An der Emissioun "Background am Gespréich" e Samschdeg goung et ëm de Sujet "Energie".

Et ass den Ament eng schwiereg Situatioun a mir mussen zesumme schaffen, fir den Energiemaart ze berouegen. D'Thema Energie stoung e Samschdeg am Mëttelpunkt vun der Emissioun Background. 3 Invitéen waren am Studio: den Energieminister Claude Turmes, de René Winkin, Direkter vun der Fedil, d'Stëmm vun der Industrie, an de Martin Wienands, Gerant vum Stroum- a Gasfournisseur Electris.

Speziell de Gasmarché ass schwiereg de Moment an dat wierkt sech och op de Stroum an d'Stroumpräisser aus. Et wär eng grouss Ongewëssheet do, mä prinzipiell wär awer genuch Gas a Stroum do. D'Gasspäicher sinn awer manner gutt gefëllt wéi soss déi Joren. Do wëll de grénge Minister Turmes zesumme mat den Nopeschlänner derfir suergen, datt an Zukunft virum Wanter déi Gasspäicher gefëllt sinn. Sou kéint een de Gasmarché berouegen.

An der Industrie géif et schonn eng grouss Veronsécherung ginn. Glécklech wär e Betrib, dee sech zejoert scho mat Gas a Stroum fir dëst Joer agedeckt hätt, sou de René Winkin.

Eis 3 Invitéë ware sech eens, datt ee keng Enkpäss misst fäerten. De Martin Wiendands huet awer gemengt, et bräicht ee generell méi eng onofhängeg Versuergung. Politesch Decisioune géife meeschtens hannert den Entwécklunge stoen an dofir wär d'Politik gefuerdert a misst agräifen, fir de Marché ze berouegen.

De gréngen Energieminister wëll mat den Nopeschlänner zesummeschaffen, och derfir suergen, datt d'Lëtzebuerger Industrie kann erneierbare Stroum bei auslännesche Projete direkt kafen. Mä de Stroummarché misst politesch reguléiert ginn, soss géif de Klima futtigemaach ginn. D'Betriber géifen awer bei der «Energiewende» gehollef kréien an och de Bierger géif ënnerstëtzt ginn.

Mir hunn awer net an deem Mooss ugeknipst wéi mer ausgeknipst hunn, stellt de René Winkin fest. Et wär net genuch erneierbare Stroum do. D'Industrie géif och d'Klimaziler net a Fro stellen, dat misst gemaach ginn, mä et wär awer schwiereg an deier fir d'Betriber.

Bei den erneierbaren Energien huet d'Wandenergie hei am Land dat gréisste Potential. Electris plangt zanter méi wéi 16 Joer un engem Wandpark. Mam 4. Minister elo. Mä dat wär ganz schwiereg. Naturschutz an erneierbar Energië géife sech an de Féiss stoen, fënnt de Martin Wienands. De Minister Turmes huet geäntwert, datt een elo e Kompromëss fonnt hätt.

All Dag géif méi erneierbar Energie hei am Land produzéiert ginn. Grouss Projeten an der Photovoltaik géifen entstoen, och Industriehalen, Parkplazen, Baueren a Gemenge géife matmaachen. An och de Bierger ka selwer Stroum produzéieren.

Solaranlagen op groussen Hale si méi effikass, ënnersträicht de Minister Turmes, dee sech awer och iwwer all privat Initiativ freet. De Martin Wienands vun Electris mengt par Konter, datt et awer wichteg wier, wa jidderee säin Deel Stroum produzéiert, zum Beispill de Stroum fir den Auto. Dat géif och d'Akzeptanz fir d'Energiewende z’erhéijen. Allgemeng géifen déi erneierbar Energie (Wandrieder, Solarpanneauen) d'Stroumproduktioun vill méi visibel maachen a méi no bei de Bierger réckelen.

Atomkraaft als Iwwergangsléisung oder souguer nohalteg Energie...do ass Lëtzebuerg net domat d'Accord. De Minister Turmes bleift derbäi, datt den Atomstroum keng Zukunft huet. Nei Reaktere baue géif och éiweg daueren. D'Propos vun der Kommissioun wär ganz ondemokratesch komm. Lëtzebuerg wëll zesumme mat Éisträich dogéint kloen, wann d'Kommissioun dee Wee wëll goen an d'Atomkraaft als nohalteg astuuft.

D'Elektromobilitéit war kuerz virum Autosfestival och e Sujet. Genuch Stroum wär do, d'Reseaue géifen dat packen. Mä an de ganze System misst awer investéiert ginn, wann d'Elektromobilitéit weider staark wiisst. D'Elektromobilitéit géif just Sënn maache mat erneierbaren Energien.

Background am Gespéich: Thema Energie

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.