Zweete personelle Changement en Dënschdeg an der Regierung Bettel Zwee, déi de 5. Dezember 2018 hiren Eed ofgeluecht huet.

AUDIO: Passatioun Etienne Schneider (Deel 1)

Nom krankheetsbedéngte Remaniement vum Félix Braz, deen duerch d'Sam Tanson an der Justiz ersat gouf, huet en Dënschdeg op eegen Demande den Etienne Schneider d'Regierung verlooss. Domat geet och ee vun deene Politiker, déi 2013 un der Wéi vun der Dräierkoalitioun stoungen. Den LSAP-Zentrums-Politiker hält als Wirtschafts- a Gesondheetsminister op, hie war och Vizepremier.

Den Dënschdeg de Mëtteg um 14 Auer hat den Etienne Schneider Rendez-vous beim Grand-Duc am Palais, fir säin Demissiouns-Schreiwes ofzeginn. Direkt dono um 14.30 Auer gouf de Franz Fayot als neie Regierungsmember vum Staatschef vereedegt. Den Etienne Schneider huet säi Successeur op seng eege Manéier virgestallt:

Ech wëll Iech dofir och ganz offiziell de Franz Fayot virstellen. Ech mengen, ech brauch et net, well Dir kennt en alleguer. Dir sidd déi éischt, déi natierlech interesséiert waren, wéi ech gesot hunn, ech géif goen, fir ze wëssen: Wien kënnt dann elo? Dir hutt warscheinlech alles gelies a probéiert, alles erauszefannen iwwert dee Mann. Gleeft mer, villes wat der liest stëmmt net. Ech weess dat aus eegener Erfarung. Oft si positiv Saachen iwwert mech gezielt ginn, déi guer net wouer waren. Dofir, och beim Franz, musst Dir einfach emol d'Presomption d'innocence geltend maachen an him eng Chance ginn, fir eran ze kommen an deen heite Ministère.

Dëse Franz Fayot gëtt zoustänneg fir d'Ekonomie a fir d'Kooperatioun, also d'Entwécklungshëllef. De Gesondheetsressort iwwerhëlt d'Paulette Lenert. Den Dan Kersch gëtt neie Vizepremier.

Och an de Ministèrë sinn ewell en Dënschdeg d'Passations des Pouvoirs: an der Santé an der Villa Louvigny hat den Etienne Schneider um 15.30 Auer d'Schlësselen iwwerginn, eng Stonn drop war dës Zeremonie tëscht de Parteikolleege Schneider a Fayot am Wirtschaftsministère.

Well de Franz Fayot de Statuten no net méi kann LSAP-President bleiwen, muss op engem Kongress nei gewielt ginn, bis dato huet just d'Deputéiert Francine Closener Interessi fir dës Charge gewisen.

AUDIO: Passatioun Etienne Schneider (Deel 2)

En Dënschdeg dann ass d'Passation des Pouvoirs am Ministère vun der Kooperatioun.

D'Vereedegung vum Franz Fayot war en Dënschdeg net déi eenzeg. An der Chamber gouf nom Doud vum DP-Fraktiounschef Eugène Berger de Pim Knaff, Affekot an Escher Schäffen, assermentéiert.

© Chambre des Députés

Den Dënschdeg de Moie koum och d'liberal Fraktioun beieneen, fir en neie Fraktiounspresident ze bestëmmen, de Gilles Baum. De Schäffe vu Lënster mécht aktuell schonn den Interim als DP-Fraktiounschef a sollt souwisou d'nächst Joer déi Plaz iwwerhuelen.

Zweet Assermentatioun en Dënschdeg am Nomëtteg um Krautmaart mam Comeback vun der Sozialistin Cécile Hemmen. Déi fréier Buergermeeschtesch vu Weiler zum Tuerm réckelt als LSAP-Fënneftgewielt am Zentrum fir de Franz Fayot no.

© Chambre des Députés

Franz Fayot Invité am Journal

Skepsis schléit dem neie Minister awer grad vun de Betriber entgéint. En Dënschdeg den Owend am Journal huet den neie Minister ugedeit, wéi hien d'Wirtschaft am Land déi nächst Joren upake wëll an och a Saache Google a Space Mining Stellung geholl.

AUDIO: Franz Fayot / Rep. Raphaëlle Dickes (5.2.2020)

E Legos Raumschëff krut de Franz Fayot en Dënschdeg vum Etienne Schneider iwwerreecht. Als Symbol vum Space Secteur, dem fréiere Wirtschaftsminister säi Bëbee souzesoen. E Projet, un deen och säi Successeur gleeft. De Franz Fayot war an der Chamber ëmmerhi Rapporter vum Gesetz iwwer d’Exploitatioun vu Ressourcen aus dem Weltraum.

"Et ass e Secteur, deen d’Leit dreemen deet. Deen och mat de Jonke schwätzt an ech menge schon, dass dat e Secteur ass, deen interessant ass an deen ech wëlles hunn auszebauen.", sot de Franz Fayot.

De Projet vu Google, en Datenzenter zu Biissen opzemaachen, wär wichteg, fir den digitale Standuert Lëtzebuerg ze entwéckelen, esou de Franz Fayot. Deen awer eng Intransparenz vu Google bedauert. Sollt de Projet awer all d’Normen a Reegelen erfëllen, géif näischt dogéint schwätzen, fir e weiderzeféieren.

"Ech ka just der Welt vun den Entreprisë garantéieren, dass ech wäert an hirem Sënn schaffen, fir hir Aktivitéite mat ze entwéckelen."

Hie géif e „wirtschaftssoziale Wirtschaftsminister“ ginn.

"Fir mech ass d’Wirtschaft kee Selbstzweck, mä eppes, wat mir maachen am Interêt vun de Mënschen hei zu Lëtzebuerg, am Interêt vun der Gesellschaft. Natierlech mécht een dat zesumme mat de Betriber, soss hätt ech dat Amt hei net ugeholl, wann ech kee Frënd vun de Betriber wär", esou de Franz Fayot.

Den neie Wirtschaftsminister, dee sech an der Vergaangenheet éischter kritesch géigeniwwer dem Wuesstem geäussert hat, huet ënnerstrach, hie wär net géint d’Croissance, mä et misst ee kucken, wéi eng Qualitéit vu Wuesstem een erreeche wéilt.

Hei d'Schreiwes

Remaniement gouvernemental (04.02.2020)

Communiqué par: Service information et presse du gouvernement

Le Premier ministre, ministre d'État, Xavier Bettel, informe que cet après-midi Son Altesse Royale le Grand-Duc a donné démission honorable, sur sa demande, à Étienne Schneider, Vice-Premier ministre, ministre de l'Économie, ministre de la Santé.

Franz Fayot a été assermenté en tant que nouveau membre du gouvernement. Il a été nommé ministre de la Coopération et de l'Action humanitaire et ministre de l'Économie.

Dan Kersch, ministre des Sports, ministre du Travail, de l'Emploi et de l'Économie sociale et solidaire, a été nommé Vice-Premier ministre, en gardant ses portefeuilles ministériels.

Paulette Lenert, ministre de la Coopération et de l'Action humanitaire, ministre de la Protection des consommateurs, a été nommée ministre de la Santé et ministre déléguée à la Sécurité sociale, en gardant son portefeuille de ministre de la Protection des consommateurs.