An eiser Emissioun Background koumen e Samschdeg de Mëtteg d'Vertrieder vun de grousse Lëtzebuerger Jugendparteien zu Wuert.

Am Superwaljoer stoung virop d'Fro vun de Spëtzekandidaten am Fokus. Mir freeën eis, dass d'Paulette Lenert endlech hir Spëtzekandidatur annoncéiert huet a mir denken, dass et Zäit ass, dass Lëtzebuerg eng Premierministesch kritt, sou den Amir Vesali vun de Jonke Sozialisten.

Bei der CSV steet nach kee Spëtzekandidat fest, mä fir eis als CSV wier et gutt een ze fannen, den d'Partei kann beienee bréngen, sot den Alex Donnersbach vun der CSJ, der Chrëschtlech-Sozialer Jugend. Bei de Gréngen stinn och nach keng Käpp fest, mä programmatesch wier ee gutt opgestallt, sou den Fabricio Costa vun déi Jonk Gréng.  Fir d'Demokraten ass et natierlech méi evident, dass de Premier Xavier Bettel nach eemol als Spëtzekandidat fir d'DP an d'Course geet.  Och d'Lydie Polfer als Spëtzekandidatin an der Stad wier am Sënn vun de Jonken Demokraten. Si géing jo elo och am Duo mam Patrick Goldschmidt an d'Walen zéien an et wieren och vill Jonker mat op der Lëscht, sou de Michael Agostini vun der JDL, de Jonken Demokraten.

Sinn d'Jugendparteien brav an ugepasst? Och dat war eng Fro de Mëtteg an eiser Emissioun. „Do sinn ech net domat d‘accord“, sou den Fabricio Costa vun déi Jonk Gréng. Besonnesch am Logement hätt een an der Lescht Kritik geüübt a wann een enttäuscht ass vun der Mammepartei dann dierf een dat och soen. Mir waren zum Beispill enttäuscht vum Cannabis-Dossier den elo dës Legislatur net an där Form duerchgeet, wéi et ugeduecht war. Do hate mer eis zu Wuert gemellt an do hu mer eis och positionéiert, sou de Fabricio Costa. De Michael Agostini huet seng JDL gelueft, si wieren déi Jugendpartei déi déi meeschte Communiquéen an de leschte Joren erausgeschéckt hätt a si géinge sech zu ganz verschiddene Sujeten äusseren. Och d'Press géing natierlech e wichtege Rôle spillen fir d'Stëmm vun der Jugend no vir ze bréngen, sou den Alex Donnersbach vun der CSJ. Domadder war och den Amir Vesali vun den Jonke Sozialisten d'accord, mä Parteiintern Konflikter a Personalfroe géingen d'Press dacks méi interesséieren wéi hir Positiounen zu verschiddenen Thematiken.

2020 hate sech zum Beispill 7 Jugendparteien zesumme fir d'Ofschafe vun den Duebelmandater staark gemaach. Et hätt een och eng Petitioun gestart, mä Corona hätt deem e Stréch duerch d'Rechnung gemaach. Et wier awer eng Iddi, fir nom Superwaljoer nach eemol dorop zeréckzekommen, sou den liberale Michael Agostini. Dass d'Membere vun de Jugendparteien d'Petitioun net ënnerschriwwen hunn, wier just en dommen Zoufall gewiescht, seet och den Gréngen Fabricio Costa, well et wier e wichtege Sujet. Bei eis an der Mammepartei ass kee grousse Konsens zu der Fro vun den Duebelmandater, seet den Alex Donnersbach. Et wier awer eng Fro déi ee misst partei-iwwergräifend an der Chamber ugoen. Et géinge jo och vill Froen nach ze klären bleiwen: Just fir d'Buergermeeschteren oder och fir d'Schäffen? Gëtt de Buergermeeschter-Posten dann e Beruff?

Background am Gespréich vum 21. Januar 2023

D'Fro vun de Fraen an der Politik gëtt och jee no Partei e bëssen anescht gehandhaabt. Firwat souzen e Samschdeg de Mëtteg 4 Männer an der Ronn a keng eenzeg Fra? Dat wier fir hien eigentlech keen Thema, sou den Alex Donnersbach vun der CSJ. Hie wéilt näischt do eran interpretéieren. Am Allgemenge géing ee constatéieren, dass sech manner Fraen an der Politik engagéieren. An der CSV hätt ee mëttlerweil awer och eng Duebel-Spëtzt a ville Gremien an dat wier wichteg. "Mir hunn an eiser Partei zanter eiser Grënnung eng Paritéit a meng Co-Spriecherin ass den Ament zu Wien", sou reagéiert den Fabricio Costa op de Reproche. D'Geschlecht selwer dierf net ausschlaggebend ginn. Et soll keng Flicht gi fir Duebelspëtzten, mä eng Méiglechkeet. Mir sollen no Kompetenze kucken an och fir e gudden Equiliber suergen, sou den Amir Vesali vun de Jonke Sozialisten.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.