An der Nuecht op e Méindeg um 1 Auer gëtt et eng Alerte Rouge, déi bis moies 9 Auer geet.

Meteolux-Warnung + CGDIS

Meteolux huet eng Alerte Orange wéinst Stuerm erausgi fir e Sonndeg vun 13 Auer bis an d'Nuecht eran. An der Nuecht op e Méindeg um 1 Auer gëtt et dann eng Alerte Rouge, déi bis moies 9 Auer geet.

Nieft der Alerte Orange/Rouge wéinst dem Stuerm, gëtt et awer och nach eng Alerte Jaune wéinst dem Reen, deen erofkomme soll. Et rechent ee mat 20 bis 30 Liter pro m².

Et bléist scho gutt zu Heischent
Dëst ass onkommentéiert Filmmaterial.

Keen Tornado

Mam Tornado vu Péiteng ass iwwerdeem den Orkan net ze vergläichen - dëse war lokal ganz konzentréiert an hat Wandspëtzte vun ëm déi 250 Km an der Stonn!

Héichwaasser: Pegele sinn um Klammen

Virum Hannergrond vum zolitte Reen ass et net onwichteg ze wëssen, dass d’Pegele vun de Flëss schonn amgaange sinn ze klammen. V.a. d’Uelzecht an hir Nieweflëss, respektiv aner Flëss am Guttland dierfte weider séier an d’Luucht goen, soudass e Méindeg am fréie Moien do d’Cote de pré-alerte kéint iwwerschratt ginn; et ass och net ausgeschloss, dass d’Cote d’alerte hei erreecht gëtt. Absëns déi kleng Flëss kéinte ganz séier klammen, well de gesiedegte Buedem d’Waasser net méi ophuele kann.

Däitschland

Progressiv gëtt lo a ganz Däitschland all Zuch-Verkéier annuléiert, an d'Zich bleiwen an de Garen.

Fir Clienten vun der däitscher Bunn, déi lo op enger Gare festsetzen an net Heem kommen, gi Waggonen prettgestallt, wou d'Leit kënne schlofen.

A Nordrhein-Westfalen ass iwwerdeem en ICE an e Bam gerannt, 300 Leit hu missten op aner Zich ëmklammen.

Op der Nordsee goufen e sëllege Fährverbindungen op d'Insele gestoppt oder ginn am Laf vum Dag gestoppt. Och beim Sport wäerten eng Rei Evenementer ausfalen. De Match tëscht Borussia Mönchengladbach an dem 1. FC Köln ofgesot an der 1. Bundesliga gouf ofgesot.

Belsch / Holland

An der Belsch ginn a verschiddene Stied d'Accèsen an ëffentlech Parken, a Bëscher an op Kierfechter zougemaach. Fir déi ganz Belsch gëllt och eng Alerte Orange.

D'Futtballmatcher an der 1. Divisioun an der Belsch an an Holland fir dëse Sonndeg goufen ofgesot.

Um Fluchhafen zu Bréissel sinn op d'mannst 60 Flich annuléiert, dorënner Flich vu Brussels Airlines, Lufthansa, British Airways, KLM an Eurowings.

Op der Insel

Spektakuläert Manöver iwwerdeem um Londoner Fluchhafen Heathrow, wou eng Maschinn beim Landen esou staark vum Stuerm gerëselt gouf, datt de Pilot vun der British-Airways-Maschinn huet missten en Touch and go maachen, also d'Maschinn nees komplett duerchstarten.

D'Sabine huet och ewell ferm an Irland a Groussbritannien geblosen: do sinn den Ament eng 10.000 Stéit ouni Elektresch.

© RTLinfo.be

© Kachelmann Wetter