Am Regierungsrot gouf sech op nei Mesurë gëeenegt. Dës solle vum 16. Mee bis den 12. Juni gëllen. De Vott an der Chamber ass déi nächst Woch.

"4 gëtt déi nei 2", dat hunn de Premier an d'Gesondheetsministesch e Mëttwoch nom Regierungsrot am Hibléck op déi nei méi large Corona-Mesurë betount. D'Situatioun an de Spideeler, an de Kläranlagen an och vun de Neiinfektioune wier stabel an dofir solle vum 16. Mee un eng Partie Ännerunge bei de Corona-Mesurë gëllen.

Nei Covid-Mesuren / Rep. Claudia Kollwelter

Ugefaange bei de Mesuren am private Beräich, wou een net méi just 2, mee erëm 4 Leit invitéieren dierf. De Premier Xavier Bettel: Et dierf ee bis 4 Leit invitéieren, an déi 4 Leit mussen net aus dem nämmlechte Stot sinn. Wann een eng Famill invitéiert, dierfen déi méi wéi 4 sinn. 

Et kann een deemno och erëm e ganze Stot doheem empfänken. D'Zuel vu 4 zielt dann och fir den Horeca-Secteur.

D'Ouverture vun den Terrassen hätt keen Impakt op d'Chiffere gehat, huet de Xavier Bettel ënnerstrach. A genee dofir kéimen och weider Changementer: D'Fermeture gëtt vun 18h op 22h geréckelt a bannen dierfe Clienten empfaange ginn, maximum 4 pro Dësch a mat der Konditioun, datt en Test gemaach gëtt.

3 Forme vun Tester wiere méiglech: de klassesche PCR-Test, dee manner wéi 72 Stonnen al muss sinn, Schnelltester, déi vu Professionelle gemaach ginn, déi net manner wéi 24 Stonnen al dierfe sinn an déi am Prinzip vum 12. Mee un a verschiddenen Apdikte gemaach solle ginn. D’Gesondheetsministesch Paulette Lenert: Dat evitéiert, datt e Schlaange steet virum Restaurant ier een zerwéiert gëtt. Den Auto-Test ass déi 3. Méiglechkeet, dee sur place muss gemaach ginn.

Op den Terrasse bleift et bei der Zuel vu 4 ouni Schnelltest. Wat d'Rassemblementer ugeet, gëtt d'Zuel vun 100 op 150 eropgesat: An et dierfe souguer Exceptioune gemaach gi bei verschidde Pilotprojeten, déi vun der Santé musse validéiert ginn. Wou ënnert verschidde Konditiounen d'Zuel op 1.000 Leit kann eropgoen, mat strikte sanitäre Protokoller, déi vun der Santé definéiert ginn.

D'Ausgangsspär bleift, gëtt awer op Mëtternuecht verluecht, haaptsächlech am Hibléck op eng Partie Pilotprojeten: Dofir wäert och d'Ausgangsspär vun 23 Auer op Mëtternuecht verluecht ginn. Mir kënnen net zum Beispill Concerten organiséieren, déi um hallwer oder véierel fir 11 fäerdeg sinn an dann awer e Couvre-feu um 23 hunn, wou mer d'Leit dann an Infraktioun setzen, wa se bei Testprojete géife matmaachen. De Couvre-feu gëllt weider vu Mëtternuecht bis 6 Auer.

Enger Etüd vun der Oxford University no wier d'Ausgangsspär méi effikass wéi Schoulen zouzemaachen, huet de Xavier Bettel argumentéiert.

Bei de Schoulen an de Lycéeë ginn d'A- a B-Klassen no der Péngschtvakanz ofgeschaaft.

Am Sport gëtt de Huis Clos opgehuewen. Am nationale Sport dierfen also nees Spectateuren dobäi sinn. 150 Persoune sinn ënner strikte Mesuren erlaabt. Dës Zuel ka bis op maximal 1.000 Leit klammen, dat wann ee speziellt Konzept mat der Santé ausgeschafft gouf. Wéi dat am Detail kéint ausgesinn, konnt eis de Sportsministère op Nofro hin nach net soen. D'Restriktioune vu jonke Sportler ënner 19 Joer, déi an engem Veräin sinn, gi fale gelooss. An de Schwemme gëllt an Zukunft 10 Quadratmeter pro Schwëmmer. D'Distanzreegel vun 2 Meter gëllt am Sport an Zukunft vu 4 Persounen un, virdru war d'Limitatioun op 2.

An der Kultur gëllt d'Distanzreegel net méi vun 2, mee vu 4 Museker un a baussen dierfe bis 40 Persounen zesumme musizéieren.

Bei den Impfunge soll iwwerdeems eng staark Acceleratioun kommen. An den nächsten Deeg solle méi wéi 50.000 Persoune geimpft ginn, méi wéi 30.000 dovunner mam Vaccin vun AstraZeneca.

Alkoholkonsum am ëffentleche Raum bleift iwweregens weiderhi verbueden.

Aktuell ass hei am Land net geplangt, datt et zu Lockerunge fir geimpft Persoune kënnt. Et wéilt een d'Situatioun weider beobachten, ier een esou eng Decisioun hëlt, sou d'Paulette Lenert.
D’Regierung proposéiert also deels méi labber Restriktioune vum 16. Mee un a bis den 12. Juni. D’Chamber muss déi d‘nächst Woch nach guttheeschen. Gronn fir déi méi labber Mesurë wier, datt d’Impfcampagne gutt virukéim, d’Admissiounen an de Spideeler kloer réckleefeg wieren, mee awer och, datt d’Restriktiounen eng Laascht fir d’Leit sinn. De Risiko wier awer nach ëmmer do, sou nach d’Paulette Lenert. Och wann ee kéint méi maachen, recommandéiert d’Gesondheetsministesch, weider esouwäit ewéi méiglech Kontakter ze limitéieren, och wa geschwë méi erlaabt gëtt.

Replay vun der Pressekonferenz