An der Emissioun "Background am Gespréich" war e Samschdeg de Wirtschaftsminister den Invité.

Fir der Präisexplosioun um Logementsmaart konkret entgéint ze trieden, lancéiert de Wirtschaftsminister eng Initiative fir d'Commissioun bei Vente fir Immobilienagencen erofzesetzen. Aktuell läit deen Taux bei 3%. Via Réglement Grand-Ducal wëll de Franz Fayot eng Brems fir dës Kommissiounen aféieren, dat sot den LSAP-Minister an der Emissioun Background.

Extrait Franz Fayot iwwer Kommissioune vun Agencen

Un der Debatt ëm d'Impfflicht seet de Franz Fayot, datt et hie stéiert, wann dës Obligatioun ondifferenzéiert als "Allheelmëttel" duergestallt gëtt. Et misst een d'Grondrechter am Aa behalen, grad wéi d'Proportionnalitéit vun esou enger Mesure. Seng Partei géif allemol d'Decisioun matdroen, op de Wee vun enger zäitlech limitéierter Obligatioun ze goen.

Wat den 33 Hektar groussen Terrain um Rouscht ugeet, op deen Google wëll en Datazenter bauen, sou gleeft de Wirtschaftsminister weider un deen Dossier, e géif nach ëmmer gutt zu der Lëtzebuerger Wirtschaftsstrategie passen.

Extrait Franz Fayot iwwer Google

Am Dossier ëm d'fréier Galvalange-Fabrick zu Diddeleng, wou eng 250 Leit schaffen, weess de Minister, datt de Grupp vun Sanjew Gupta "Liberty Steel" um Wackelen ass. D'Beleegschaft wollt de Franz Fayot awer rassuréieren, datt alles gemeet gëtt, fir dëse Site z'erhalen.

Och d'Personal vum Glas-Produzent Guardian huet den Ekonomiesminister berouegt. Och wann den Uewen an der Fabrick zu Käerjeng e Joer éischter ausgeet wéi geplangt. Aktuell waart d'Direktioun d'Evolutioun um Energiemaart of, fir ze decidéieren, ob nei zu Käerjeng investéiert gëtt.

Déi konjunkturell Situatioun gëtt aktuell impaktéiert duerch d’aktuell Hausse vun de Präisser vu fossillen Energien, Liwwerprobleemer vu Material, dem Inflatiounsdrock a Probleemer, fir déi néideg gebraucht Leit an de Betriber ze rekrutéieren. Dës Aschätzung gëtt de Minister Fayot, dee vun engem "Stuerm" schwätzt, duerch deen d'Wirtschaft lo misst goen.

Wat d'Steierpolitik ugeet, sou kënnt nach dës Legislaturperiod souwuel eng Reform vun der Grondsteier an och eng Spekulatiounssteier op eidel Terrainen a Wunnengen. Och d'Besteiere vu grousse private Verméigen, déi 2005 ofgeschaaft gouf, ass nees fir d'LSAP e Sujet a wäert am Walprogramm stoen.

Extrait Franz Fayot iwwer Verméigenssteier

Och wann et statutaresch méiglech ass, datt och e Regierungsmember kann LSAP-Parteipresident ginn, sou wëll de Franz Fayot dee Posten net nach emol iwwerhuelen. Sécher wäert eng Fra zur LSAP-Partei-Duebelspëtzt gehéieren, dëst dierft d'Deputéiert Francine Closener sinn.

Aktuell ass d'LSAP amgaangen um Programm fir d'Superwaljoer 2023 ze schaffen. Eng Partei, déi sech dem RTL-Invité no fir den Zesummenhalt an der Gesellschaft auszeechent an datt et jiddwerengem am Land soll gutt goen. D'Ambitioun fir d'LSAP wier, fir an der neier Regierung de Staatsminister ze stellen.

D'ADR huet de Franz Fayot mat der AFD verglach, eng opportunistesch an oppe rietsextrem Partei, déi géif Sënnebéck sichen fir Saachen, déi am Land schif lafen, an eng identitär Politik géif bedreiwen.

Extrait Franz Fayot iwwer ADR
Background am Gespréich vum 29. Januar 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.