D'Kanner wieren ageschüchtert ginn an d'Personal krut vun der Cheffin Instruktiounen, déi hinnen no net am Sënn vun de Kanner gewiescht wieren.

Déi fréier Gerante an Directrice vun der Crèche "Léiwen Léiw" zu Bous huet selwer mat Momenter schockéiert gewierkt, iwwert dat wat hir reprochéiert gëtt. Déi meescht Zäit hat si de Kapp an hiren Hänn gestäipt. D'Fangeren hat si iwwer hir Ouere geluecht, wéi wa si sech dës wéilt zouhalen, fir näischt ze héieren. Heiansdo huet si och de Kapp gerëselt, geseufzt oder hirem Affekot e puer Wuert an d'Ouer gepëspert.

D'Reprochen, déi fréier Salariéen hir géigeniwwer en Freideg de Moien um Stater Geriicht gemaach hunn, waren zolidd. Si wier haart, aggressiv a kal mat de Kanner an de Leit ëm sech gewiescht. Direkt e puer vun den Educatricen hu vu schlëmmen Zeenen erzielt, déi sech beim Mëttegiessen an der Crèche sollen ofgespillt hunn. Kanner wiere gezwonge ginn, séier ze Iessen, souguer wann d'Iessen nach ze waarm war. Dobäi hätte si och net kënne wielen, wat si wéilten iessen, an ouni Léift de Läffel an de Mond gestach kritt. Dat souguer, wa si gekrasch hunn an net méi wollten iessen. Emol hätt si e Kand, wat d'Iessen net ofgeschléckt hat, forcéiert, dëst an Zopp ze späizen an dono nees alles ze iessen.

Weider Reprochë vun den Zeie sinn, dass d'Wëndelen an hiren Aen net ëmmer gewiesselt goufen, wann dat hätt misste sinn. D'Kanner wiere just zu bestëmmten Zäite gewéckelt ginn, well et dorëms gaange wier, fir ze spueren. D'Mamm vun engem vun de Kanner aus der Crèche huet ausgesot, dass d'Wëndel dacks "struppevoll" war, wa si hiert Kand ofgeholl huet.

Eng aner sot, dass hiert Meedchen op eng Kéier gekrasch huet, wann et sollt de Läffel an de Mond huelen a sech och kee Wutz méi an d'Hoer wollt maache loossen. En anert sot, d’'"Madamm" hätt et mat den Hoer gezunn.

"Madamm" esou hunn och e Freideg all déi fréier Salariéen déi 53 Joer al Ugeklote genannt. Zesummegefaasst ënnerstelle si hir en dominant an aggressiivt Verhalen. Séier hätt si ugefaangen, ze jäizen an alles hätt ëmmer misste genau no hirem Plang verlafen.

Och der Ugekloten hire Mann huet musse viru Gericht aussoen. Jo, si hätt heiansdo eng haart Stëmm, mee et wier jo och kee perfekt. "Si ass selwer Mamm vun dräi Kanner an ech hunn ni gesinn, dass si brutal vis-à-vis vu Kanner war", sou de Mann am Zeiestand.

E méigleche Beweis, fir eng schlecht Stëmmung an der Crèche, ass awer, datt d'Personal permanent gewiesselt huet. Vill vun den Educatricen, déi e Freideg ausgesot hunn, hu just kuerz do geschafft. Eng ass schonn no dräi Deeg vun der Directrice erausgehäit ginn. Dat, well si sot, dass si net d'Accord wier, wéi de Kanner d'Iessen eragestach géing ginn. Och hätt si net emol däerfen e Kand, wat gekrasch huet, op den Aarm huelen. Et wier ëmmer iergendwéi eppes Brutales dobäi gewiescht, sou d'Educatrice. Zum Beispill, wéi d'Gerante e Kand par Force gezwongen hätt, e Stéck Banann ze iessen, wärend dëst gekrasch a gegierkst hätt. Dat, wat si an där kuerzer Zäit gesinn huet, huet si déif schockéiert.

Ma net just si. Zwou jonk Educatricen, déi am Ufank vun hirer Karriär stoungen, hunn no engem hallwen Dag Prouf an der Crèche eng Aarbechtsoffer ofgeleent. "D'Kanner hu sech net normal beholl a waren ze brav. Si si laang Zäit op der Plaz sëtze bliwwen, wat net normal ass. Vill kleng Kanner kënnen dat nämlech net", sou déi jonk Fra. Och eng anerer Beruffsufängerin huet d'Joboffer net ugeholl. D'Kanner hunn op si intimidéiert gewierkt an och si hätt sech an der Crèche net wuel gefillt.

E Gefill, wat och vill Eltere gedeelt hunn an dowéinst probéiert hunn, séier eng aner Crèche ze fannen. Komesch ass hinne virkomm, dass si ni den Espace gesinn hunn, wou d'Kanner gespillt hunn an och ëmmer just mat der Gerante a Kontakt waren. Aner Elteren hunn d'Crèche awer net a Fro gestallt. Zum Beispill d'Mamm vum klenge Kand, wat eng Verbrennung um Been duerch eng waarm Zopp erlidden hat. Ausser dësem Incident war hir näischt Aussergewéinleches opgefall. Wat méiglecherweis och mam ganz jonken Alter vum Kand zesummenhänkt. An der Crèche waren zum Ament vun der Fermeture am Oktober eng 15 Kanner tëscht 0 an 4 Joer ugemellt. D'Crèche war 2014 opgaangen.

E Freideg ass am Allgemengen e Bild gezeechent ginn, wat déi Ugeklote staark belaascht. Huet d'Fra vu 53 Joer sech der virsätzlecher Kierperverletzung u Mineure schëlleg gemaach, wéi hie reprochéiert gëtt? Oder weist sech d'nächst Woch, dass déi Saach ganz anescht war? Da kommen nämlech d'Zeien drun, déi vun der Defense vun der Ugeklote geluede sinn.

Am Ufank ware 24 Sëtzungsdeeg ugesat. Ma elo gesäit et esou aus, wéi wann de Prozess scho kéint an enger Woch op en Enn kommen.