Zu Lëtzebuerg goufen et bis elo eng 50 Verdachtsfäll. Eng Persoun ëm déi 40 Joer, déi iwwer Charleroi aus Italien komm ass, gouf elo positiv getest.

Dem Mann geet et den Ament gutt. En ass isoléiert a mat senger Famill am CHL.

D’Famill ass ugangs der Woch op Lëtzebuerg zeréckkomm. Déi aner Familljemember sinn also och a Quarantänn, hunn awer keng Symptomer.

Elo gëtt gekuckt, wie mat där betraffener Persoun a Kontakt war, ee sougenannten "Contact Tracing", fir déi Persounen och z'isoléieren.

En 2. Test gëtt den Ament zu Rotterdam gemaach. Déi Resultater hunn d'Autoritéiten e Sonndeg de Moie kritt.

Um Sonndeg koum dann och eng Krisenzelle vun der Regierung beieneen, mä d'Autoritéiten hunn zu dësem Stadium alles am Grëff an et soll ee keng Panik maachen. D'Prozedure wiere sou gelaf, wéi geplangt.

Déi nächst Schrëtt ginn dann och um Sonndeg annoncéiert, mä den Ament géingen keng Eventer ofgesot ginn.

Déi nächst Etappe ginn no der Krisen-Cellule an nom Tracing decidéiert.

Leit, déi an deene leschte 14 Deeg an engem Krisegebitt waren a Symptomer hu wéi Féiwer, Houscht oder Otemnout kënne sech um Weekend um 112 mellen, an der Woch ass dat bei der Inspection Sanitaire (2478- 56 50).

Weiderhi gëllen dann och déi elementar Hygiène-Precautiounen, fir sech net mat der Longen-Krankheet unzestiechen. Reegelen, déi och an der Grippesaison Usus sinn.

Fir weider Informatioune klickt op d'Foto. / © Gesondheetsministère

Den Ament si 6 Zëmmer mat Ënnerdrock reservéiert.

A ganz Europa ginn et keng Otemschutzmasken ze kafen, mä déi Masken aus dem Commerce bréngen allerdéngs näischt, esou den Dr Schmit. D'Stocke fir d’Personal wieren allerdéngs assuréiert.

18 Leit ware bis e Mëttwoch ënner Quarantaine gesat ginn; dorënner och 16 Cliente vu LuxairTours, déi vun Teneriffa Heem komm waren.

Och am Ausland gëtt natierlech de Point iwwert d'Fäll vum Coronavirus gemaach, wou a 50 Länner de Virus konnt nogewise ginn.

Mesuren zu Charleroi

De Fluchhafen zu Charleroi huet um Sonndeg de Moie matgedeelt, datt een nom Passage vum Lëtzebuerger Patient d'Mesurë verschäerft. Et gouf ënnert anerem e Krisenzenter opgemaach. De geneeën Trajet vum Mann gëtt jo retracéiert an de Bedreiwer vum Fluchhafen ass a Kontakt mat den Autoritéiten hei am Land, fir ze kucken, mat wiem de Lëtzebuerger alles um Fluchhafen a Kontakt war.

D'Belsch selwer huet um Sonndeg de Moien eng zweet Infektioun gemellt. Wéi et an engem Communiqué vum Gesondheetsministère heescht, wier e Patient, dee virdrun a Frankräich war, mat moderate Symptomer an der Klinik zu Antwerpen.