An den USA soll et a 6 Fäll 2 Wochen nom Sprëtze vum Vaccin vun Johnson&Johnson zu Thrombose komm sinn.

Déi Betraffe si Fraen am Alter tëscht 18 an 48 Joer. Offiziellen Informatiounen no ass eng Fra gestuerwen, eng zweet soll zu Nebraska a kriteschem Zoustand an d'Klinick ageliwwert gi sinn. D'Gesondheetsautoritéite fuerderen de Stopp vum Impfstoff an allen US-Bundesstaaten, bis d'Sécherheet ënnersicht ginn ass. Eng Enquête ass amgaangen. Sou laang soll keen Johnson&Johnson gesprëtzt ginn, seet déi amerikanesch Medikamentenagence FDA.

Zu Lëtzebuerg sinn e Méindeg 2.400 Dosisse vum Johnson&Johnson-Vaccin ukomm. Dat hat de Gesondheetsministère de Kolleege vu 5minutes.rtl.lu géintiwwer confirméiert.

Den US-Pharmakonzern Johnson&Johnson huet elo selwer och reagéiert an den EU-Start vu sengem Vaccin bis op Weideres ausgesat. D'Liwwerung vum Impfstoff an Europa gëtt deemno elo mol verluecht.

Wat déi nei Entwécklungen ugeet, sou waart d'Santé zu Lëtzebuerg RTL-Informatiounen no elo mol d'Reaktioun vun der Ema of.

Op EU-Niveau géif och gekuckt ginn, ob de scho geliwwerten Impfstoff ka benotzt ginn.