E Méindeg wëll de Wirtschaftsminister a Vizepremier Etienne Schneider iwwert seng Zukunft schwätzen, dat op enger Pressekonferenz.

En Donneschdegowend hat den Ausseminister Jean Asselborn am RTL-Interview jo gemengt, datt nach virun de Chrëschtdeeg eng Decisioun sollt falen, wéini den Etienne Schneider säi Poste verléisst, fir datt d'LSAP seng Nofolleg plange kann. De Lëtzebuerger Ausseminister huet domadder gewëssermoossen mat der Fauscht op den Dësch geschloen.

De Vizepremier a Wirtschaftsminister Etienne Schneider hat jo viru Woche schonn ugekënnegt, hie géif seng Mandater néierleeën. Wéini, doriwwer hat hien d'Partei an d'Land awer bis ewell am Onklore gelooss. Wat zu Ongewëssheeten a Spekulatiounen iwwer seng Successeure gefouert hat. Iwwerdeems d'Reaktioun vum Concernéierte selwer net laang op sech waarde gelooss huet. En Donneschdeg den Owend spéit nach hat den Etienne Schneider an engem Radiosinterview op d’Aussoe vu sengem Parteikolleeg Jean Asselborn reagéiert.

Den Etienne Schneider: "Also den Här Asselborn ass jo bei wäitem deen eelste Member an der Regierung an dofir sinn natierlech seng gutt Rotschléi mer ganz wichteg. Et ass awer allerdéngs esou, datt wann den Här Asselborn de Mëtteg (Donneschdeg) an enger parteiinterner Reunioun gewiescht wier, wou ech annoncéiert hunn, datt ech e Méindeg eng Pressekonferenz géing maachen, fir ze erklären, wéi dat elo geet, dann hätt en den Owend (Donneschdeg) an där Emissioun dat kéinte soen - dat huet en net gemaach. Mä gutt, e Méindeg wäert ech eng Pressekonferenz maachen an dann dozou Stellung huelen."

E Méindeg soll een da gewuer ginn, wéi et mat him weider soll goen. Méi wollt den Etienne Schneider allerdéngs en Donneschdeg no der leschter Chambersëtzung vun dësem Joer net verroden.

Erstaunlech ass et jo schonn, dass den Ausseminister säi Parteikolleeg Etienne Schneider iwwer d’Medien opfuerdert, Kloerheet iwwer säin Depart ze verschafen.

Déi parteiintern Kommunikatioun schéngt deemno net déi bescht ze sinn. Zu der Konklusioun koum och de Laurent Mosar, dee jo dës Woch an der Chamber den Etienne Schneider schonn opgefuerdert hat, transparent iwwer seng Zukunft ze kommunikéieren.

De Laurent Mosar: "Also dat ass dat mannst wat ee ka soen. Ech hat souwisou d’Gefill wéi ech meng Interventioun an der Chamber gemnaach hunn, datt wann ech meng sozialistesch Kollege gekuckt hunn, déi hunn eigentlech net onzefridden ausgesinn, wéi ech dat gesot hunn."

No der Chamberkommissioun e Freideg de Mëtteg huet de Fraktiounspresident Alex Bodry mat dëse Wierder op d'Evenementer aus de leschte Stonne reagéiert:

Extrait Alex Bodry

Den Alex Bodry: "Dat ganzt ass fir mech onglécklech. Fir mech ass wichteg, dass et zu enger Decisioun komm ass, beim Etienne Schneider selwer. Et ass heen eleng, deen déi Decisioun do geholl huet. Et ass keen, deen hee gefrot huet, aus der Regierung erauszegoen. Et ass seng eegen Decisioun, déi huet hien definitiv geholl an de Méindeg mécht hien eng Pressekonferenz. An da lafe bei eis déi intern Prozeduren, wat normal ass beim Remplacement vun engem Regierungsmember. Dat heescht da kënnt d'Parteileitung zesummen, fir eng Propositioun ze maachen. An am Endeffekt ass et e Gremium, dat nennt sech bei eis e Generolrot, dat ass e klenge Kongress. 90 Leit sinn do Member an déi hunn dann definitiv d'Decisioun iwwer déi Persounefro."

D’LSAP-Parteispëtzt iwwerdeems, de President Franz Fayot an de Generalsekretär Tom Jungen, waren net bereet Stellung zur aktueller Situatioun ze huelen.

Den Depart vum Etienne Schneider bedeit op en Neits e Remaniement vun der Regierung. Mat der Ekonomie an der Gesondheet mussen zwee wichteg Ressorten een neie Chef kréien. Et muss een neie Vizepremier definéiert ginn. Ma och hei wollt kee sech äusseren. Weder de Premier Xavier Bettel, nach den Etienne Schneider stounge fir en Interview e Freideg zur Verfügung.

Tëscheruff vum Dany Rasqué: Näischt soen, ass och eppes gesot

En Tëscheruff vum Dany Rasqué iwwert d'Gedeessems bei de Sozialisten.