E Mëttwoch de Moie souze sech den Direkter vun der Fedil an d'Ëmweltministesch géintiwwer.

De griicheschen Jughurtsproduzent Fage wëll keng Fabrick tëscht Diddeleng a Beetebuerg méi bauen. Dat ass zanter en Dënschdeg kloer.

Am RTL Face-à-Face um Mëttwoch de Mueren, huet sech de René Winkin vun der Industriellefederatioun FEDIL, enttäuscht gewisen. Nees en Industrie-Projet, aus deem Näischt gi wier. Et géif d'Urgence weisen, fir Ëmzedenken. Déi verschidden Acteure missten zesummeschaffen a net géinteneen argumentéieren. Well do géifen d'Investisseuren tëscht de Still setzen a sech dann eben zeréckzéien. D'Regierung wier mat Schold, datt de Projet ëmmer méi politiséiert gi wier.

Den zweeten Invité am Face-à-Face, d'Ëmweltministesch Carole Dieschbourg, huet sech iwwerrascht gewisen iwwert den Zäitpunkt, zu deem de Projet begruewe gouf.  Op der leschter Ligne droite vun der Prozedur. Si war awer och erliichtert, am Sënn vum Ressource-Verbrauch. Et wéilt ee jo eng nohalteg Ekonomie hei am Land. 

Den Industrielle-Vertrieder huet der Regierung awer do Inkonsequenz reprochéiert. Eng eenzel Fabrik wier ausgebremst ginn. An anere Beräicher géif net esou op Nohaltegkeet gekuckt ginn. Als Beispill nennt de René Winkin, den Transport vun Bauschutt duerch d'Land, well et net genuch Deponië géif ginn.

D'Ëmweltministesch war averstanen, datt eng Politiséierung vun esou Dossiere misst evitéiert ginn. Nohaltegkeetsfroe missten an Zukunft och direkt am Ufank vun engem Industrie-Projet gekläert ginn. Dat wier beim Projet Fage effektiv net geschitt. Et wier eben nach e Projet vun der aler Generatioun gewiescht, esou d'Carole Dieschbourg.

Elo géif d'Regierung awer dru schaffen, fir sech d'Instrumenter ze ginn, fir eng nohalteg an innovativ Standuertpolitik.

Face-à-Face: René Winkin a Carole Dieschbourg

Xavier Bettel reagéiert

Am Briefing fir d'Press nom Regierungsrot um Mëttwoch de Moie gouf de Staatsminister natierlech och eng Reaktioun gefrot, nodeems de griicheschen Investisseur Fage säi Projet vun enger Molkerei en Dënschdeg iwwerraschend komplett zeréckgezunn huet. Fir de Xaxier Bettel ass et lo wichteg, Léieren aus dësem Dossier ze zéien an och vu vir eran fir aner potenziell Investisseuren kloer Reegelen a Critèren festzeleeën, déi dann och wärend der ganzer Prozedur d'selwecht bleiwen - dat wier am Fall vu Fage net de Fall gewiescht.

Spannunge gesäit de Xavier Bettel wéinst dem Réckzuch vu Fage keng an der Regierung an och net a senger Partei, der DP.

Wann an der Chamber hätt missten iwwert de Molkerei-Projet ofgestëmmt ginn, wier dësen och guttgeheescht ginn, sou d'Meenung vum Premier.

De Xavier Bettel

Och weiderhin setzt d'Regierung dem Staatsminister no, op eng Diversifizéierung vun der Lëtzebuerger Ekonomie - sech op ee ee Standbeen eleng ze konzentréieren, wier falsch, all Secteure géifen gebraucht.

Et wier dann och net ee Ministère eleng, dee géif iwwer en industrielle Projet decidéieren, mä d'ganz Regierung. An Zukunft sollen duerfir Check-Ups gemaach ginn, fir d'Plus-valuen vun engem Dossier erauszeschielen.