Déi nei Mesuren am Kader vun der Drogepolitik, méi konkret ëm de Konsum vu Cannabis, suerge fir vill Diskussiounen an deels ënnerschiddlech Meenungen.

Reaktiounen zu der Cannabis-Politik - Rep. Fanny Kinsch

Fir d'Piraten ass et eng gréisstendeels repressiv Politik, fir d'ADR net repressiv genuch, an den Ae vun déi Lénk versteet d'Regierung net wat Präventioun ass an d'CSV ass zefridden, ma skeptesch wat d'Ëmsetzung ugeet - esou reagéieren d'Oppositiounsparteien an der Chamber op der Regierung hire Mesurëpak ronderëm d'Drogekriminalitéit.

An Zukunft soll ee jo bis zu 4 Cannabisplanzen doheem kënnen ubauen, iwwerdeems ee wann een dobausse mat manner wéi 3 Gramm erwëscht gëtt nëmmen nach e Protokoll kritt - déi kuerzfristeg Mesuren huet d'Regierung e Freideg annoncéiert.

Déi grouss Cannabislegaliséierung soll nach waarden, ma kuerzfristeg soll et erlaabt gi 4 Planzen Doheem unzebauen - den ADR-Deputéierte Fernand Kartheiser weist sech skeptesch: "Mir mussen elo mol ofwaarden, wéi dat genee soll ausgesinn an eis dann nees déi Fro stellen, déi mer schonn e puer mol gestallt hunn - a wéi wäit ass dat do iwwerhaapt kompatibel mat eisen internationalen Obligatiounen."

Fir d'Pirate geet et awer net wäit genuch. D’Regierung géing hir Walverspriechen net halen an eng gréisstendeels repressiv Drogepolitik féieren.

D'Regierung wier zanter 8 Joer un der Muecht a géing iwwer d'Legaliséiere vu Cannabis schwätzen an elo géing sech weisen datt se nach net vill Opweises hätt, fënnt de Piraten-Deputéierte Sven Clement.

"Dat ass all Walverspriechen einfach mol zur Fënster rausgepucht a gehofft datt d'Leit duerch déi Annonce vun de 4 Planzen Doheem vergiessen, dass mer hei u sech e komplette Law and Order-Pack maachen, wou mer Annoncen, déi schonn 3-4 mol annoncéiert goufen nach eng Kéier widderhuelen ouni datt et wierklech eppes Neies ass."

An den Ae vun de Piraten hätt ee méi wäit kënne goen: "Mir hätten den Ubau zum Beispill kéinten a Gemeinschaftsgäert erméiglechen, mir hätte kéinten den Handel bis zu engem gewëssenen Taux dekriminaliséieren, datt e gesot hätt, am Private ouni Gewënn-Ofsiicht erlabe mer awer gewëssen Transaktiounen. Dat ass natierlech ëmmer schwéier ze kontrolléieren, mee zum Beispill hätt ee kéinte soen dat muss an den eegene 4 Wänn stattfannen, dat däerf net op der Strooss stattfannen."

Fir déi Lénk ass den Ubau doheem e Schrëtt an déi richteg Richtung, hei gëtt et och méi Versteesdemech fir déi virsiichteg Approche vun der Regierung. Déi Lénk hirersäits begréissen d'Annonce, datt ee 4 Planzen doheem kann ubauen, esou d'Nathalie Oberweis, och wann ee géing bedaueren, datt een nach ëmmer bestrooft gëtt wann ee mat klenge Quantitéiten erwëscht gëtt: "Ech denken dass se do vläicht nach zécken, och wëll se jo wierklech Angscht hu wéinst deem Drogentourismus, dee kéint kommen, wat ech verstinn. Dofir gi se mat klenge Schrëtt vir. Dat ass ganz virsiichteg, wat se elo maachen, mir hätten eis gewënscht, et géing scho bësse méi wäit goen, mee et ass en éischte Schrëtt an ech verstinn dat och."

