Den Direkter vum Statec war um Samschdeg Invité an eiser Emissioun "Background am Gespréich".

D'Méiglechkeet vun enger Rezessioun d'nächst Joer ass do, allgemeng an der Eurozon an och fir Lëtzebuerg - dat sot den Direkter vum nationale Statistiksbüro Serge Allegrezza e Samschdeg de Mëtten op der Antenn vun RTL am Background. Aktuell géing een nach vun 1-2 Prozent Wirtschaftswuesstem ausgoen, wat awer och net vill wier fir Lëtzebuerg. De Wanter wier elo en Test, wéi gutt mer opgestallt sinn. Hie géing hoffen, datt am Fall vun enger Rezessioun d'Länner koordinéiert reagéieren, fir datt se net ze laang an ze déif gëtt. Deemno wéi géing et dann 2024 nees e Liichtbléck ginn - wann net, da géing d'Loft dënn ginn. Et misst een dann nees iwwer grouss gemeinsam Emprunten an Europa schwätzen.

Präisdeckel-Mechanismus hält weider d'Strooss

De Präisdeckel op de Gas- a Stroumpräisser aus der leschter Tripartite wier effikass, wann och manner wéi geduecht. De Statec huet dëse Mount fir 2023 mat 3,4% Präisdeierecht gerechent. An der leschter Tripartite war een nach vun 2,8% ausgaangen. De Serge Allegrezza huet erkläert, d'Hausse vun de Liewensmëttelkäschte géing méi staark klammen, wéi erwaart an d'Inflatioun undreiwen an huet zouginn, datt d'Alimentatioun bei der Gewiichtung vun de Präisser vläicht net héich genuch agesat gi wier. Komplett donieft hätt een awer net geleeën.

Den Ament géif een allgemeng eng "Kontaminatioun" vun der Erhéijung vun de Präisser erliewen. De Serge Allegrezza erwaart sech dann, datt d'Reduktioun vun der TVA ëm 1 Prozent vum 1. Januar un d'Inflatioun weider géing bremsen. Virausgesat d'Betriber maache mat.

D'Kritik ënnert anerem vu Sozialverbänn, d'Hëllefsmesuren an der leschter Tripartite wieren net cibléiert genuch gewiescht, huet de Serge Allegrezza zréckgewisen. Stéit mat manner Akommes géifen nämlech iwwerduerchschnëttlech vun engem allgemenge Präisdeckel profitéieren. Gekoppelt mam Steierkredit vu Mäerz géifen d'Mesuren och fir dëst Joer duergoen, fir de Kafkraaftverloscht ze kompenséieren.

A senge leschte Previsiounen hat de Statec domat gerechent, datt duerch d'Präisdeierecht d'nächst Joer am ganzen 3 Indextranchë sollen erfalen - déi, déi reportéiert gouf, eng am Ufank vum Joer an eng um Enn vum Joer. Et hätt een allerdéngs eng grouss Ongewëssheet wéinst der héijer Volatilitéit bei den Energiepräisser. Hie géing hoffen, datt een net nach eng weider Tripartite virun de Chamberwale géif brauchen, datt um Niveau vun der Inflatioun eng gewësse Berouegung géif asetzen.

Mä Tripartitte kéinten op alle Fall ganz interessant sinn, fir och iwwer aner Sujeten ze diskutéieren.

Problemer a gesellschaftlech Erausfuerderungen zesummen denken an ugoen

D'Erhale vum Pensiouns- a Sozialsystem engersäits an dem Klima anerersäits, d'Kompetitivitéit vu Lëtzebuerg an den Indexsystem sinn dem Statec-Direkter no Sujeten, déi onbedéngt misse vun der Politik mat de Sozialpartner an der Zivilgesellschaft a grousser Ronn thematiséiert ginn an zesummen ugaange ginn. Och eng Diskussioun iwwert den Indexsystem wäert kommen, dovunner ass de Serge Allegrezza iwwerzeegt. Hei misst een eng Contributioun souwuel vun de Privatbetriber wéi dem Staat an d'Ae faassen. Sécher wier, et dierft een net elo schonn alles verschéissen, mä et misst ee sech de finanzielle Spillraum, deen ee brauch, loossen, fir déi grouss Erausfuerderungen unzegoen.

Mir hu keng Feeler gemaach

Feeler hätt ee beim Statec an der Urgence an dem Zäitdrock vun de leschte Méint keng gemaach, sou de Serge Allegrezza. Éischter Feeler bei der Aschätzung. Och d'Statistikamt wier am Ufank dovunner ausgaangen, datt de Krich an der Ukrain séier eriwwer wier. Wéi anerer och hätte si de Krich net viraus gesinn. Mä do wier de Statec awer a gudder Gesellschaft.

De laangjäregen Direkter vum Statec huet an der Emissioun betount, datt seng Onofhängegkeet an d'Onofhängegkeet vum Statec komplett wieren. Hien hätt och ni d'Gefill gehat, datt seng Mandater a Verwaltungsréit e potentiellen Interessenskonflikt kéinten duerstellen. Déi verschidden Aktivitéite wiere vill méi eng Beräicherung.

De Reproche ze no un der Politik ze sinn, géif hie ganz dacks héieren, sou de Serge Allegrezza, dee Member bei der LSAP ass. Mä wann ee wéilt Äntwerten ob d'Froe fannen, déi d'Politik sech stellt, da misst ee verstoen, wat déi Froe sinn. An dat kéint een net, wann een ze wäit ewech wier. Et misst een also no un der Politik dru sinn, ouni sech awer dovunner beaflossen ze loossen. Aktiv Politik hätt a wéilt hien awer ni maachen, sou eisen Invité e Samschdeg am Background.

Background am Gespréich mam Serge Allegrezza

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.