Um 15. Februar huet Lëtzebuerg säin „Overshoot Day“ erreecht a gehéiert deemno zu den Top-Pollueuren an Europa a weltwäit.

Vun dësem Méindeg un hätt de Grand-Duché nämlech all seng erneierbar Ressourcë verbraucht. Wann d'Leit weltwäit esou géife mat hire Ressourcen ëmgoen, wéi dat hei am Land de Fall ass, wieren d'erneierbar Ressourcen also scho Mëtt Februar verbraucht an et bréicht een 8 Welten, fir de Ressourcë-Verbrauch vun der globaler Populatioun ze decken.

Nëmmen de Katar steet weltwäit gekuckt nach méi schlecht do.

Overshoot Dag - Den Interview mam Blanche Weber vum Mouveco

De Ranking baséiert sech op den ökologesche Foussofdrock. Fir déi schlecht Placéierung ass also virop déi enorm héich national CO2-Bilanz responsabel. D'Lëtzebuerger Politik ass sech eens, dass déi an der Haaptsaach duerch de Verkaf vu Pëtrolsproduiten zustane kënnt.
Aktuell läit den „World Overshoot Day“, also den Dag, op deem déi ganz Welt all d'Ressourcë fir een Joer opgebraucht hätt, um Datum vum 22. August.

D'Organisatioun „Extinction Rebellion Lxuembourg“ fuerdert an deem Kontext, dass endlech missten Neel mat Käpp gemaach ginn, wat den ökologeschen Ëmbau vun der Politik an eiser Gesellschaft ugeet.