Wéinst der héijer Zuel un Neiinfektiounen zu Lëtzebuerg kënnt e Samschdeg de Regierungsrot zesummen an owes ginn et weider Informatiounen.

Wéi an den aneren europäesche Länner klammen d'Corona-Zuelen och zu Lëtzebuerg. E Freideg huet d'Santé matgedeelt, datt bannent de leschte 24 Stonnen 227 nei Corona-Fäll dobäi komm sinn, dat ass een neien Héchstwäert.

Aktuell sinn 51 Leit covid-bedéngt hospitaliséiert, dovu 4 Persounen, déi intensiv-medezinesch musse betreit ginn.

D'Zuelen zu Lëtzebuerg sinn net berouegend, sot eis de Premier Xavier Bettel e Freideg de Moien um Bord vum EU-Sommet zu Bréissel. D'Analys misst elo gemaach ginn. De Premier kënnt dofir nach e Freideg den Owend mat den Experten zesummen, ier dann e Samschdeg e Regierungsrot beienee kënnt, fir ze kucken, wéi et weidergoe soll a wéi eng nei Mesuren en place gesat musse ginn. E Samschdeg den Owend ass dann eng Pressekonferenz mam Premier an der Gesondheetsministesch.

Xavier Bettel am Interview
D'Zuelen zu Lëtzebuerg sinn net berouegend, sou de Premier e Freideg de Moien um Bord vum EU-Sommet zu Bréissel. D'Analys misst elo gemaach ginn.

Op d'Fro, ob dat an d'Richtung wéi bei eisen Noperen a Frankräich an an der Belsch kéint goen, sot de Xavier Bettel:

"Dat gesinn ech, wann ech d'Analys bis hunn. Et ass wichteg, en Echange mat de Leit ze hunn, déi Responsabilitéit an de verschiddenen Administratiounen a Recherchezenteren hunn. Zesumme muss ee sech ausdenken, wat dat Bescht ass. Et huet jo kee Wäert, elo aus der Hëft ze schéissen. Et muss ee sech ëmmer bewosst sinn, datt all Decisioun Repercussiounen huet. Ech hunn och dës Woch gesot, datt d'Zuel vun de Better an Intensivbetter de Moment net alarmant ass. Mä wa mer gesinn, wéi vill Leit krank ginn de Moment, an dat déi nächst Stonnen an Deeg sou weidergeet, ass et wichteg ze reagéieren, fir z'evitéieren, an déi Situatioun ze kommen. Dës Kris huet mat sech bruecht, séier ze reagéieren, mä och antizipéieren. Et dierf een net panikéieren, mä et muss ee kënnen antizipéieren."

Extrait Xavier Bettel

Souwäit de Premier Xavier Bettel iwwert d'Corona-Situatioun bei eis am Land. Um EU-Sommet ass et schonn en Donneschdeg ëm déi aktuell Pandemie gaangen. Ënnert anerem gouf festgehalen, datt d'Tester, déi gemaach ginn, ënnert den EU-Memberstaaten unerkannt ginn.