Dat aus Protest géint d'Decisioun vum amerikanesche Supreme Court vum leschte Freideg, bei deem d'Recht op Ofdreiwung gekippt gouf.

Eng 150 Leit sinn dem Opruff vum Planning Familial zesumme mam CID Fraen an Gender, dem Conseil National des Femmes an der Plattform JIF nokomm an hunn um Lampertsbierg fir d'Rechter vun de Frae protestéiert. „My Body, my Choice“, also „mäi Kierper, mäi Choix“ hunn d'Manifestante geruff.

SIT-IN virun der US-Ambassade: Raphaelle Dickes (LIVE)
RTL

© Domingos Oliveira / RTL

Mëttlerweil sinn et jo 16 vun am ganze 50 Staaten, déi entweder annoncéiert oder schonn ëmgesat hunn, dass een net méi dierf ofdreiwen. Mol net am Fall vu Vergewaltegungen oder Inzest sinn Ofdreiwungen dann erlaabt.

Dofir hunn och elo eng ganz Rei grouss Entreprisen, dorënner Google, Microsoft, Patagonia a Warner Brothers annoncéiert, dass si all d'Käschte wäerten iwwerhuelen, wann hir Employéeë fir eng Ofdreiwung an een anere Bundesstaat musse fueren. Dat mellt d'New York Times. New York, Kalifornien, Washington a Massachusetts hu schonn ugekënnegt, dass si weiderhi bei hirer liberaler Haltung wäerte bleiwen an Ofdreiwungen do wäerten erlaabt sinn.

An der Chamber gouf en Dënschdeg iwwerdeems eng symbolesch Resolutioun mat enger grousser Majoritéit ugeholl, déi de gesetzleche Kader vum Avortement zu Lëtzebuerg protegéiere soll.

Ofdreiwungsrecht an der Constitutioun verankeren

D’Recht fir ofzedreiwen ass och d’Recht op Selbstbestëmmung. D’Frae kruten dëst net just an den USA oferkannt, mee virun 2 Joer schonn am EU Memberstaat Polen, wou d’Ofdreiwung ouni medezinesch Indikatioun verbueden ass.

Och wann d’Situatioun hei net esou akut wär, misst een handelen, ier et ze spéit wier, an d’Ofdreiwungsrecht an der Constitutioun verankeren. Dat war en Dënschdeg d’Fuerderung vun de sëllegen Organisatiounen op der Plaz.

"Wann esou e Recht an der Constitutioun ass, ass et e bleiwend Recht an e Recht fir ëmmer. Dat ass dat wat mir fuerderen", esou d'Ainhoa Achutegui, Presidentin vum Planning Familial.

D’Ofdreiwung zu Lëtzebuerg muss bis déi 14. Schwangerschaftswoch méiglech sinn, fir all d'Fraen - ob sozialverséchert oder net. Dat fuerdert de Planning familial. Déi dräi Deeg Reflexiounszäit missen ofgeschaaft ginn an all Behënnerung un dësem Recht bestrooft ginn, fuerdert de Planning familial.