An de Butteker gëllt d'Reegel 1 Persoun pro 10 Metercarré, d'Restaurante bleiwe bis Enn Januar nach zou an d'Schoule ginn d'nächst Woch nees op.

Op enger Pressekonferenz en Dënschdeg hunn de Premier Xavier Bettel an d'Gesondheetsministesch Paulette Lenert bekannt ginn, wéi et mat de Lockdown-Reegele weidergeet, déi d'Regierung en Dënschdeg de Moien ofgeseent huet.

Nei Covid-Mesuren / Reportage Pierre Jans

Et gëtt e Retour op d'Mesurë vu virum 24. Dezember, dat heescht, dass och all net-essentiell Butteker nees dierfen opmaachen, esou wéi Coifferen, Solarium-Studioen, Salons de beauté oder Fitnessstudioen. Et gëllen awer méi streng Reegele fir de Commerce: 1 Persoun op 10 Metercarré.

Et gëlle weider d'iewescht Limitatioune vu Leit, déi dierfe beienee sinn - also e Maximum vun 2 Leit aus engem selwechte Stot bei sech Doheem. De Status Quo gëllt och fir d'Rassemblementsreegelen.

D'Alkoholverbuet am ëffentleche Raum bleift bestoen.

De Couvre-feu gëtt nees vun 21 op 23 Auer owes no hanne geréckelt.

Zanter e Méindeg gëllt jo de Modell vun der "Schoul doheem" - dee gëtt den nächste Méindeg nees opgehuewen, dat heescht, d'Schoulen, Maisons relais a Crèchë ginn nees op.

Am Sport gëllen nei Reegelen, déi en Donneschdeg um 11 Auer op enger Pressekonferenz vum Sportminister Dan Kersch am Detail wäerte presentéiert ginn. RTL-Informatiounen no solle Championnater an ieweschten Divisiounen nees erlaabt ginn.

Am Kultur-Beräich ginn d'Theateren an d'Kinoen nees op. Maximal 100 Leit däerfe sech hei versammelen, Maske si Flicht an eng Distanz vun 2 Meter tëscht de Leit muss agehale ginn.

D'Zouloosse vum Horesca-Secteur awer, sécher eng batter Pëll, gëtt iwwert de 15. Januar bis den 31. Januar, also ëm weider zwou Woche verlängert.

Via Circulaire goufen dann och d'Administratiounscheffen an der Fonction Publique drop higewisen, dass nees Teletravail bis zu 4 Deeg d'Woch autoriséiert gëtt. Dat gëllt vum 11. Januar un. Legislativ gesinn, ass elo de Büro an d'Presidentekonferenz vun der Chamber informéiert.

D'Santéskommissioun koum um 16 Auer en Dënschdeg de Mëtteg beieneen, fir den neien Text ënnert d'Lupp ze huelen. Duerno da kënnt e Mëttwoch de Staatsrot beieneen. Dann ass eng weider Santéskommissioun néideg, sou datt d'Chamber an hirer Plenière am Cercle fréistens um Freideg oder um Samschdeg oder allerspéitstens souguer eréischt um Sonndeg de Moie beienee kënnt, fir dat neit Covid-Gesetz dann ze stëmmen. Déi nei Mesurë solle bis den 31. Januar gëllen.

Tendenz vun Neiinfektioune geet an déi richteg Richtung

D'Situatioun ass mitigéiert, si ass weider ugespaant, mä d'Tendenz geet an déi richteg Richtung. Dat sot de Premier Xavier Bettel en Dënschdeg de Mëtteg op der Pressekonferenz.

Et goufen 200 Neiinfektiounen den Dag iwwer d'Feierdeeg, d'lescht Woch louche mer bei 167 Infektiounen. Am Verglach: Mëtt Oktober hate mer bal 1.000 nei Fäll op engem Dag, Net-Residenten mat abegraff.

Pressekonferenz am Replay