De Sport ka wuel zum Deel nees funktionéieren, allerdéngs ënner strenge Reegelen, sou de Premier Xavier Bettel schonn en Dënschdeg um Pressebriefing.

Covid-Mesuren am Sport / Reportage Jeff Kettenmeyer

Fitnesszenteren an Danzschoule kënnen zum Beispill vun nächster Woch un nees opmaachen, dat awer just mat begrenzte Kapazitéiten.

Am Sport sollen nees Competitiounen, also Championnater souwuel Indoor wéi Outdoor, erlaabt ginn. Dëst soll an de jeeweilege Sportaarte fir déi iewescht Divisiounen am Seniorsberäich. Am RTL-Interview huet de Sportminister Dan Kersch dës Informatioune confirméiert.

Allerdéngs ass de Catering an den Halen an op den Terrainen net erlaabt, dat hat d'Paulette Lenert schonn en Dënschdeg op der Pressekonferenz annoncéiert. Kompetitioune bei de Kanner solle weiderhi verbuede sinn.

Bis Enn Januar wäerte bei de Sport-Competitiounen keng Spectateuren erlaabt sinn, dat huet de Sportminister RTL och confirméiert.

Een anert Changement ass, datt net nëmme COSL-Elitekader-Athleten hirem Sport kënnen nogoen, mä d'Sportler vun alle Nationalkadere vun den eenzele Federatiounen an alle Kategorien.

Och d'Schwemme sollen nees opgoen, mat engem Maximum vu 6 Leit an engem Couloir vu 50 Meter an 3 Leit op 25 Meter.

En Donneschdeg um 11 Auer informéiert de Sportminister Dan Kersch op enger Pressekonferenz iwwer d'Detailer am Sport. RTL iwwerdréit d'Pressekonferenz am Livestream op RTL.lu.