Viru fënnef Joer war d'Crèche "Léiwe Léiw" zu Bous mat Effet immediat zougemaach ginn.

En Dënschdeg de Mëtteg ass um Stater Geriicht de Prozess géint déi haut 53 Joer al fréier Directrice a Gerante vun enger Crèche zu Bous ugaangen. Hier gëtt premeditéiert Kierperverletzung géint 15 Kanner aus der Crèche an géint op mannst dräi Salariéeë vun dëser virgehäit.

Prozess ëm d'Crèche "Léiwe Léiw" / Rep. Diana Hoffmann

D'Crèche mam Numm «Léiwen Léiw» war am Oktober 2017 vum Educatiounsministère zougemaach ginn, nodeems de Parquet eng Enquête lancéiert hat.

D'Faiten ëm déi et um Geriicht geet, solle sech tëscht 2014 a Mëtt Oktober 2017 zougedroen hunn. Een dovunner ass, dass e Kand, dat sech duerch eng waarm Flëssegkeet um Been verbrannt hat, net séier genuch bei den Dokter bruecht gi wier. Dowéinst hätt et méi laang gedauert, bis d’Wonn geheelt war.

Um éischten Dag vum Prozess huet den Affekot vun der Ugekloter virun allem a Fro gestallt, dass d’Affär virun enger Chambre criminelle sollt verhandelt ginn. Et géing hei keng Strofdot virleien a gewësse Prozedurë wieren ignoréiert ginn. 16 weider Faiten, déi der fréierer Directrice reprochéiert ginn, géingen doriwwer eraus virun eng Chambre correctionnelle gehéieren an net virun eng Chambre criminelle.

D'Vertriederin vum Parquet war awer do anerer Meenung. Et misst een dëser Affär fir d'éischt op de Fong goen, ier een dat bewäerte kéint.

Zu der Plaidoirie vun der Affär duerch d’Defense vun der Ugekloter ass et en Dënschdeg net méi komm. De Riichter huet den Affekot awer direkt e puermol drop higewisen, dass hie scho dobäi wär d’Affär ze plaidéieren, an net just d’Prozedur.

24 Sëtzungsdeeg sinn ugesat, sou dass de Prozess sech wäert bis an dat nächst Joer zéien. Eng 30 Zéie si gelueden. Ausserdeem sollen een Expert an 21 Partie Civile gehéiert ginn.