De Paul Helminger ass 1940 zu Esch gebuer an e Samschdeg am Alter vun 80 Joer gestuerwen.

Den DP-Politiker an Deputéierte war vun 1999 bis 2011 Stater Buergermeeschter, Chef de Cabinet an der Regierung Thorn an dono vun 79 bis 84 Staatssekretär.

No sengem Droit- a Politologie-Studium war de Paul Helminger Diplomat. Bei senger Aarbecht zu London hat hien 1969 de Gaston Thorn kennegeléiert, 5 Joer méi spéit war et dunn den Optrëtt an déi national Politik.

A senge 5 Joer als Staatssekretär war den Helminger responsabel fir de Aussenhandel, d'Ekonomie, d'Justiz, d'Kooperatioun an de Mëttelstandsministère. Seng Zäit duerno als Stater Buergermeeschter huet de Paul Helminger an Interviewen dacks als déi schéinsten, déi e bis dohin hat, beschriwwen.

No der Politik war et de Wee zeréck an d'Ekonomie 2012. Innerhalb vun 12 Méint huet den Helminger d'Spëtzt vun der Luxair a Cargolux iwwerholl.

Hien hannerléisst 7 Kanner aus 2 Bestietnisser.

Reaktiounen

D'Demokratesch Partei trauert ëm ee vun hire brillantste Käpp, wéi se e Samschdeg de Mëtteg schreift. Mat him géif Lëtzebuerg e Politiker verléieren, deen d'Land an d'Stad Lëtzebuerg staark gepräägt huet. Hien hätt sech mat Leif a Séil engagéiert. Als Diplomat, als Chef de Cabinet, als Staatssekretär, als Deputéierten, als Stater Député-maire an als Entrepreneur.

D'DP beschreift de Paul Helminger als weltgewandt a sengem Optrieden an als e Mënsch, deen ëmmer op war fir nei Entwécklungen. Am Liewen an der Politik an och an der Wirtschaft.

Mat senger Dynamik a sengem Optimismus hätt hien et ëmmer erëm fäerdeg bruecht, d'Leit fir nei Projeten an nei Weeër ze begeeschteren.

"De Paul Helminger steet net nëmme fir den Engagement, hie war e ganz pragmatesche Politiker. Ech hu ganz vill mat him zesummegeschafft, wou hie Buergermeeschter war vun der Stad Lëtzebuerg, well ech Presidentin war vun der Union commerciale. An do hu mir d'Union commerciale zesummen ebe professionaliséiert, mir hu grouss Projeten zesumme gemaach. Hie war am Fong ëmmer een, deem et ëm d'Saach gaangen ass, an deen och gekuckt huet, dass mir weiderkomme fir d'Stad, fir d'Bierger vun der Stad Lëtzebuerg. Hie war een, deen en immenst grousst Wëssen hat, deen eng grouss Connaissance vun der Partei hat, awer och soss e grousst Wëssen. Ech si sécher, dass hien och ganz vill wäert feelen de Paul, well hie war ëmmer present, wa mir hien ëm Rot gefrot hunn", sou d'Corinne Cahen.

Reaktioun Corinne Cahen

"Ech kennen de Paul Helminger zënter Enn der 70er Joren. Mir waren zesummen an der Regierung (...) Ech hunn ëmmer gär mat him zesumme geschafft, well hie war e Mann, deen e bësse méi wäit gesinn huet a gekuckt huet wéi den Teller, dee virun him stoung. Hie war Staatssekretär an der Ekonomie, Staatssekretär am Aarbechtsministère. Doduerch ass entstanen en Zesummewierken, dat notamment am Beräich vun der Stolkris noutwenneg war a wat och, wéi ech fannen, gutt Resultater bruecht huet. Et deet mir leed, dass hien net méi do ass", reagéiert de Jean-Claude Juncker.

Reaktioune Jean-Claude Juncker a Lydie Polfer

"Virun e puer Woche war hien nach bei mir an der Gemeng an näischt huet dorop higewisen. De Paul war e Mënsch, mat deem ech zënter 79 schaffen. Ech war deemools jéngsten Deputéierten am Parlament an hie jonke Staatssekretär. Duerno hu mir weidergeschafft am Parlament, hien an der Regierung, duerno an der Gemeng, ech als Buergermeeschtesch, hien als Schäffen, duerno ëmgekéiert. An hie war e Mënsch, dee sech ëmmer wierklech voll a ganz agesat huet fir dëst Land an duerno och ons Stad. Hir wirtschaftlech déi Grondbasis ze ginn, fir eng beschtméiglech Zukunft z'organiséieren", waren d'Wierder vun Stater Buergermeeschtesch Lydie Polfer.

"Am Liewen hu mir zesumme Politik gemaach, mir hate bal ëmmer genau déi selwecht Meenungen iwwer wéi liberal Politik kéint gemaach ginn an ech hunn hien am Fong ëmmer bewonnert. An ech wëll soen, nieft dem Paul Helminger sengen Talenter, senger Kompetenz, senger Aart a Weis mat Leit ëmzegoen, dat war enorm. Hie war e super Familljepapp, e super léiwe Mënsch fir seng Famill a seng Fra an et ass en immens léiwe Mënsch vun eis gaangen", fënnt de Kik Schneider.

Reaktioun Kik Schneider