Dëst ass d'Geschicht vun engem Gynekolog, deen a Frankräich e Beruffsverbuet krut an trotzdeem zu Lëtzebuerg konnt praktizéieren. Wéi ass dat méiglech?

Et war gesetzlech erlaabt… ënner bestëmmte Konditiounen. D'Gesetz soll nogebessert ginn, versprécht d'Gesondheetsministesch Paulette Lenert. De Fall vun der Véronique Scheins hirem Fraendokter wërft Froen op, ob d'Kontroll vun der Virgeschicht vu Medezinner zu Lëtzebuerg an an Europa gutt genuch ass. Et geet ëm Faiten, déi een net kal loossen.

E franséischen Artikel iwwert dës Enquête, mam Video vum Temoignage, fannt Dir bei de Kolleege vun RTL 5 Minutes.

"Ech wier bal gestuerwen"

Den 30. Mee 2018 wäert d'Véronique Scheins ni méi vergiessen. Si huet 54 Joer, spiert sech an top Form, ass Mamm, schafft als Independant. Nodeems si jorelaang am medezinesche Beräich geschafft huet, huet si sech 10 Joer méi fréi hir Passioun zum Beruff gemaach an ziicht Muppen a Kazen - eng Aarbecht, déi si de ganzen Dag op de Been hält.

Wéinst ongewéinlech staarke Menstruatiounsbluddungen ass si bei engem Dokter a Behandlung, deen hir nieft Medikamenter eng Hysteroscopie verschreift. Eng relativ banal ambulant Operatioun, bei där d'Gebärmutter mat enger Kamera ënnersicht gëtt. Si ass sech net sécher, ob si dës Interventioun wëll, huet kee gutt Gefill mam Dokter a wëll d'Operatioun ofsoen, ma léisst sech vun enger Infirmière iwwerrieden.

Den 30. Mäerz gëtt si dofir zu Montélimar ënner Narkos gesat. 2 Deeg méi spéit gëtt si 150 Kilometer méi wäit an engem anere Spidol, zu Lyon, an der Reha waakreg.

“Ech si waakreg ginn an ech wosst net, datt et 2 Deeg méi spéit wier. Ech hu geduecht, et wier direkt no der Operatioun. Dat wat mer immens Angscht gemaach huet, wéi ech waakreg gi sinn, hunn ech net mäi Mann gesinn, ma meng Mamm a mäi Meedchen, déi 300 Kilometer vun eis wunnen. Meng Mamm huet gekrasch an ech hunn et net verstanen a well mäi Mann net do war, hunn ech geduecht, datt mäi Mann en Accident hat. An dunn huet jidderee mer gesot nee, nee, du waars et, et ass der eppes geschitt."

"An dunn hu si mech direkt gefrot, datt ech mäi Bee sollt beweegen, datt ech meng Zéiwe soll beweegen. An du krut ech erkläert, datt et en Accident gouf, datt ech de Bauch opgemaach krut. Ech hu mäi Bauch ugepaakt an dee war effektiv enorm a voll mat Plooschteren. An dunn hunn ech gesinn, datt ech 2 enorm Narbe bannen a baussen um Been hat, vu méi wéi 15 Zentimeter. An ech krut e bëssen erkläert, datt ech eng Arteerie duerchgeschnidde krut, just eng, ech krut net gesot, datt ech einfach keng eenzeg Ven an och keng Arteerie méi op der rietser Säit hätt, datt ech bal gestuerwe wier an datt ech Chance hätt, mat mengem Been z'erwächen, well mäi Been bal hätt missen amputéiert ginn.”

Aus den Temoignagë viru Geriicht vun den aneren Dokteren an Infirmièren op der Plaz, grad wéi aus engem medezineschen Expertenavis geet ervir, wat geschitt ass. Den Dokter huet d'Instrument falsch agefouert, huet säi Geste virugefuer, obwuel hien näischt op der Kamera gesinn huet a vum Dokter, deen en assistéiert huet, vun enger Infirmière a vun engem Anästhesist op e méigleche Feeler opmierksam gemaach gouf. Dobäi ass eng enorm Bluddung entstanen, déi eréischt konnt gestoppt ginn, nodeems 2 aner Dokteren intervenéiert sinn. D'Véronique Scheins huet 5 Liter Blutt verluer.

