Den Dr. Bernard Thill vu Médecins du Monde war e Méindeg eise Live-Invité am Mëttesjournal vum Radio.

An net nëmme goung et ëm d'Opmierksam-Maachen, mä ëm konkret Handelen, dat u politesch Fuerderunge gebonnen ass.

Accès zu medezinesche Soine fir all Mënsch, och defavoriséiert Leit, respektiv Persounen, déi net bei enger Krankekeess sinn oder och deboutéiert Asyl-Demandeuren. Dat freet d'Plattform "Ronnen Dësch", wou sech eng Dosen Organisatiounen an ONGen zesummegeschloss hunn, fir op dee Probleem opmierksam ze maachen.

An net nëmme geet et ëm d'Opmierksam-Maachen, mä ëm konkret Handelen, dat u politesch Fuerderunge gebonnen ass - duerfir och en oppene Bréif vun den Organisatiounen, wéi ënnert anerem dem Roude Kräiz, der Caritas, dem Planning Familial un déi 4 zoustänneg Ministere Cahen, Lenert, Schneider an Asselborn.

D'Palett vun de Revendicatioune geet vun enger Krankeversécherung fir Mannerjäreger an ofgewisenen Demandeurs d'asile, iwwer d'staatlech Prise en charge vun de Krankekeess-Cotisatioune fir net-affiliéiert Persounen, bis hin zu engem professionellen Traitement vun Traumaen, och a Foyeren a Gesondheetszenteren.

Hei den oppene Bréif fir erofzelueden.

Fir iwwert d'generaliséiert sanitär Couverture vun ufällegen an defavoriséierte Leit ze schwätzen, war dann den Dr. Bernard Thill vu Médecins du Monde e Méindeg eise Live-Invité am Mëttesjournal. Hien huet hei erkläert, wou genee d'Defiziter vun der Pandemie sinn. Ënnert anerem ginn et vill Leit, déi duerch d'Pandemie hir Aarbecht verluer hunn, dat dacks bei Interimsposten an der Restauratioun oder um Bau. Betraff sinn natierlech och Leit, déi scho länger am Chômage sinn, respektiv Leit, déi aus hirem Land fortgelaf sinn oder et verlooss ginn, ma awer hei am Land keng Aarbecht fannen.

Dës Kategorië vu Leit kënne sech dann och keng Medikamenter kafen, well se weder bei der CNS ugemellt sinn, nach en Akommes hunn, fir dëst aus eegener Täsch ze bezuelen. Dëst, esou den Dr. Bernard Thill, géif op laang Dauer méi e grousse Schued maachen, wéi wann een dëse Leit direkt hëlleft an d'Krankheeten net schleefe léisst.

Eng konkret Hëllef déi de Ronnen Dësch proposéiert, ass eng Gesondheetshëllef, also eng Hëllef fir Leit, déi keng Krankekeess oder Suen hunn, sech Medikamenter ze kafen. De Fond national de solidarité soll all eenzelen Dossier individuell analyséieren a kucken, ob eng Persoun Zougang zu der Hëllef kritt. Wann dëst accordéiert ass, streckt d'CNS d'Sue fir déi Leit vir, déi och eng Kaart kréien. D'Sue kënnen dann dono vum Staat iwwerholl ginn. Niewent de Membere vum Ronnen Dësch, stinn och d'Gewerkschaften oder d'AMMD hannert dem Projet.