Zu Esch am Alters- a Fleegeheem vu Servior ass en Donneschdeg ee Mann gestuerwen, dee scho gesondheetlech Problemer hat a positiv op Covid-19 getest gouf.

Op Nofro hi krut RTL dat vu Servior confirméiert.

D’Persoun war wéinst anere gesondheetleche Problemer hospitaliséiert an ass elo am Altersheem gestuerwen.

Am Ganze géif een a Servior-Haiser 6 positiv geteste Fäll vum Coronavirus bei Awunner zielen. Déi verdeele sech op d’Haiser zu Diddeleng, Esch an op der Rumm an der Stad.

Bei 9 Persounen huet ee Symptomer festgestallt, do géifen d’Resultater vun den Tester nach feelen. Eng 120 Servior-Awunner sinn a Quarantän preventiv gesat ginn, dat ass de Fall zum Beispill, wann eng Persoun aus dem Spidol erëm zeréck an d’Alters- a Fleegeheem kënnt.

Vu méiglechen Infektioune bei de Mataarbechter wéisst een zu dësem Zäitpunkt näischt, huet et vu Servior geheescht. D‘Personal wier gutt ausgerüst, wat de Schutzequipement ugeet. Do hätt ee fréi reagéiert a séier ee Plang op d’Bee gestallt, et hätt een och ee Stock-Tampon. Elo géif een dee gutt am A behalen an asetzen. Et géif ee sech och un d’Consignë vun der Santé halen, zum Beispill wat d’Droe vu Masken ugeet.

Servior zielt 15 Haiser an eng 1.600 Clienten.n.