Allgemeng gesäit déi lénk Deputéiert de Mesurëpak ronderëm d'Drogekriminalitéit vun der Regierung kritesch - et géing gesot ginn, dat meescht wier Preventioun, mee dat géing guer net stëmmen: "Dat wat si Preventioun nennen ass keng Preventioun méi, do geet et drëms, ëm Leit, déi schonn an der Sucht sinn, dat heescht do si mer net méi an der Preventioun, déi Leit si jo deen Ament scho krank a schonn zum Deel an der Drogekriminalitéit dran. Dat ass eigentlech e falschen Discours. Droge-Preventioun sinn u sech déi 2 Moossnamen an de Schoulen, wou se higinn a wëllen d'Santé mental stäerken, de Bien-être stäerke vun deene Jonken, se opklären, dat ass alles Preventioun, do sinn ech averstanen. An do misst ee vill méi wäit goen, och gesellschaftlech, sozio-ekonomesch Facteuren analyséieren."

Et kéint een zum Beispill eng Etüd maachen, fir eraus ze fannen, firwat d'Leit Drogekrank ginn an och firwat se an d'Drogekriminalitéit rutschen, sou déi lénk Deputéiert.

Reaktiounen vun de Parteien - Fanny Kinsch

D'CSV wëll d’Annoncen am Dossier Cannabis nach an de Parteigremien diskutéieren, iert se sech positionéiert, seet den Deputéierte Laurent Mosar:

"Meng Partei an ech si relativ kritesch par Rapport zu der ganzer Cannabislegaliséierung, mir reservéieren eis awer fir an den nächsten Deeg definitiv eis Positioun dozou ze fixéieren."

Wat de Recht vun de Mesuren ugeet fillt d'CSV sech confirméiert, vill vun deene géing een zanter Jore fuerderen.

"Ech denken un de Platzverweis, ech denken un d'Bodypackers, ech denken un d'Bodycamen, alles dat froe mir schonn zanter Joren, elo kënnt et, nach muss der awer erlaben, dass ech do e gewëssen Zweiwel hunn, firwat, déi do Mesuren hu mer schonn 2018 och vum deemolege Policeminister Etienne Schneider versprach kritt, mir hunn se 2019 vum François Bausch versprach kritt, elo kommen se rëm eng Kéier."

Och wat d'Ausweise vu Persounen an enger irregulärer Situatioun ugeet déi kriminell opfälleg ginn, wéilt een elo mol d'Resultater ofwaarden... fir d'ADR ass scho kloer, datt déi annoncéiert Nobesserung am Gesetz net wäit genuch geet, de Fernand Kartheiser.

"Et ass einfach elo sou, dass bei deenen Ausweisungen do eng Rechtsonsécherheet besteet an der Interpretatioun vun de Geriichter an déi Rechtsonsécherheet soll elo eraus geholl ginn, wéi den Här Asselborn a sengem Pobeier schreift, fir eventuell Strofverfolgung z'erméiglechen, also dat ass elo net datt dat eng haart Moossnam wär."

De Piratendeputéierte Sven Clement awer reprochéiert dem Ausseminister sech selwer ze widderspriechen: "Iergendwann brauch dës Regierung och eng koherent Politik wéi se mat Dublin-Fäll wëll ëmgoen, ob mer fir eng Reform vum Dublin-Ofkommes sinn op europäeschem Plang oder net a wat dat alles mat sech bréngt. Mee dat hei ass e bësse gläichzäiteg wëll en d'Laache vum Bottermeedchen, d'Mëllech an de Botter."

Hei géinge geféierlech Amalgamme gemaach ginn an eng Politik fir d'Leit lass ze ginn, sou iwwerdeems déi Lénk Deputéiert Nathalie Oberweis: "Et ass eng Äntwert op e politeschen Drock, deen um Buedem ass, fir Leit lass ze ginn. Mir mussen eis jo awer bewosst sinn, wa mer déi, oft, kleng Fësch, d'Police huet eis gesot, et sinn oft kleng Fësch, wa mer déi ausweisen, wa mer déi zréckweisen, kommen déi nächst. Well wann et ëmmer nach Leit ginn, déi ouni Perspektive sinn, déi an enger irregulärer Situatioun sinn, déi keen Accès zum Aarbechtsmaart hunn, déi um Rand vun der Gesellschaft liewen, da sprangen déi an dat Lach, sou laang et eng Demande gëtt an eiser Gesellschaft, fir Drogen ze consomméieren, sou laang ginn et Leit, déi an dat Lach sprangen."

Déi Lénk weise sech dann och ganz skeptesch zu den Annoncen iwwert de Platzverweis - et géing ee sech froen, wéi wäit dat duerno soll goen.