyses effectuées par l'OMS Europe, le Health Security Committee de la Commission européenne et le European Center for Disease Contrôle and Prevention (ECDC) qui travaillent en étroite collaboration avec les autorités sanitaires italiennes.

À ce stade, il n'y a pas de recommandations spécifiques de la part de ces instances compétentes pour ce qui est des voyageurs en provenance de/à destination des régions italiennes concernées (communes de Codogno, Casalpusterlengo, Castiglione d'Adda, Maleo, Fombio, Bertonico, Castelgerundo, Somaglia, San Fiorano, Terranova dei Passerini, Vo Euganeo, Crema, Bergamo). Un report des déplacements non-essentiels vers ces régions devrait toutefois être envisagé.

Tout citoyen, sauf ceux se trouvant dans les zones soumises à une restriction de circulation, peut à tout moment quitter l'Italie. À ce stade, il n'y a donc pas lieu d'envisager des mesures de rapatriement particulières et extraordinaires. Les autorités luxembourgeoises sont en contact régulier avec les autorités italiennes et prendront les mesures adéquates en fonction de l'évolution de la situation et dans le respect du principe de précaution.

Au Luxembourg, on n'est en présence d'aucun cas de COVID-19. Le niveau d'alerte est maintenu inchangé. Les procédures en vigueur ainsi que les recommandations aux voyageurs peuvent être consultées sur le portail santé et seront tenues régulièrement à jour en fonction de l'évolution de l'épidémie au niveau mondial.

Dëschtennis-WM a Südkorea verréckelt

Wéinst dem Ausbreede vum Coronavirus a Südkorea, gouf decidéiert d'Dëschtennis-WM ze verleeën. Dat huet de Weltverband ITTF en Dënschdeg annoncéiert. Geplangt war den Evenement tëscht dem 22. an dem 29. Mäerz zu Busan. D'WM soll elo tëscht dem 21. an dem 28. Juni sinn.

A Südkorea war schonn den Optakt vun der Futtball-K-League verréckelt ginn, grad wéi am Volleyball, Basket an Handball. Iwwerall op der Welt goufen änlech Mesure getraff. An Italien goufen e puer Futtball-Matcher an der Serie A ouni Public ausgedroen.