D'Conclusioun vun den Experten ass kloer: esou en Ausmooss vun Zerstéierung vun de Gefässer op esou enger grousser Surface, déi e Risiko ze stierwe vu méi wéi 50% an e Risiko, dat rietst Been ze verléieren och vu méi wéi 50% mat sech bruecht huet, wier ausseruerdentlech an esou eng Komplikatioun wier nach net an der Literatur beschriwwe ginn.

"Ech si just nach mäin eegene Schied"

Bis haut muss d'Véronique Scheins mat uerge Sequellë kämpfen. Si kann net méi wéi e puer Minutte stoen oder goen an huet permanent Péng am Been. Si muss ronderëm d'Auer e Corset unhunn, fir hire Bauch zesummenzehalen. Tëschent hiren Nieren an hirer Blos ass eng Sonde, déi all 6 Méint muss ersat ginn – wouduerch si den Trauma vun hirer mësslongener Operatioun och ëmmer nees duerchliewe muss.

RTL

Zanter hirer Operatioun kann d'Véronique Scheins kaum nach stoen oder goen.

Ëmmer nees duerchliewen, muss d'Patientin dat Ganzt och viru Geriicht. Am Juni 2021 gëtt hiren Dokter eng éischte Kéier wéinst onfräiwëlleger Kierperverletzung verurteelt – zu 2 Joer festem Prisong a liewenslaangem Beruffsverbuet. Am Appell gëtt am Januar 2022 d'Beruffsverbuet confirméiert, d'Prisongsstrof gëtt op annerhalleft Joer fest an en halleft Joer Sursis erofgesat. Eng ongewéinlech streng Strof, sou den Affekot vum Dokter, Pascal-Pierre Garbarini, déi ee sech éischter am Fall vu bewosster Kierperverletzung géing erwaarden.

"Dat heescht, den Androck, deen dat gemaach huet war, datt hien der Madamm Scheins express wollt wéi doen. Dat ass net den Esprit vum Gesetz, et ass e medezinesche Feeler, et hätt ni dierfen esou eng Strof mat esou enger Schäerft gesprach ginn."

Och d'Affekotin vum Affer huet nach ni sou e strengt Urteel gesi fir dës Zort Faiten. D'Sophie Jonquet ka sech et awer besser erklären. Den Dokter hätt säi Geste net ënnerbrach, obwuel hien e puer Mol op e méigleche Feeler opmierksam gemaach gouf. Viru Geriicht hätt een net den Androck gehat, datt hie sech der Gravitéit vu sengem Feeler bewosst wier.

"Net nëmmen huet hien dat gemaach, wat e gemaach huet, mee en plus huet hie Schwieregkeeten, et unzëerkennen. Hien erkennt et nëmmen hallefhäerzeg un, dat heescht, wann hie muer virun enger neier Patientin wier an dee selwechten Acte géing maachen, wier et méiglech, datt dat selwecht dobäi erauskënnt, well hie sech iwwerhaapt net a Fro stellt."

Nom Urteel an Appell huet d'Defense d'Cassatiounsgeriicht mat der Affär saiséiert. Do gëtt gekuckt, ob e juristesche Feeler gemaach gouf, d'Faiten u sech ginn awer net méi a Fro gestallt. Eigentlech rechent den Affekot domat, datt säi Client op fräiem Fouss bleift bis d'Cassatioun deliberéiert huet. Ma den 10. Mäerz gëtt de Gynekolog opgrond vun engem europäeschen Haftbefeel vu Lëtzebuerg u Frankräich ausgeliwwert an ass zanterhier am Prisong.

D'Véronique Scheins ass haut nach an enger Geriichtsprozedur fir Schuedensersaz vum Spidol ze kréien, dat de Fraendokter beschäftegt huet, deen iwwerhaapt net verséchert war.

