E Samschdeg war de Lëtzebuerger Premier eisen Invité an der Emissioun "Background am Gespréich" um Radio.

Background am Gespréich mam Xavier Bettel

5,5 Milliarden Euro un Hëllefe fir d'Ekonomie wärend der Pandemie an elo an der Energiekris hätt de Premier och léiwer anescht investéiert, ma se wieren awer néideg gewiescht, esou de Xavier Bettel e Samschdeg de Mëtteg an eiser Emissioun Background am Gespréich. Op d'Kritik vun der Oppositioun um Budgetsprojet reagéiert de Premier mat der Géigefro, wat si dann anescht gemaach hätten?

Onofhängeg vun den aktuelle Krisen ass d'Staatsschold an de leschte Jore weider geklommen. Dës Sue wieren awer an d'Leit an d'Land investéiert ginn. Zum Beispill wieren d'Investitiounen am Ëmweltberäich op ronn 1,3 Milliarden Euro méi wéi verduebelt ginn. Och am Logement wiere Projeten an enger Valeur vun enger Milliard Euro gestëmmt ginn. Alles Saachen, déi wichteg fir d'Zukunft wieren.

Fir de Räichtum vum Land fir d'Zukunft ze sécheren, géif d'Regierung dann och Efforte maachen, fir d'Wirtschaft ze diversifizéieren, zum Beispill mat Projeten am Domaine vum Espace.

Ma aktuell wier d'Banken- an d'Finanzplaz eng "Mëllechkou" fir Lëtzebuerg, déi fir een Drëttel vum Räichtum, deen am Joer kreéiert gëtt, responsabel ass. An nëmmen esou kéint een de Sozialsystem finanzéieren. Deemno misst een attraktiv fir dëse Secteur bleiwen, esou de Premier.

Steierentlaaschtungen, déi duerch Scholde finanzéiert ginn, wieren net responsabel, esou de Xavier Bettel. Dowéinst hätt een déi am Koalitiounsaccord annoncéiert Steierreform esou net ëmgesat. De Steiersystem misst wuel méi gerecht ginn an esoubal et méiglech wier, voir genuch Sputt do wier, och ëmgesat ginn.

Wat de selwer festgeluechte Maximum vun 30 Prozent vun der Staatsschold par Rapport zum PIB ugeet, huet de Premier betount, dass hie kee Fetischist dovu wier, ma dass et awer a sengen Aen net responsabel wier, wäit iwwert dës Limitt erauszegoen. Hie wéilt op kee Fall responsabel dofir sinn, dass d'Land riskéiert erëm aarm ze ginn.

D'Ekipp op Regierungsniveau wier aktuell ganz kollegial an d'Oppositioun sollt net probéieren, do en Zwist erbäi ze rieden, deen net do wier.

De Xavier Bettel hätt op alle Fall nach Motivatioun an Energie, fir weider fir d'Bierger ze schaffen. Dofir hätt hien och schonn eng Rei Poste refuséiert, déi him offréiert gi wieren. An dëse Krisenzäite wier et a sengen Aen och net responsabel, einfach esou fort ze goen.

Wann hien an d'Wale géif goen, hätt hie wuel d'Ambitioun Premier ze bleiwen, ma den Titel wier him awer egal, dat heescht en anere Ministerposte wier och denkbar fir hien. Ob hien nach eng Kéier fir d'Walen opgesat gëtt, misst iwwerdeems seng Partei decidéieren. A wéi eng Koalitioun ee géif goen, géif awer vum Wieler ofhänken.

Wat d'Stater Gemengewalen ugeet, géif hien hoffen, dass d'Lydie Polfer sech nach eng Kéier géif opstellen. Wann d'Corinne Cahen de Poste vun der Buergermeeschtesch wéilt iwwerhuelen, wier dat e Verloscht fir seng Regierungsekipp, ma dat wier awer hire perséinleche Choix.

Beim Thema Energie huet de Premier erkläert, vill Vertrauen an d'Leit an d'Betriber ze hunn, dass dës trotz Präisdeckel Mesuren huelen, fir méiglechst vill Energie ze spueren. De Mesurëpak, deen d'Regierung decidéiert huet, fir d'Energiekäschte fir d'Leit ze reduzéieren, hätt awer virop d'Zil, fir d'Inflatioun erof ze drécken.

Eng vun de geplangte Mesuren, fir méi nohalteg Energie zu Lëtzebuerg ze fërderen, ass déi fir Photovoltaik-Anlagen op Neibauten obligatoresch ze maachen. Dëst wier e wichtege Jalon, deen haut misst gesat ginn, fir an der Zukunft grouss Beneficer ze hunn.

Iwwerhaapt misst een Decisioune mat Bléck op d'Zukunft huelen. Dozou géif och de Rekrutement vu Personal bei den Offices sociaux gehéieren. Et wier kloer, dass een déi Leit net haut alleguer kéint astellen, ma dat wier wichteg, fir d'Zukunft ze preparéieren.

Am Logement versteet de Premier d'Kritik un der laanger Dauer vun de Prozedure beim Bau, ma mir géifen an engem Rechtsstaat liewen an d'Leit missten awer d'Recht behalen, sech géint Projeten ze wieren. Ausserdeem missten eng ganz Rei Saache kontrolléiert ginn an dat géif nun emol seng Zäit daueren.

De Krich an der Ukrain geet weider, dat mécht dem Premierminister Suergen. Hien huet sech awer vun der Rhetorik vun ënnert anerem dem EU-Chefdiplomat Josep Borrell distanzéiert, dee vu massive militäreschen Interventioune vum Weste geschwat hat, am Fall, wou Russland nuklear Waffe géif upaken. Fir de Xavier Bettel probéiert de russesche President mat de Muskelen ze spillen. De Wladimir Putin hätt sech verkalkuléiert an e géif e Stéck Gréisst beweisen, wann en dee Feeler géif agesinn a mam Krich ophalen. Mä de Xavier Bettel rechent net domat, dass de russesche President dat wäert maachen. All Méiglechkeet fir nees op diplomateschem Wee mam Kreml ze kommunizéieren, misst genotzt ginn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.