Beim presuméierte Chauffeur handelt et sech ëm een 51 Joer ale Mann aus dem Krees Tréier-Saarburg. De Mann war bei der Dot staark alkoholiséiert.

Et war géint 14 Auer en Dënschdeg de Mëtteg wéi en SUV mat héijer Vitesse matten duerch d'Tréierer Foussgängerzon (eng Stréck vun e puer Honnert Meter) gefuer ass a Leit iwwerrannt huet.

Den Inneminister aus Rheinland-Pfalz Roger Lewentz huet op enger Pressekonferenz en Dënschdeg den Owend matgedeelt, datt 4 Persounen ëm d'Liewe komm sinn. Ënnert den Affer ass e Puppelche vun 9 Wochen, de 45 Joer ale Papp vum Kand an zwou Frae vu 25 respektiv 73 Joer. Méi spéit am Owend koumt d'Noriicht, datt de Bilan vun den Doudesaffer op 5 geklommen ass. Eng 52 Joer al Fra ass an der Klinick un hire Blessure gestuerwen. D‘Doudesaffer kommen alleguer vun Tréier.

D‘Police hat an engem éischte Bilan den Alter vum Kand mat 9 Méint uginn, ma dëse gouf méi spéit no ënne korrigéiert. D‘Mamm vum Puppelchen an nach een 1,5 Joer ale Jong vun der Famill goufe beim Tëschefall blesséiert.

Am Ganze goufen 3 Persoune ganz uerg blesséiert, et gi 5 schwéier Blesséierter a 6 liicht Blesséierter. Zwou Dose Persoune sinn traumatiséiert. Alles Leit, déi tëscht der Porta-Nigra an dem Hauptmarkt ënnerwee waren.

1 Lëtzebuerger ënnert de Blesséierten

RTL Informatiounen no, ass ënnert den 14 Blesséierten no der Amokfaart zu Tréier och e Lëtzebuerger, deen en Dënschdeg matten an der Tréierer Akafsstrooss vum schëllege Chauffer ugestouss gouf.

De Mann läit mëttlerweil an engem Spidol zu Lëtzebuerg a gëtt do mat liichte Blessuren soignéiert.

D’Nouvelle gouf eis vum Lëtzebuerger Ausseministère confirméiert.

De presuméierten Täter ass een 51 Joer ale gebiertegen Tréierer, deen net virbestrooft war. Géint hie gëtt wéinst 4 Fäll vu Mord a geféierlecher Kierperverletzung an enger Rei weidere Fäll ermëttelt, esou de Procureur Peter Fritzen op enger Pressekonferenz en Dënschdeg den Owend. D'Motiv wier bis ewell onkloer.

"Wir haben aber keine Anhaltspunkte dafür, dass irgendwie ein terroristesch geartetes Motiv, ein politisches Motiv oder ein religiöses Motiv eine Rolle gespielt haben können. Es gibt Anhaltspunkte dafür, dass es möglicherweise ein psychiatrisches Krankheitsbild gibt."

Den Täter wier och staark alkoholiséiert gewiescht. E Mëttwoch de Mëtteg soll hie virun den Untersuchungsriichter kommen an duerno entweder an de Prisong oder an eng zoue Psychiatrie, sollt dee Verdacht sech confirméieren.

De Mann huet déi lescht Deeg net an enger Wunneng verbruecht, ma huet am Auto gelieft, sou nach d'Police.

De Chauffer war vun der Police ganz séier no senger Amokfaart aus dem Auto eraus festgeholl ginn.

D'Autoritéite ginn aktuell dovunner aus, datt de presuméierten Täter mam Auto, deen enger anerer Persoun gehéiert huet, am Zickzack duerch d'Foussgängerzon gefuer ass.

Streck vun der Amokfaart. / © Ryck Thill / RTL Télé Lëtzebuerg

Extrait: Polizist Dieter Ankner beschreift Verlaf vun der Amokfaart

Den Inneminister aus Rheinland-Pfalz, Roger Lewentz, hat an engem éischte Statement iwwert d'traumatiséiert Anzéien, Secouristen a Poliziste geschwat.

Extrait Inneminister Roger Lewentz

D'Ministerpresidentin vu Rheinland-Pfalz Malu Dreyer war dann och op Tréier komm an huet sech entsat iwwert dës grujeleg Dot gewisen.

Extrait Ministerpresidentin Malu Dreyer

Den Zentrum vun Tréier gouf no der Dot komplett gespaart. D'Spueresécherung huet bis an de spéiden Dënschdegowend era gedauert.

Géint 15 Auer gouf vun der Police gemellt, datt d'Gefor eriwwer wier - Nouvellen, déi kuerzzäiteg zirkuléiert sinn, datt méi Leit am Auto gewiescht wieren respektiv vu Flucht a Schéissereien hunn net gestëmmt.

Butteker a Schoule waren direkt no der Dot zougemaach ginn.

Betraffenheet no der Amokfaart

De Lëtzebuerger Premier Xavier Bettel huet sech op Twitter schockéiert an zudéifst betraff vum Tëschefall zu Tréier gewisen.

En Dënschdeg den Owend huet de Grand-Duc de Famille vun den Affer säi Bäileed an engem Kondolenz-Schreiwes ausgedréckt.

Och déi däitsch Regierung huet iwwer Twitter op den déidlechen Tëschefall reagéiert.

D'Gemeng Biissen huet mat enger Projektioun hir Betraffenheet mat den Affer gewisen. / © David Winter / RTL

Replay vun der Pressekonferenz

Lëtzebuerger Rettungsekippen am Asaz

Och zwee Lëtzebuerger Rettungshelikoptere vun der LAR waren am Asaz, fir Blesséierter an d'Spideeler ze fléien. Donieft huet de CGDIS medezinesch mat 4 Ambulanzen, engem Samu an 2 Leit um Terrain gehollef. Och déi disponibel Kapazitéite vun de Lëtzebuerger Spideeler goufe gepréift, fir eventuell Blesséierter kënnen opzehuelen.

Stad Lëtzebuerg reagéiert op Tëschefall zu Tréier

Nom Tëschefall zu Tréier huet d'Stad Lëtzebuerg decidéiert, d'Agäng vun der Foussgängerzon mat Bëtongsbléck ofzesécheren. Dës goufe bestallt a wäerten dann e Mëttwoch opgestallt ginn.

Och op der Grenz tëscht Däitschland a Lëtzebuerg sinn den Ament zivil an offiziell Police-Patrullen. Dëst déngt natierlech der Protektioun vun der Grenz.

Déi aktuell Informatioune vun der Police iwwer Twitter