E Samschdeg war de Logementsminister eisen Invité an der Emissioun Background am Gespréich um Radio.

Mir brauche stabel Präisser. Den Eenzelen soll besser geschützt ginn, d’Hëllefe sollen an d’Luucht gesat ginn. An et misste vill méi bezuelbar, ëffentlech Wunnenge geschafe ginn. De Logementsminister Henri Kox war eisen Invité an der Emissioun Background. En negativen Trend bei de Präisser misst verhënnert ginn. Eng Rezessioun wär net gutt fir de Marché.

De Staat misst massiv an den ëffentleche Wunnengsraum investéieren, vill méi wéi bis ewell. An déi Wunnenge mussen och an ëffentlecher Hand bleiwen.

D’Mietgesetz gëtt jo ugepasst. Am Fréijoer d’nächst Joer soll dat gestëmmt ginn, hofft de Minister. De Mietdeckel, dat wat ee maximal als Loyer ka froen, geet erof. Vu 5 op 3,5%. Dat wär fir déi ganz iwwerdriwwe Loyeren ze verhënneren. Bei 70 bis 80% wär och haut kee Problem. Vill Proprietären maache sech nawell Suergen, ob et nach weider rentabel ass, fir ze verlounen. De Minister wëll déi nächst Zäit opklären, datt d’Investisseuren sech keng Suerge misste maachen. Dat neit Gesetz wär méi transparent a méi gerecht. An de Minister fäert net, datt manner investéiert gëtt.

D’Regierung plangt jo och eng «Leerstand-Steier», eng Tax op Wunnengen, déi eidel stinn. Dat sinn 3.000 Euro d’Joer. D’Steier geet all Joer ëm 900 Euro an d’Luucht bis op 7.500 Euro. Et géif net ëm Suen andreiwe goen, mä ëm d’Mobiliséiere vu Wunnengen. Et wär nu mol eng Urgence do. D’Recht op Wunnen wëll de Minister Kox an de Virdergrond stellen. An dat misst ee beschleunegen. Dofir géif een och mat de Gemengen a mat der Baubranche zesumme schaffen.

De Minister setzt wéi gesot ganz staark op de bezuelbare Wunnraum. Do sinn d’Präisser méi niddreg. Den Terrain lount een dacks just, mä d’Recht op Wunnen kann een awer weider verierwen. Et wär eben en 2. ëffentleche Marché, nieft dem «normale» Marché.

Nieft dem groussen Invest an de bezuelbare Wunnraum mat ëffentleche Promoteure setzt de Staat och d’Hëllefen fir den Eenzelen an d’Luucht. D’Subvention loyer gouf gehéicht a méi breet opgemaach. 25% vun deenen, déi kéinten, géifen déi elo ufroen. Zil wäre 40 bis 50%. Et wéilt een nach d’Demarche verbesseren. Et hätt een och 5 Leit agestallt, sou datt d’Delaie fir d’Ausbezuelen erof gaange sinn an elo bei 3 Méint leien. TVA-Logement vun 3% kritt ee jo den Ament op 50.000 Euro. Den Ament wär net virgesinn déi Héicht erop ze setzen, wéi dat vu munche Säite gefrot gëtt.

An engem Joer si jo Chamberwalen. Den Henri Kox geet nach emol mat. Hien ass elo zanter 3 Joer Minister a géif gären de Logements-Ministère weider féieren, villäicht mat erweiderte Kompetenzen.

Background mam Henri Kox

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.