E Samschdeg war den Ausseminister eisen Invité an der Emissioun "Background am Gespréich".

Et wär wierklech wichteg, d'Kanner séier aus de griichesche Flüchtlingscampen erauszehuelen. Dat huet d'Flüchtlingshëllefswierk vun der UNO, d'UNHCR, nach eemol rappelléiert. Ronn 5.000 Mannerjäreger sëtzen do fest, eleng. 90 Prozent dovu si Jongen aus Afghanistan. Dat sot de Jean Asselborn an eiser Emissioun Background am Gespréich.

Zesummefaassung vum Background am Gespréich
E Samschdeg war den Ausseminister eisen Invité an der Emissioun "Background am Gespréich".
De Resumé vun der Emissioun - Rep. Fanny Kinsch

De Lëtzebuerger Ausseminister hat scho virun engem Mount d'Initiativ lancéiert, fir Kanner opzehuelen. D'EU-Kommissiounspresidentin Ursula von der Leyen huet e Freideg den Owend um ZDF gemengt, Lëtzebuerg kéint warscheinlech schonn nächst Woch déi éischt ophuelen. Dat wär optimistesch fënnt den Ausseminister, mä hofft awer gläichzäiteg, dass et net méi all ze laang dauert. Mir sinn e Land, wat een Häerz huet. Dat musse mer weisen a mam gudde Beispill virgoen.

Sou eng Kris, wéi déi d'Corona-Pandemie iwwerdeems, huet den Ausseminister Jean Asselborn, deen zanter 16 Joer op senger Positioun ass, nach net matgemaach, dat wär sécher. Zum Beispill wär den Tsunami 2004 zwar, wat d'Zuel vun den Affer ugeet, mat 230.000 bei wäitem méi schlëmm gewiescht, mä hei wären awer mëttlerweil op d'mannst 193 Länner concernéiert. Dat hätt hien esou nach net gesinn, sou den Ausseminister.

Wa mer et packen, duerch den Abrëll mat dëse Restriktiounen duerchzekommen, da kënne mer d'Liicht um Enn vum Tunnel schonn gesinn. Donieft wär et besser, wann d'Nato-Länner, amplaz 2% vum PIB an d'Militärausrëschtung ze stiechen, dës Suen an d'Fuerschung géingen investéieren, sou nach den Ausseminister.

Background am Gespréich: Jean Asselborn

Hie géif hoffen, datt Däitschland seng Grenzen zu Lëtzebuerg geschwënn nees géif opmaachen, dat sot de Jean Asselborn gëschter an eiser Emissioun Background. Op béide Säite vun der Grenz wieren d'Leit am Confinement, d'Mesure géif also guer näischt bréngen, a se géif deenen déi schaffen d'Liewen awer schwéier maachen.

"Ech hu misste kämpfen, datt mer Veianen an Dasburg opkréien, soss hätten déi Leit missten 100 km Ëmwee maache fir op hir Aarbecht ze kommen. Dat ass gaangen. Elo kennt d'Geschicht vu Bollendorf zum Beispill, en Duerf wat zesummegewuess ass op béide Säiten, déi Leit déi déi aner Säit vun der Our wunnen, déi hunn et schwéier, mat den Traktere mussen se 20 km fueren an nees 20 km zréck, dann ass den Tank scho rëm bal eidel."

E vill méi grousse Problem an der EU den Ament wier allerdéngs Ungarn, wou wéinst der aktueller sanitärer Kris en Ausnamezoustand ausgeruff gouf, deen an der Zäit net limitéiert ass a keng parlamentaresch Kontroll zouléisst. Dat dierft an der EU net ze sinn an do wier och d'Kommissioun gefuerdert, esou de Jean Asselborn.

"Wann d'Kommissioun seet, legal kenne mir näischt dogéint maachen, da si mer net méi op där Ligne, déi de Jean-Claude Juncker hat als Kommissiounspresident, dee gesot huet "Mir sinn eng politesch Kommissioun, an déi politesch Kommissioun muss natierlech och an esou enger Saach sech op jidder Fall domat befaassen". Wann se sech net domat befaasst, wa se dat lafe léisst... d'ganz Welt schwätzt vun Ungarn, d'ganz Welt seet, dat geet bis an Amerika, dat geet bis an Asien, d'ganz Welt seet, wat Ungarn do mécht dat geet net."

De Problem léich allerdéngs net nëmme bei der Kommissioun, ma virun allem bei de Memberstaaten. Datt d'Kommunikatioun am Conseil wéinst der sanitärer Kris den Ament digital ofleeft wier do net grad hëllefräich, fënnt de Lëtzebuerger Chef-Diplomat.

"Et ass keen Dialog, wéi wann ee physesch beienee wier an et kéint een doriwwer diskutéieren. Ech mengen och datt et immens schwéier ass mat deene Visio-Konferenzen do, fir e Konsens ze fannen, wann e wierkleche Problem besteet. Et kann ee jo an et kann een nee soen. Dat geet alles, et gesäit ee sech och iergendwéi, mee bon, et ass eppes wat mer net schmaacht - Aussepolitik huet och eppes mat deenen ze dinn, déi Aussepolitik maachen, dat heescht mam mënschleche Kontakt, et ass net nëmme just Positiounen déi op engem Pobeier stinn an déi rofgerattert ginn."

Op d’Fro, ob hien an aner Regierungsmemberen elo net getouft wieren, well d’Paulette Lenert fir hir Krisegestioun gelueft gëtt, war et dës Äntwert vum Jean Asselborn: "D'Paulette Lenert mécht hir Saach exzellent an doriwwer sinn ech houfreg". Op d’Fro dann, ob si misst LSAP-Spëtzekandidatin ginn, huet hie gelaacht. Si wier lo Spëtzekandidatin am Gesondheetsministère an do bräicht ee si elo. All de Rescht kéim méi spéit. Dogéint wier hien op kee Fall: "Wouhier?", sou de Jean Asselborn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.