An der Stad ass et e Freideg den Owend nees zu Demonstratiounen am Zesummenhang mat der Corona-Pandemie komm.

Corona-Demonstratiounen an der Stad / Rep. Diana Hoffmann

Op der sougenannter Marche blanche silencieuse e Freideg den Owend op der Place de l’Europe an der Stad ass et roueg bliwwen. Der Police no hu sech eng 300 Leit virun der Philharmonie versammelt. Och d’Géigendemonstratioun, déi net ugemellt war, a fir déi en Opruff op Instragram gemaach ginn ass, ass mat enger 15 Leit iwwerschaubar bliwwen.

D’Marche blanche silencieuse war dës Kéier keng Marche méi. Wéinst enger ugekënnegter Géigendemo war den Organisateure gerode ginn, net méi op der Glacis ze trëppelen. Dës Aktioun ass dann awer dach méi harmlos verlaf wéi erwaart. Eng 15 Leit hate sech um Glacis versammelt. Et huet ugangs no méi ausgesinn, ma déi 40 aner ware Polizisten. Offiziell gemellt war dës Aktioun net. Ee vun den Organisateuren erkläert, wat een domat wollt bezwecken: "Virun allem wëlle mer de Message mat op de Wee ginn, datt mer Covidioten net wëllen d’Strooss iwwerloossen." Eigentlech war d'Iddi, den Trottoir ze blockéieren, wann d’Demonstrante vun der Marche blanche erof op de Glacis gaange wieren. Et sollt éischter e symboleschen Akt sinn a méi eng Aktioun, wéi eng Demonstratioun.

Well dunn awer keen hinnen entgéint komm ass, sinn déi majoritär jonk Leit mat hire Plakater, wou "Covidioten net d’Strooss iwwerloossen" drop stoung, op d’Place de l’Europe gaangen. Sou sécher wéi do ware se wuel seelen an hirem Liewen. Iwwer 40 Polizisten hu si vun den anere Manifestante vun der Marche blanche ofgetrennt. Alles blouf awer friddlech. Net roueg blouf awer fir d’zweet Kéier d’Marche blanche, déi eigentlech eemol silencieuse war. Direkt 3 Riedner hunn d’Wuert geholl.

Hei en Abléck: "Haut hunn ech um franséische Radio héieren, datt d’Pandemie eriwwer ass", esou eng Biologin, déi sech un d'Leit geriicht huet. Weider huet si dës nach opgefuerdert, si sollen der Zitat: "Madamm Marie Paulette Leners" schreiwen, wat géint de Covid hëlleft, well dës gesot hätt, si wier verzweiwelt op der Sich no anere Mëttel wéi de Vaccin. Genannt gi sinn dann ënner anerem Vitamin C, D, Zénk an "antiparasitär Saachen". "Mir hunn e Vaccin, deen ass largement méi geféierlech wéi d’Krankheet", war dann eng weider Ausso vun engem ëmstriddenen Dokter.

Applaus an Zoustëmmung op, fir et fein auszedrécken, déi ënnerschiddlechst gewoten Theesen, mee och einfach Ligen. De Ruff no Fräiheet war iwwerraschenderweis net méi ze héieren. Just bei der Fro, wisou d’Leit manifestéieren, huet et geheescht, et wier ee fir de fräie Choix. An den RTL-Mikro wollt dat awer kee soen. De Reproche: D’Aussoe géinge souwisou just aus dem Kontext gerappt ginn.