D’Oppositioun huet e Samschdeg aktuell politesch Dossieren an der Emissioun Background am Gespréich um Radio kommentéiert.

D’Affär Dieschbourg an alles, wat drun hänkt, d’Tripartite-Mesuren an den éiwege Problem Logement waren e puer Themen an der Emissioun e Samschdeg.

Invitéeë waren d’Co-Fraktiounspresidentin vun der CSV Martine Hansen, den ADR-Deputéierte Fernand Kartheiser, d’Myriam Cecchetti Deputéiert vun déi Lénk a vun de Piraten den Deputéierte Sven Clement.

Background am Gespréich vum 14.05.2022

D'Prozeduren mussen agehale ginn, dat sot den ADR-Deputéierte Fernand Kartheiser zu der Affär Dieschbourg an eiser Emissioun Background. Do huet de Mëtten d'Oppositioun aktuell politesch Dossieren kommentéiert.

Fir de Piraten-Deputéierten Sven Clement géing d'Chronologie vun de Fait'en dorop hindeiten, dass eppes net géing stëmmen. Et dierft net sinn, dass op e Prozedurfeeler higeschafft gëtt, fir déi Saach aus dem Wee ze raumen. Deen Doute huet och d'Martine Hansen an de Raum geheit.

Et géing evitéiert ginn, fir eng uerdentlech Enquête ze maachen, esou nach déi lénk Deputéiert Myriam Cecchetti. Si freet sech, wat da konkret geschitt, nodeems de Verfassungsexpert Luc Heuchling gehéiert gouf. Dorop hätt et nämlech nach keng Äntwert ginn.

Punktuell Verfassungsännerungen, déi fir méi Kloerheet gesuergt hätten, hätte kënne gemaach ginn. Ma dat war awer an der Vergaangenheet net de Fall, an elo misst ee mat deem schaffen wat een huet, do waren sech d'Oppositiouns-Deputéierten eens. Ze soen, dass d'Prozedur veraalt wier, wier kee valabelt Argument, esou de Fernand Kartheiser.

De Sven Clement huet da kritiséiert, dass just een Expert soll gehéiert ginn am Chamberbüro an an der Conférence des présidents. D'Oppositioun géing d'Demande fir eng extern Persoun an eng Commissioun anzelueden dacks net accordéiert kréien, mam Argument, dass verschidde Perspektiven solle gehéiert ginn. Dass dat elo op eemol anescht ass, wier Politique politicienne, esou den Deputéierte Sven Clement vun der Piratepartei.

Et wier nëmmen am Interêt vun der concernéierter Ex-Ministesch Carole Dieschbourg, dass séier tranchéiert gëtt. Mam Wee, deen elo notamment vun der Grénger Partei ageschloe gouf, ginn awer just Konfusioune gestreet, esou d'Myriam Cecchetti. Déi Lénk Deputéiert huet gewarnt, dass dat net onbedéngt d'Vertrauen an d'Politik géing stäerken.

En anert Thema war an der Emissioun Background den Tripartite-Accord. D'CSV géing zwar hannert deem Accord stoen, mee et wier elo den Ament d'Situatioun genee am An ze behalen. Ganz kloer wiere verschidde Punkte nämlech net.

Well elo gewosst ass, dass nach eng zousätzlech Index-Tranche erfält, esou d'Previsiounen vum STATEC, sollten d'Partner och nach emol zesumme kommen, esou d'Co-Fraktiounspresidentin vun der CSV Martine Hansen. Den Sozialdialog sollt reegelméisseg gefleegt ginn a net just an der Hetz, wann eng Krise ass.

Un den Index sollt een einfach net fréckele goen, esou déi Lénk-Deputéiert Myriam Cecchetti. Dat wier och wichteg fir den soziale Fridden am Land. Ee grousse Problem wier de Logement, et wier problematesch, dass vill Stéit méi wéi d'Hallschent vun hirer Paie fir d'Wunnen ausginn.

Dës Regierung hypothekéiert den Handlungsspillraum vun der nächster Regierung, huet den Sven Clement doropshin kritiséiert. Et géing elo nëmme kuerzfristeg gepléischtert ginn, dat wier en Vue vun de nächste Walen kee gutt Zeechen.

Den Deputéierten vun der Piratepartei an den Fernand Kartheiser vun der ADR hunn dorop higewisen, dass déi aktuell Zënshausse virun allem bei de Logements-Prêten zu engem däitleche Verloscht vun der Kafkraaft kéint féieren.

Den Problem vum Logement sollt un der Wuerzel ugepaakt ginn, den Ament géingen awer just hallefhäerzeg Mesure geholl ginn. Laangfristeg géing de System net opgoen. "Vläicht hu mer ze vill gutt situéiert Leit, déi näischt wëllen um Problem änneren", huet d'Myriam Cecchetti bedauert, vill Leit verdénge jo och un der Hausse vun de Logementspräisser.

RTL

© Domingos Oliveira (RTL)

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.