Am Land géing et en dramatescht Hotelsstierwe ginn iwwert déi lescht 25 Joer, erkläert d'LSAP-Deputéiert Francine Closener an hirer Questioun élargie.

Zukunft vum Tourismussecteur / Reportage Diana Hoffmann

Dem Tourismussecteur geet et schlecht. D’Iwwernuechtunge sinn zu 45,5 Prozent zréckgaangen. D'Hotelsstierwen ass zwar net eréischt zanter der Pandemie en Thema, mee gouf an de leschten 12 Méint nach verschäerft. An enger Question elargie wennt sech d’LSAP-Deputéiert Francine Closener un de Mëttelstandsminister, fir sech iwwert d’Zukunft vum Secteur ze informéieren.

Déi Deputéiert wëll wëssen, wéi et soll weidergoe fir d’déi Zéngdausende vu Leit, déi an der Branche schaffen.

"Hëllef an der Nout wier nämlech dat eent, eng Strategie fir d'Zukunft awer wier eppes anescht. Ouni Investissementer an Innovatioune géing et am Tourismus net goen. Sief et fir eng nei Terrass, Kichenapparater, Wellness oder d'Digitaliséierung vum Betrib. Dat alles wier e must an net just en nice to have. Vill Moderniséierungspläng géingen awer elo op Äis leien", sou déi Deputéiert.

De Mëttelstandsminister Lex Delles rappelléiert doropshin d’Aiden, déi un d’Leit aus dem Secteur ausbezuelt ginn, an ënnersträicht doriwwer eraus och d’Direkthëllefen, duerch d’Iwwernuechtungsbongen. Iwwer 100.000 sinn ageléist ginn, an hu sou eng Zomm vu 5,35 Milliounen Euro generéiert. Besonnesch Hoteller am ländleche Beräich hätten dovunner profitéiert. E wichtege Volet fir d’Zukunft wier awer d’Digitaliséierung, sou de Minister.  
 
"Fir den eenzele Betriber bei der Digitaliséierung ze hëllefen, ass e Fit fot digital package gemaach ginn. Sou sollen och ganz kleng Betriber an deem Sënn ënnerstëtzt ginn."

Nach bis de Summer soll eng national Tourismus-App presentéiert ginn. Dëst zesumme mat allen Office regional du tourisme an den ASBLen aus dem Secteur.

Fir Kongress-Touristen och an Zukunft op Lëtzebuerg kënnen ze kréien, gëtt am Moment zesumme mat der Horesca un engem "Safe to meet"-Label geschafft.

"Mam "Safe to meet" soll da gewise ginn, dat gewësse sanitär Krittären op deene Plazen erfëllt ginn", sou de Lex Delles.

D’Francine Closener huet sech iwwerdeems och iwwert de sougenannte Plan quinquennal informéiert. Den Tourismussecteur soll tëscht 2018 an 2022 mat 60 Milliounen Euro ënnerstëtzt ginn. De Minister resuméiert, wou dësen drun ass:

"Am Moment si vun de Projete ronn 30 Milliounen Euro ausbezuelt ginn. Ronn 37 Prozent un d'Gemengen, 20 Prozent un d'Syndicaten an d'ASBLen, 17 Prozent un d'Hotellerie, 7 Prozent un d'Campingen, 3,7 Prozent Etüden, 3,5 Prozent fir Gitten, an 3,25 Prozent u privat Investisseuren."

Et wieren awer nach Demandë fir nei Projeten erakomm am Kader vun Esch 2022. Eng 11 sougenannte Logements insolites, also alternativ Forme vun Iwwernuechtungsméiglechkeeten, sollen am Süden entstoen. Dëst wäert dann nach e groussen Deel vum Plan quinquennal ausmaachen.