Lien mat Lëtzebuerg

Nodeems de Gynekolog 2019 vum franséischen Ordre médical ausgeschloss gouf an e Beruffsverbuet a Frankräich krut, huet hie sech zu Lëtzebuerg installéiert. Sengem Affekot Pascal-Pierre Garbarini no duerft hien dat.

"Doriwwer eraus hat hien zu Lëtzebuerg d'Recht, an der Gynekologie ze schaffen, awer hien hat net d'Recht, Operatiounen ze maachen. Et war am Respekt mat sengem Contrôle judiciaire."

Fir en Deel vun där Zäit, an där de Gynekolog hei am Land gewunnt a geschafft huet, hat hien awer d’Obligatioun um franséischen Territoire ze bleiwen, geet aus dem Arrêt vun der Cour d'Appel vu Grenobel ervir.

D'Sophie Jonquet, Affekotin vum Affer, huet wéineg Versteesdemech, datt de Gynekolog hei am Land schaffen duerft.

"Perséinlech fannen ech, datt een hei hätt kënnen de Precautiounsprinzip benotzen an him provisoresch verbidden, z'exerzéieren, bis datt déi franséisch Justiz hiert Urteel gemaach hätt. A priori ass de Lëtzebuerger Gesondheetsministère iwwert d'Situatioun a Frankräich informéiert ginn an et huet een him awer seng Aarbechtsautorisatioun gelooss."

De Lëtzebuerger Gesondheetsministère hätt Kenntnis vum Fall an hätt direkt reagéiert. Esou heescht et an der Äntwert op eng parlamentaresch Fro am Oktober 2020, nodeems d'Affär an der franséischer an an der Lëtzebuerger Press thematiséiert gouf. De Collège médical wier mat enger Analys beoptraagt ginn.

Mëttlerweil ass d'Analys ofgeschloss, wéi d'Ministesch an hirer Äntwert op eng weider parlamentaresch Fro vum Piratendeputéierte Sven Clement de 24. Mäerz schreift.

"D'Konklusioun dovun ass, datt dat ofgeännert Gesetz vum 29. Abrëll 1983 iwwer den Exercice vun den Medezinner, Zänndokter an Veterinären ugepasst muss ginn, fir eng nei gesetzlech Reegel anzeféieren. Dës Reegel gouf virgesinn, datt am Fall, wou eng Persoun, déi zu Lëtzebuerg eng Zouloossung an engem vun deenen dräi Beruffer huet, an an engem aneren Land eng Strof géint dës gesprach ginn ass, am Kader vun där hir Zouloossung suspendéiert ginn ass, verléiert si hiert Recht zu Lëtzebuerg z’exerzéieren, fir déi selwecht Period."

Reaktioun vun der Gesondheetsministesch Paulette Lenert

D’Gesondheetsministesch Paulette Lenert huet um Méindeg Moien am RTL-Interview reagéiert.

Paulette Lenert:Jo, dat ass dee sougenannte Metzler, an deen Numm huet en net gestuel, mengen ech, wann een den Dossier kuckt. Dee Mann huet hei zu Lëtzebuerg seng Geneemegung 2017 kritt, dat ass wichteg dat kloer ze stellen, dat war vläicht virdrun e bësse mëssverständlech am Reportage, dat heescht virun deene Faiten huet hien hei seng Geneemegung bei eis kritt gehat an dann huet een 2 Joer Zäit fir sech hei z'etabléieren.

Dat heescht en ass sech etabléiere komm nodréiglech. An dee Moment gëtt dat net nach eng Kéier gekuckt. Mir hu Kenntnis kritt vun deene Faiten iwwert d'Press, dat muss ech sou soen, iwwert déi éischt Condamnatioun, déi komm ass 2018 (Umierkung vun der Redaktioun: Am September 2018 krut den Dokter e partiellt Verbuet z'exerzéiere vun engem Joer).

Wéi mer dat bis gewosst hunn, hu mer natierlech och direkt gehandelt, do hu mer eise Conseil médical domat befaasst an dunn ass och eng bedéngten Autorisation d'exercer zu Lëtzebuerg ausgeschwat ginn am selwechte Sënn wéi zu deem Zäitpunkt och a Frankräich. Dat heescht, hien huet och hei a Lëtzebuerg net dierfe chirurgesch méi aktiv sinn wärend enger Zäit.

