E Samschdeg war d'Ëmweltministesch eis Invitée an der Emissioun Background am Gespréich um Radio.

No engem Urteel vum Verwaltungsgeriicht am Juli ginn Ännerungen um Naturschutzgesetz preparéiert an déi wieren um Punkt finaliséiert ze ginn, esou d'Ëmweltministesch Joëlle Welfring e Samschdeg am Background hei op RTL. Iwwert déi lescht Joerzéngten hätt sech d'Gesetz entwéckelt. Et wier ugepasst, präziséiert, mee "zum Deel och méi strikt" ginn, huet d'Ministesch zouginn. Zil vun den Ännerunge wier et, fir "onnéideg Blockagen aus dem Wee ze raumen". D'gréng Politikerin huet erkläert, datt si wéilt Naturschutz an einfach Prozeduren ënnert een Hutt kréien. Dowéinst géing een zum Beispill bei Fäll oder Projeten, déi dacks änlech sinn, probéiere méi dacks op Kaderautorisatiounen zeréckzegräifen.

Méi séier soll et och bei de Primmen an de Beräicher Logement, Energie-Installatiounen oder Mobilitéit goen, wou grouss Retarde bei villen Dossiere sinn. Hei géing een engersäits op d'Digitaliséierung setzen, mee déi Projete géinge laang daueren. D'Retarde sinn awer haaptsächlech dorobber zeréckzeféieren, datt et u Personal gefeelt huet, fir eng ganz staarker Demande nozekommen. Eng Demande, iwwert déi d'Joëlle Welfring sech freet. Mee hätt een net kënnen antizipéieren an direkt méi Leit astellen? D'Ministesch sot beim leschte "Pak" u Mesuren, déi op der Tripartite am September decidéiert goufen, wier anengems decidéiert ginn, 10 Leit anzestellen.

Op d'CO2-Steier um Sprit ugeschwat, huet d'Ministesch erkläert, d'Präisser wieren den Ament souwisou schonn héich, dofir wier et och net néideg, d'CO2-Steier weider eropzesetzen. Ma allgemeng soll dës Steier, d'Leit motivéieren, ze spueren an dat géing och funktionéieren, esou d'Joëlle Welfring. Si huet erkläert: an absolutten Zuelen ass d'Contributioun vu Lëtzebuerg un den Zäregasemissiounen zwar minim, mee op de Kapp gerechent ass Lëtzebuerg mat vir bäi. Dofir hätt der grénger Ëmweltministesch no Lëtzebuerg als entwéckelt Land eng Responsabilitéit, a kéint net de Kapp an de Sand stiechen. Et misst een och mam gudde Beispill virgoen, grad wann een op internationalem Plang aner Länner wéilt iwwerzeegen, sech nach méi am Klimaschutz z'engagéieren.

Beim Thema Bauschutt huet d'Ministesch erkläert, dass et Alternative géif ginn, fir ze bauen, esou dass manner Buedem misst erausgeholl an esou manner Bauschutt produzéiert ginn. Gläichzäiteg wier si a Gespréicher mat den Entrepreneuren, fir weider Deponien ze schafen.

Background am Gespréich vum 26. November 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.