A wéi mer dat definitiivt Urteel kritt hunn, dat krute mer offiziell zougedroen, dunn ass och hei rëm eng Kéier den Dag selwer hunn ech dat och weider ginn un de Collège médical, den Avis ass komm, an ech kann haut rassuréieren, datt dee Mann seng Geneemegung och elo zréck gezu kritt huet, dat ass elo gereegelt. Mee mir sinn hei tributär natierlech vun den Informatiounen aus dem Ausland, do gëtt et Systemer, wou verschidde Saache matgedeelt hunn, wa mir déi Informatioun hunn, da kënne mer och handelen.

Annick Goerens: Dir schwätzt do déi europäesch Plattform un, wou Informatiounen tëschent den EU-Staaten ausgetosch ginn, déi d'Doktere concernéieren, dat ass deen Internal Market Information System. Dat heescht, deen ass och net wierklech op der Héicht awer?

Paulette Lenert: Ech kann et net definitiv beurteelen. Et ass ëmmer séier gesot de System ass net op der Héicht, et muss ee scho genee kucken,
wat do muss matgedeelt ginn.

Annick Goerens:De Mann hat nämlech och schonn Antecedanten an Däitschland (Umierkung vun der Redaktioun: Wéi aus dem Arrêt vun der Cour d’Appel ervir geet sinn am europäesche Casier vum Dokter 2 Condamnatiounen, eng vun 2016 wéinst Bedruch an Däitschland an eng vun 2017 wéinst Verstéiss géint d'Reegele vun der Securité routière an der Schwäiz.)

Paulette Lenert: Jo. Do muss ech dovun ausgoen, datt dat net virlouch. Ech si selwer elo net am Dossier gewiescht 2017 wéi déi éischt Geneemegung hei komm ass. Do ginn déi normal Screeninge gemaach. Ech ka just feststellen, datt et elo bei der definitiver Condamnatioun huet dat gutt geklappt, déi hu mer ganz schnell, bannent e puer Deeg hei matgedeelt kritt.

Wéi dat awer elo an de Jore virdru war, ass schwéier soen. D'Systemer sinn ëmmer perfektibel. Et gehéiert dozou, wann een eppes en place huet, och op europäeschem Plang, datt een dat da signaléiert, wann et net gutt fonctionéiert, datt ee sech do eng Stëmm gëtt an deene Gremien, fir ze kucken, wéi een dann deen Austausch ka verbesseren. Dat hei weist och erëm eng Kéier, wéi wichteg déi europäesch Zesummenaarbecht ass op alle Pläng, och am Gesondheetssystem, da kënne mir schnell handelen, dat ass net de Problem, mee nach muss een déi Informatiounen dann hunn.

Annick Goerens:Ass dann an Ären Aen d'Kontroll, déi aktuell gemaach gëtt, awer gutt genuch hei am Land?

Paulette Lenert: D'Kontroll ass an der Rei, esou wéi se gemaach gëtt. Et misst ee sech effektiv befaasse mat deem System, deen EMI-Systeem deen der ugeschwat hutt, dee concernéiert sämtlech reglementéiert Beruffer, net just den Dokteschberuff. Ech wäert mech sécherlech och an nächster Zäit schlau maachen, wéi do d'Erfarunge bei de Kolleegen am Ausland sinn. Leider waren aner Saachen elo um Ordre du jour dës Woch, wou mer eis als Gesondheetsministere getraff hunn, mee et wäert ee vun deene Sujete sinn, déi ech sécher wäert mat menge Kolleegen aus dem Ausland och verdéiwen, fir ze gesinn, ob do Handlungsbedarf ass oder net.

Ass Iech eppes geschitt?

Hutt Dir selwer Erfarunge mat medezinesche Feeler oder gynekologescher Gewalt gemaach? Dir kënnt Iech an aller Diskretioun mellen op fanny.kinsch@rtl.lu.